Ika-129 nga Gradwasyon sa Gilead

“Adlaw Ninyo Ini”

SANG Septiembre 11, 2010, mga 8,000 ang nagtipon sa isa ka espesyal nga okasyon. Ini amo ang gradwasyon sang ika-129 nga klase sang Watchtower Bible School of Gilead. “Adlaw ninyo ini,” siling ni Samuel Herd nga miembro sang Nagadumala nga Hubon sang mga Saksi ni Jehova sa mga estudyante. “Ari kami para magbuylog sa inyo kalipay!”

Ang “Dulunggan nga Makabati”

Ginsugdan ni Brother Herd ang programa sa isa ka pahanumdom nga dapat gamiton sing maayo sang tanan nga Cristiano ang ila “dulunggan” paagi sa pagpamati sa Pulong sang Dios. (Hulubaton 20:12, NW) “Nagpamati kamo kay Jehova sang nagligad nga mga binulan,” siling ni Brother Herd sa mga estudyante, “kag amo sini ang himuon ninyo asta san-o.”

Paano magamit sing maayo sang bag-o nga mga misyonero ang ila dulunggan? “Paagi sa pagpamati sa Pulong sang Dios,” siling ni Brother Herd. Nagsiling pa sia: “Sa sini nga programa, madamo pa kamo sing mabatian para mahanda kamo sa inyo pagmisyonero sa masunod nga tinuig.”

“Magsalig kay Jehova sa Bug-os Mo nga Tagipusuon”

Ginbinagbinag ni Gerrit Lösch, nga miembro sang Nagadumala nga Hubon, ining makapahunahuna nga tema sa mga estudyante. Ginsaysay niya ang madamo nga beses nga ang katawhan sang Dios, halin sang una asta subong, nagsalig kay Jehova.

“Ang mga misyonero dapat man magpakita sing pagsalig sa paghimo sang ila mga asaynment,” siling ni Brother Lösch. “Halimbawa,” siling niya, “mahimo mamangkot kamo: ‘Matun-an ko bala ang bag-o nga lenguahe? Maka-adjust bala ako sa lain nga kultura? Mabatuan ko bala ang kahidlaw sa pamilya?’” Bilang sabat, ginpabakod ni Brother Lösch ang mga estudyante nga ‘magsalig kay Jehova.’

Ginbasa man ni Brother Lösch ang Hulubaton 14:26, nga nagasiling: “Sa kahadluk sa GINOO yara ang mabakud nga pagsalig.” Labi kita nga magasalig kay Jehova kon pirme naton dumdumon ang mga tinion nga ginpakamaayo niya kita.

Suno sa Biblia, ang nagasalig kay Jehova ‘manginsubong sang kahoy nga natanum sa luyo sang mga tubig, nga nagapakalapkap sang iya mga gamut sa ubay sang suba, kag indi mahadluk kon mag-abut ang kainit, kay ang iya dahon manginhilaw.’—Jeremias 17:7, 8.

Maathag ang leksion. “Bisan ano man ang matabo,” siling ni Brother Lösch, “magsalig gid kamo pirme kay Jehova.”

“Iluga ang Matutom nga mga Anghel”

Amo ini ang topiko sang pamulongpulong ni Stephen Lett nga miembro sang Nagadumala nga Hubon. Maayo gid nga halimbawa ang mga anghel. “Ang tanan nga ginsugid sang Biblia parte sa ila maayo gid nga ilugon,” siling ni Brother Lett. Ginsambit niya dayon ang apat ka kinaiya sang matutom nga mga anghel nga dapat ilugon—ang ila pagbatas, pagkamapainubuson, pagkamabinuligon, kag katutom.

Ginsugid sang Biblia nga ang isa ka anghel nagbato sa ‘principe sang Persia’—isa ka gamhanan nga demonyo—sing 21 ka adlaw. (Daniel 10:13) Ginpakita sini nga anghel ang pagbatas. Ang mga Cristiano man “nagapakigdumog . . . batok sa malaut nga mga puersa nga espiritu,” siling ni Brother Lett. (Efeso 6:12) “Makigbato man kamo para makapadayon sa inyo asaynment,” siling niya sa mga estudyante.

Sang ginpamangkot ni Manoa, nga amay ni Samson, kon ano ang ngalan sang isa ka anghel, ang anghel wala nanugid. Ginpakita sini nga anghel ang pagkamapainubuson. (Hukom 13:17, 18) Ginsilingan ni Brother Lett ang mga estudyante: “Kon may magdayaw sa inyo ukon sa inyo ikasarang, mapainubuson nga iliso ang iya atension kay Jehova kag sa Iya organisasyon.”—1 Corinto 4:7.

