Pamangkot sang mga Bumalasa . . .
Dapat Bala Tudluan sang mga Ginikanan ang Ila Kabataan Parte sa Sex?
▪ Madamo nga ginikanan ang nagahimo sang ila masarangan para maproteksionan ang ila kabataan sa makahalalit nga mga balatian. Kaanggid man sini ang dapat nila himuon para maproteksionan ang ila kabataan sa malain nga moral. Ang isa ka paagi amo ang nagakaigo nga pagtudlo sa ila kabataan parte sa sex. (Hulubaton 5:3-23) Importante ini nga pagtudlo kay ang imoral nga mga butang sa TV, Internet, mga libro, kag komiks padayon nga nagaimpluwensia sa kabataan.
“Ang problema subong indi ang pagtuon sang kabataan parte sa sex,” siling sang awtor kag propesor sa edukasyon nga si Diane Levin, kundi “kon ano ang ila ginatun-an, ang edad nga nagatuon sila sini, kag kon sin-o ang nagatudlo sa ila. Ang kabataan makatuon sing sala kag makahalalit nga edukasyon parte sa sex sa mga pasayod kag sa kon ano ang uso.”
Dapat proteksionan sang mga ginikanan ang ila kabataan sa tiko kag imoral nga pagtamod nga nagahalit sa komunidad. (Hulubaton 5:1; Efeso 6:4) Dapat may ihibalo ang mga kabataan parte sa ila lawas, kon paano ini atipanon, kag kon paano proteksionan ang ila kaugalingon sa imoral nga mga tawo. Antes magtin-edyer—ang panahon nga nagabag-o ang lawas—dapat mahibaluan sang bata nga babayi ang mga pagbag-o sa iya lawas kag maintiendihan kon ngaa kag paano nagakatabo ang pamulanon. Dapat man mahibaluan na nga daan sang bata nga lalaki ang pag-awas sang semilya kon gab-i ukon wet dreams. Samtang gamay pa sila, mahimo na sila tudluan sang mga ginikanan kon ano ang tawag sa pribado nga mga bahin sang lawas. Dapat sila tudluan nga ini nga mga bahin sang lawas (1) pinasahi, (2) indi dapat pag-istoryahan sing binastos, kag (3) indi dapat pag-ipatandog ukon ipakita sa iban. Samtang nagadaku ang kabataan, kinahanglan mahibaluan sang mga ginikanan kon san-o nila puede ipaathag kon paano nagabusong ang isa ka babayi.a
Dapat umpisahan sang mga ginikanan ini nga pagtudlo sing mas temprano. Mahimo na maabtan sing pamulanon ang bata nga babayi nga 10 anyos ukon mas bata pa. Mahimo man mag-wet dreams ang bata nga lalaki nga 11 ukon 12 anyos. Basi matingala ang kabataan kon wala nila ini maintiendihan. Dapat nila mahibaluan sing abanse nga ini nga mga pagbag-o sa ila lawas normal lang. Ini man ang tion nga buligan sila nga maintiendihan kag maapresyar ang mga prinsipio sang Biblia sa moral, nga ginabalewala sang kalabanan nga sekular nga programa sang pagtudlo parte sa sex.—Hulubaton 6:27-35.
[Nota]
a Makabulig sa mga ginikanan ini nga mga publikasyon nga ginhimo sang mga Saksi ni Jehova parte sini nga mga topiko: “Paghanda Sang Imo Anak nga Babayi Para sa Una nga Pamulanon,” sa Mayo 2006 nga Magmata!, pahina 10-13; “What’s Happening to My Body?” sa kapitulo 6 sang libro nga Questions Young People Ask—Answers That Work, Volume 2; kag “Mga Sekreto sang Kalipay sa Pamilya—Istoryaha ang Imo Kabataan Parte sa Sex,” sa Nobiembre 1, 2010 nga Ang Lalantawan, pahina 12-14.