Luyag Mo Bala nga Ikaw Pirme ang Mauna?

MAY kilala ka bala nga luyag pirme mauna?⁠— Mahimo nga manis-og sia agod makauna sa linya. Nakakita ka na bala sini?⁠— Nakita sang Daku nga Manunudlo bisan gani ang mga hamtong na nga nagatinguha nga makakuha sing una, ukon labing importante, nga mga duog. Kag wala niya maluyagi ini. Tan-awon naton kon ano ang natabo.

Ang Biblia nagasugid nga gin-agda si Jesus sa isa ka daku nga sinalusalo sa balay sang isa ka Fariseo, nga isa anay ka importante nga relihioso nga lider. Sang nakaabot na si Jesus, nakita niya ang iban nga mga bisita nga nagsinulod kag nagpili sing labing maayo nga mga duog. Gani nag-istorya sia sa mga bisita. Luyag mo bala pamatian ini?⁠—

Si Jesus nagsiling: ‘Kon agdahon ka sa isa ka punsion sang kasal, indi pagpilia ang pinakamaayo, ukon labing importante, nga duog.’ Nahibaluan mo bala kon ngaa ginsiling ini ni Jesus?⁠— Ginpaathag niya nga basi may gin-agda man nga mas importante nga tawo. Gani, subong sang makita mo sa laragway, ang isa nga naghanda sing punsion nagpalapit kag nagsiling: ‘Hatagi sing duog ini nga tawo, kag magsaylo ka didto.’ Ano nian ang batyagon sang bisita?⁠— Mahuya sia bangod makita sia sang tanan nga bisita nga masaylo sa kubos ka importante nga duog.

Ginapakita ni Jesus nga indi husto nga handumon ang pinakamaayo nga duog. Gani nagsiling sia: ‘Kon gin-agda ka sa isa ka punsion sang kasal, kadto ka kag maglingkod sa labing kubos nga duog. Nian ang isa nga nag-agda sa imo mahimo magpalapit kag magsiling, “Abyan, magkadto ka sa ibabaw.” Nian mapadunggan ka sa atubangan sang tanan nga inagda man kon magsaylo ka sa mas maayo nga duog.’—⁠Lucas 14:​1, 7-​11.

Nahangpan mo bala ang punto sang sugilanon ni Jesus?⁠— Tan-awon naton kon nahangpan mo. Handurawa nga masakay ka sa isa ka gutok nga bus. Magadali ka bala agod nga makapungko ka kag pabay-an ang isa ka tigulang nga tawo nga nagatindog?⁠— Maluyagan ayhan ini ni Jesus kon himuon mo ini?⁠—

Ang isa mahimo magsiling nga indi interesado si Jesus kon ano ang aton ginahimo. Apang nagapati ka bala sa sina?⁠— Sang didto si Jesus sa daku nga sinalusalo sa balay sang Fariseo, nagatan-aw sia samtang ang mga tawo nagapili sang ila mga pulungkuan. Indi ayhan nga interesado sia gihapon sa aton ginahimo karon?⁠— Karon nga didto na si Jesus sa langit, pat-od gid nga yara sia sa maayong kahimtangan sa pagtan-aw sa aton.

Kon ang isa magtinguha nga makauna, mahimo ini magtuga sing mga problema. Masami nga matabo ang pagbinaisay, kag may maakig. Kon kaisa nagakatabo ini kon ang mga kabataan dulungan nga magsakay sa bus. Sa pagbukas gid sang mga ganhaan sang bus, nagaunahay ang mga kabataan. Luyag nila nga makapungko sa pinakamaayo nga mga pulungkuan, ang malapit sa bintana. Nian ano ang matabo?⁠— Huo, mahimo nga maakig sila sa isa kag isa.

Ang paghandum nga mangin una makatuga sing madamo nga problema. Nangin problema gani ini sang mga apostoles ni Jesus. Subong sang natun-an naton sa Kapitulo 6 sini nga libro, ginbaisan nila kon sin-⁠o ang labing daku sa ila. Ano ang ginhimo ni Jesus?⁠— Huo, gintadlong niya sila. Apang nagbaisay naman sila liwat sang ulihi. Tan-awon naton kon paano ini nagsugod.