Sang si Jesus ara sa hardin sang Getsemane antes sia patyon, “nagpakita sa iya ang isa ka anghel gikan sa langit kag ginpabakod sia.” (Lucas 22:43) Ginpakita sini nga anghel ang pagkamabinuligon. “Ipangamuyo nga mabal-an ninyo kon ano gid ang kinahanglan sang mga tawo sa lugar nga asaynan sa inyo,” siling ni Brother Lett, “kag paagi sa giya ni Jehova, tinguhai nga buligan sila.”

Mas madamo nga anghel ang wala magbuylog sa pagrebelde ni Satanas, gani makasiling kita nga ini nga mga anghel maayo gid nga halimbawa sang katutom.—Bugna 12:4.

“Pareho sining matutom nga mga anghel, pamatuki man ang Yawa,” siling ni Brother Lett sa mga estudyante. “Pamatuki sia, kag magapalagyo sia.”—Santiago 4:7.

Tatlo Pa ka Bahin sang Programa

“Himua si Jehova nga Igang sang Imo Tagipusuon.” Ang makapainteres nga pamulongpulong ni Gary Breaux, nga miembro sang Branch Committee sang Estados Unidos nabase sa Salmo 73:26. Nakabulig ini sa mga estudyante nga maintiendihan nga dapat sila magsalig kay Jehova. Paano nangin igang si Jehova? Ang papel nga napintalan sang igang ukon bato “indi mapalid sang mabaskog nga hangin,” siling Brother Breaux. “Pareho sa sini, si Jehova makabulig para mabantayan ang inyo tagipusuon kag indi ini madala.” Matuod, mahimo kita mapatalang sang aton tagipusuon kon ginatilawan ang aton pagbatas. (Jeremias 17:9) Mahimo mag-untat ang isa bangod sa lain nga klima, pagkaon, kag bag-o nga mga kaupdanan sa puluy-an sang mga misyonero. “May mga sitwasyon nga kinahanglan kamo magpili kag magdesisyon,” siling ni Brother Breaux. “Pilion bala ninyo kon ano ang makapahalipay kay Jehova? Kon himuon ninyo ini, si Jehova mangin ‘igang sang inyo tagipusuon.’ Giyahan niya kamo.”

“Bastante Bala ang Inyo Pagtuo Para Makaubog?” Ining tema sang pamulongpulong sang instruktor sa Gilead nga si Sam Roberson nabase sa Josue kapitulo 3. Paano natabok sang minilyon ka Israelinhon ang Suba Jordan sang panahon nga nagaawas ini? Ginsilingan ni Jehova si Josue nga suguon ang mga saserdote nga ‘magdolog sa Jordan.’ Ang Dios nagpromisa: “Kon ang mga dapadapa sang mga tiil sang mga sacerdote . . . makapahuway sa mga tubig sang Jordan, ang mga tubig sang Jordan magahawa, kag . . . magaponong sila.” (Josue 3:8, 13) Ginsilingan ni Brother Roberson ang mga estudyante: “May talabukon kamo nga mga ‘Jordan’ sa inyo kabuhi nga magabalabag sa mga pagpakamaayo kon tugutan ninyo.” Halimbawa, mahimo indi kamo magsahuay sang inyo kaupod nga mga misyonero. Ano ang solusyon? “Magpokus sa trabaho; indi sa mga nagatrabaho.” Ginlaygayan sila ni Brother Roberson: “Kon may bastante kamo nga pagtuo para makaubog, buligan kamo ni Jehova para matabok ang mga ‘Jordan’ sa inyo pagmisyonero.”

“Lig-una ang Inyo mga Katuyuan.” Amo ini ang tema sang instruktor sa Gilead nga si William Samuelson. Nabase ini sa Hulubaton 16:3, nga nagasiling: “Itugyan sa GINOO ang imo mga buluhaton, kag lig-onon ang imo mga katuyoan.” Ginpamangkot ni Brother Samuelson ang mga estudyante: “Buot bala silingon sini nga bersikulo nga wala ka na sing dapat himuon kundi ‘itugyan ang imo mga buluhaton’ kay Jehova?” Indi, siling niya, kay ang Hulubaton 16:1 (NW) nagsiling: “Ang tagipusuon sang tawo amo ang nagahimo sing plano.” Si Brother Samuelson nagsiling: “Si Jehova wala nagahimo sing plano para sa inyo. Gani, dapat ninyo siguraduhon nga ara kamo sa husto nga direksion. Kon pirme kamo magtuon, mangamuyo, kag makig-angot sa lokal nga branch office, padayon nga mangin maayo ang inyo tagipusuon, kag lig-unon mismo ni Jehova ang inyo mga katuyuan.”

