Mangin Suod sa Dios
“Ang Akon Kalag . . . Nagaantus sa Sulud Nakon”
ANG pagkamapainubuson makagalanyat. Madali kita magsuod sa mga tawo nga mapainubuson. Pero mabudlay pangitaon sa kalibutan subong ang matuod nga pagkamapainubuson, ilabi na yadtong may awtoridad. Kamusta si Jehova nga Dios, ang pinakagamhanan nga Persona sa uniberso? Mapainubuson bala sia? Usisaon naton ang mga ginhambal ni propeta Jeremias sa Panalambiton 3:20, 21.—Basaha.
Ginsulat ni Jeremias ang Panalambiton sang ara sa mabudlay nga kahimtangan ang Israel. Bag-o lang niya nasaksihan ang hitabo nga nagpasubo gid sa iya, ang kalaglagan sang iya pinalangga nga Jerusalem sa kamot sang Babilonia. Nahibaluan sang nagapangasubo nga propeta nga ang natabo nagakabagay nga paghukom sang Dios sa mga Israelinhon bangod sang ila kasal-anan. Pero nadulaan bala sing paglaum si Jeremias? Nagbatyag bala sia nga tuman kalayo ukon wala nagasapak si Jehova sa mga mahinulsulon kag ginapabay-an na lang sila? Pamatii samtang nagahambal si Jeremias para sa iya katawhan.
Bisan pa nasubuan ang kalabanan, may paglaum si Jeremias. Nagsiling sia parte kay Jehova: “Ang akon kalaga [si Jehova mismo] nagadumdum pa sa ila kag nagaantus sa sulud nakon.” (Bersikulo 20) Wala nagaduhaduha si Jeremias. Nahibaluan niya nga indi sia pagkalimtan ni Jehova, ukon ang mga mahinulsulon Niya nga katawhan. Pero himuon gid bala ini sang labing gamhanan nga Dios?—Bugna 15:3.
Sigurado gid si Jeremias nga si Jehova “nagaantus” sa mga nagahinulsol gid. Ang isa pa ka translation nagasiling: “Dumdumon mo ako kag buligan.” Ini nga mga tinaga nagabulig sa aton nga mahangpan nga si Jehova malulo. Si Jehova, “ang Labing Mataas sa bug-os nga duta,” magabulig kag magabangon sang iya mga sumilimba sa ila makaluluoy nga kahimtangan kag kahamut-an sila. (Salmo 83:18) Bangod sini nga paglaum, nalugpayan gid ang pilason nga tagipusuon ni Jeremias. Determinado ining matutom nga propeta nga maghulat kay Jehova asta nga mag-abot ang tion ni Jehova sa pagluwas sa Iya mahinulsulon nga katawhan.—Bersikulo 21.
Ining mga pulong nga ginsulat ni Jeremias nagatudlo sa aton sang duha ka butang parte kay Jehova. Una, mapainubuson sia. (Salmo 18:35) Bisan pa nga “lakas gid sia sa gahum,” handa sia nga magpaubos sa pagbulig sa aton. (Job 37:23; Salmo 113:5-7) Indi bala nga makapaumpaw gid ini? Ikaduha, maluluy-on si Jehova; “handa [sia] sa pagpatawad” sa mga mahinulsulon kag sa pagbaton sa ila liwat. (Salmo 86:5) Inang duha ka kinaiya, ang pagkamapainubuson kag kaluoy, nagaupdanay.
Nagapasalamat gid kita kay si Jehova indi pareho sa mga tawo nga nagagahom, nga bangod sang ila bugal nangin matig-a ang ila ulo kag wala sing kaluoy! Napahulag ka bala nga magtuon sing dugang pa parte sa mapainubuson nga Dios nga handa sa ‘pagbulig’ para pahalipayon ang ginasubuan niya nga mga sumilimba?
Bahin sang Biblia nga mahimo basahon sa Hunyo:
[Nota]
a Ginbag-o sang mga escriba sang una ini nga bersikulo para magsiling nga ang “akon kalag” daw nagapatuhoy kay Jeremias. Nagapati gid sila nga indi matinahuron ang pagtawag sa Dios nga isa ka kalag, isa ka tinaga nga ginagamit sang Biblia para sa mga tinuga sa duta. Pero ginalaragway pirme sang Biblia ang Dios sa paagi nga mahangpan sang mga tawo. Bangod ang termino nga “kalag” mahimo magakahulugan nga “ang kabuhi nga natigayon naton,” ang dinalan nga “imo kalag” nagakahulugan sing “ikaw.”
[Blurb sa pahina 14]
Handa si Jehova nga magpaubos sa pagbulig sa aton