Gintawag Sila nga “mga Anak sang Daguob”

KON mabaskog ang ulan, mahimo ka makabati sang daguob. Nahadlok ka bala sa daguob?—a Gintawag ni Jesus ang duha sa iya mga sumulunod nga “mga Anak sang Daguob.” Hibaluon naton kon ngaa.

Ining duha ka sumulunod ni Jesus amo sanday Santiago kag Juan. Mag-utod sila, kag mga anak nanday Zebedeo kag Salome. Si Salome mahimo utod ni Maria nga iloy ni Jesus. Gani mahimo magpakaisa sanday Jesus, Santiago, kag Juan kag miguhay gid halin sang bata pa sila.

Si Zebedeo isa ka mangingisda. Mangingisda man sanday Santiago kag Juan. Nalakip sila nga duha sa una nga mga sumulunod ni Jesus. Sang gin-agda sila ni Jesus, ginbayaan nila dayon ang ila pagpangisda kag nagsunod sa iya. Sang ulihi, ginpili ni Jesus nga mangin apostoles ang 12 sa iya mga sumulunod. Nalakip sa sini sanday Santiago kag Juan.

Pila ka bulan antes ginpatay si Jesus, nag-agi sila sang iya mga apostoles sa teritoryo sang Samaria. Gab-i na, kag kapoy gid sila. Pero indi gusto sang mga Samaritano nga magtener sa ila siudad si Jesus kag ang iya mga apostoles. Nahibaluan mo bala kon ngaa?— Hibaluon naton.

Si Jesus kag ang iya mga apostoles mga Judiyo, kag ginapakanubo sang kalabanan nga Judiyo ang mga Samaritano. Pero si Jesus mainayuhon sa ila. Kag dapat amo man sini sanday Santiago kag Juan. Pero naakig sila nga duha sa mga Samaritano nga wala nagbaton sa ila, kag ginpamangkot nila si Jesus: ‘Luyag mo bala nga isiling namon nga magpanaug ang kalayo gikan sa langit kag patyon sila?’ Ano sa banta mo ang ginhimo ni Jesus?— Ginsaway niya sila! Dapat pa magtuon sanday Santiago kag Juan parte sa kaluoy.

Gusto man nanday Santiago kag Juan nga mangin una pirme, nga sila ang pinakaimportante. Wala madugay antes napatay si Jesus, ginpakadto nila kay Jesus ang ila iloy para ihambal ini: “Isiling mo nga ining duha ko ka anak maglingkod sa imo ginharian, ang isa sa imo tuo kag ang isa sa imo wala.” Sang nabatian sang napulo ka apostoles ang ginhimo nanday Santiago kag Juan, naakig sila. Naakig ka man bala?—

Mahimo naakig ka man. Wala kita nanamian kon gusto sang iban nga mangin una kag mangin pinakaimportante. Sang ulihi, narealisar nanday Santiago kag Juan ang ila sala, kag nagbag-o sila. Nangin mainayuhon sila kag mahigugmaon nga apostoles. Ano ang matun-an naton sa sini?—

Pareho kay Jesus, dapat kita mangin mainayuhon sa tanan. Mainayuhon sia sa mga tawo—lalaki man, babayi, ukon kabataan. Gusto mo bala sia ilugon?—