Mga Eksperiensia kag mga Interbyu

Bilang bahin sang paghanas, ang mga estudyante sa Gilead nagaupod sa lokal nga mga kongregasyon sang mga Saksi ni Jehova sa pagwali. Gin-interbyu ni Mark Noumair, nga instruktor man sa Gilead, ang pila ka estudyante parte sa ila mga eksperiensia. Nakita gid sa sini nga mga eksperiensia ang papel sang pangamuyo para masapwan ang sinsero nga mga tawo sa lugar nga ila ginwalihan.

Halimbawa, may estudyante nga mag-asawa nga ara sa isa ka restawran. Natalupangdan sang isa ka empleyado nga nangamuyo sila sing hipos. Ginpalapitan niya sila kag ginpamangkot kon bala mga Saksi ni Jehova sila. Sang nabal-an sang empleyado nga Saksi sila, nagsiling sia nga nagdaku sia nga Saksi pero nag-untat sia sa pag-alagad. Napriso pa gani sia bangod sa isa ka krimen. Pero gusto na sining lamharon nga lalaki nga magbalik kay Jehova. Nagsiling pa sia nga sang wala pa makasulod ang mag-asawa sa restawran, nangamuyo sia sa Dios nga kuntani buligan sia nga magbag-o. Ginsabat ang iya pangamuyo!

Sa tema nga “Tilawi kag Tan-awa nga si Jehova Maayo,” gin-interbyu ni Rudi Hartl sang Writing Correspondence Department sanday Wayne Wridgway sang Mozambique, Jason Reed sang Chile, kag Kenji Chichii sang Nepal, nga mga misyonero nga nag-eskwela man sadto sa Gilead. Ginsaysay nila ang pila ka kabudlayan sang bag-o pa lang sila nga mga misyonero—pagtuon sing bag-o nga lenguahe, pagpakigbagay sa kultura, kag kahidlaw sa pamilya. “Ang pagpangita dayon sing mga abyan sa amon bag-o nga kongregasyon nakabulig sa amon,” siling ni Brother Chichii. “Samtang nagasuod kami sa kongregasyon, daw kahapos lang batuan ang kahidlaw sa pamilya.”

Sa tapos mabaton sang 56 ka estudyante ang ila diploma, ginbasa sang isa sa ila ang makatalandog nga sulat sang pagpasalamat sang ila klase. Ang isa ka bahin sang sulat nagsiling sa Nagadumala nga Hubon: “Nabatyagan mismo sang amon klase ang inyo wala untat nga pagbulig kag gugma sa amon, paghatag sing kurikulum, pagbisita sa klase, kag paghatag sing espirituwal nga instruksion. Tungod ginpabatyag ninyo sa amon ang inyo gugma, tinguhaan gid namon nga ilugon ang inyo maayo nga halimbawa sang gugma, pagpasensia, pagpaubos, kag pag-una sang kinahanglanon sang iban pag-abot namon sa lugar nga gin-asayn sa amon.”

[Blurb sa pahina 28]

“Kon may magdayaw sa inyo . . . , iliso ang iya atension”

[Blurb sa pahina 29]

“May talabukon kamo nga mga ‘Jordan’ sa inyo kabuhi”

[Tsart/Mapa sa pahina 31]

ESTADISTIKA SANG KLASE

9 ka pungsod ang ila ginhalinan

56 ka estudyante

28 ka mag-asawa

33.0 aberids nga edad

17.9 aberids nga tuig sugod sang ginbawtismuhan

13.3 aberids nga tuig sa bug-os tion nga ministeryo

[Mapa]

(Para sa aktual nga pormat, tan-awa ang publikasyon)

Ang mga misyonero ginpadala sa 25 ka pungsod nga makita sa idalom

MGA PUNGSOD NGA GINPADAL-AN SANG MGA MISYONERO

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Retrato sa pahina 30]

Gin-akto liwat sang mga estudyante ang isa sa ila mga eksperiensia sa pagwali

[Retrato sa pahina 31]

Ika-129 nga Gradwasyon sang Watchtower Bible School of Gilead

Ang mga raya nanumeruhan halin sa atubangan pakadto sa likod, kag ang mga ngalan nalista halin sa wala patuo sa tagsa ka raya.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.