“Ang Una nga mga Butang Indi Na Pagdumdumon”

MAHIMO kita malipay kon may madumduman kita nga nagligad, pareho sang tinion nga kaupod naton ang aton mga pinalangga. Pero kon kaisa, may mga hitabo nga indi na naton gusto dumdumon. Nasakitan ka man bala kon may madumduman ka nga masubo nga nagligad? Mahimo mamangkot ka, ‘Madula pa ayhan ini sa akon hunahuna?’ Makapaumpaw gid ang ginsiling ni propeta Isaias.—Basaha ang Isaias 65:17.

Katuyuan ni Jehova nga dulaon ang kabangdanan sang masubo nga nagligad. Paano? Laglagon niya ining malauton nga kalibutan lakip ang tanan nga pag-antos kag buslan sang mas maayo nga kahimtangan. Si Jehova nagpromisa paagi kay Isaias: “Yari karon, ako nagatuga sing bag-ong mga langit kag bag-ong duta.” Matigayon naton ang paglaum kon maintiendihan naton ang kahulugan sini nga promisa.

Ano ang bag-ong mga langit? Ang Biblia naghatag sing duha ka ideya para masabat ini. Una, ang bag-ong mga langit ginsambit sang duha pa ka manunulat sang Biblia, kag naangot ini sa daku nga pagbag-o sa duta. (2 Pedro 3:13; Bugna 21:1-4) Ikaduha, sa Biblia ang termino nga “mga langit” mahimo magpatuhoy sa paggahom, ukon gobierno. (Isaias 14:4, 12; Daniel 4:25, 26) Gani, ang bag-ong mga langit isa ka bag-o nga gobierno, nga makapaluntad sang matarong nga kahimtangan sa duta. May isa lamang ka paggahom nga makahimo sini—ang Ginharian sang Dios, ang gobierno sa langit nga gintudlo ni Jesus nga ipangamuyo naton. Himuon sini nga Ginharian ang matarong nga kabubut-on sang Dios sa bilog nga duta.—Mateo 6:9, 10.

Ano ang bag-ong duta? May duha ka kamatuoran sa Biblia nga makabulig sa aton nga mahibaluan ang buot silingon sini. Una, sa Biblia, ang termino nga “duta” nagapatuhoy kon kaisa sa mga tawo, indi sa globo. (Salmo 96:1) Ikaduha, gintagna sang Biblia nga sa paggahom sang Dios, ang matutom nga mga tawo magatuon sing pagkamatarong, nga magalapnag sa bilog nga duta. (Isaias 26:9) Gani ang bag-ong duta nagapatuhoy sa katilingban sang mga tawo nga magapasakop sa paggahom sang Dios kag magakabuhi suno sa iya matarong nga mga prinsipio.

Naintiendihan mo na bala kon paano dulaon ni Jehova ang kabangdanan sang masubo nga nagligad? Sa indi madugay, tumanon sing bug-os ni Jehova ang iya promisa nga bag-ong mga langit kag bag-ong duta, diin magaluntad ang matarong nga bag-ong kalibutan.a Sa sinang bag-ong kalibutan, ang kabangdanan sang pisikal, mental, kag emosyonal nga kasakit madula na. Matigayon sang mga matutom ang perpekto nga kabuhi, kag makalilipay na nga mga butang ang ila dumdumon kada adlaw.

Ano naman ang matabo sa kasakit nga ginabatyag naton subong? Si Jehova nagpromisa paagi kay Isaias: “Ang una nga mga butang indi na pagdumdumon, ukon mag-abut sa painoino.” Ang tanan nga kasakit nga mabatyagan naton sa sini nga kalibutan amat-amat nga madula. Nalipay ka bala sa sini? Kon amo, ngaa indi mo pag-usisaon kon paano ka mangin suod sa Dios nga nagpromisa sining makalilipay nga palaabuton?

Bahin sang Biblia nga mahimo basahon sa Marso:

◼ Isaias 63–Jeremias 16

[Nota]

[Blurb sa pahina 19]

Katuyuan ni Jehova nga dulaon ang kabangdanan sang masubo nga nagligad