Ang mga apostoles, upod sa iban pa, nagapanglakaton upod kay Jesus sa katapusan nga tion pakadto sa siudad sang Jerusalem. Nasambit sa ila ni Jesus ang tuhoy sa iya Ginharian, gani ginhanduraw ni Santiago kag ni Juan ang paggahom subong mga hari kaupod niya. Ginsugid pa gani nila ini sa ila iloy, nga si Salome. (Mateo 27:56; Marcos 15:40) Gani sang nagapakadto sila sa Jerusalem, nagpalapit si Salome kay Jesus, nagduko sa atubangan niya, kag nangayo sing pabor.

“Ano ang luyag mo?” pamangkot ni Jesus. Nagsabat sia nga luyag niya nga palingkuron ni Jesus ang iya mga anak sa tupad ni Jesus sa iya Ginharian, ang isa sa iya tuo kag ang isa naman sa iya wala. Ti, sang mabalitaan sang napulo pa ka apostoles ang ginpangabay ni Santiago kag ni Juan sa ila iloy nga pangayuon para sa ila, ano sa banta mo ang ginbatyag nila?⁠—

Huo, naakig gid sila kay Santiago kag kay Juan. Gani ginlaygayan ni Jesus ang tanan niya nga mga apostoles. Ginsugiran sila ni Jesus nga ang mga manuggahom sang mga pungsod luyag gid mangin gamhanan kag importante. Luyag nila ang mataas nga posisyon diin ang tanan nagatuman sa ila. Apang ginsingganan ni Jesus ang iya mga sumulunod nga indi sila dapat mangin subong sini. Sa baylo, si Jesus nagsiling: “Kon sin-⁠o man ang luyag mauna sa inyo dapat mangin ulipon ninyo.” Hunahunaa ini!​​—⁠Mateo 20:20-​28.

Nahibaluan mo bala kon ano ang ginahimo sang isa ka ulipon?⁠— Nagaserbe sia sa iban nga mga tawo, amo nga wala sia nagapaabot nga serbehan sia sang iban. Ginapili niya ang pinakamanubo nga duog, indi ang pinakamaayo. Nagapanghikot sia subong ang pinakakubos, indi ang pinakaimportante. Kag dumduma, si Jesus nagsiling nga ang isa nga luyag mangin una dapat mangin ulipon sang iban.

Karon, ano sa banta mo ang kahulugan sini para sa aton?⁠— Makigbais bala ang isa ka ulipon sa iya agalon kon sin-⁠o ang magapungko sa pinakamaayo nga pulungkuan? Ukon makigbais bala sia kon sin-o ang una nga makaon? Ano sa banta mo?⁠— Ginpaathag ni Jesus nga pirme ginauna sang isa ka ulipon ang iya agalon.​​—⁠Lucas 17:​7-​10.

Gani sa baylo nga magtinguha nga mangin una, ano ang dapat naton himuon?⁠— Huo, dapat kita mangin kaangay sang ulipon sa aton pagpakig-angot sa iban. Kag nagakahulugan ini nga unahon naton ang iban. Nagakahulugan ini nga tamdon naton ang iban nga importante sila sangsa aton. Makapamensar ka bala sing mga paagi nga mauna mo ang iban?⁠— Balikan naton ang pahina 40 kag 41 kag tan-awon naton liwat ang pila ka paagi nga mauna naton ang iban paagi sa pagserbe sa ila.

Madumduman mo nga gin-una sang Daku nga Manunudlo ang iban paagi sa pagserbe sa ila. Sang hingapusan nga gab-⁠i nga kaupod niya ang iya mga apostoles, nagluhod pa gani sia kag ginhinawan ang ila mga tiil. Kon unahon man naton ang iban paagi sa pagserbe sa ila, mapahamut-an naton ang Daku nga Manunudlo kag ang iya Amay, nga si Jehova nga Dios.