Teokratiko nga mga Eskwelahan—Pamatuod sang Gugma ni Jehova

SI Jehova ang aton Dakung “manunudlo.” (Isa. 30:20) Ang gugma nagapahulag sa iya nga tudluan kag hanason ang iban. Halimbawa, bangod sa iya tudok nga gugma, ginpakita ni Jehova kay Jesus “ang tanan nga butang nga iya ginahimo.” (Juan 5:20) Bangod man sa iya gugma sa aton, nga iya mga Saksi, ginhatagan niya kita sing “dila sang mga ginaton-an” samtang ginatinguhaan naton nga padunggan sia kag buligan ang iban.—Isa. 50:4.

Bilang pag-ilog sa gugma ni Jehova, ang Teaching Committee sang Nagadumala nga Hubon naggamit sing napulo ka teokratiko nga eskwelahan para hanason ang mga nagahandum kag yara sa kahimtangan nga mag-eskwela. Ginatamod mo bala ini nga mga eskwelahan subong pamatuod sang gugma ni Jehova?

Binagbinaga ang teokratiko nga mga eskwelahan karon kag ang mga komento sang pila nga nakaeskwela sa sini. Dayon pamangkuta ang imo kaugalingon, ‘Paano ako makabenepisyo sa sining pagtudlo gikan sa Dios?’

MAGBENEPISYO SA TEOKRATIKO NGA PAGHANAS

Bilang “Dios sang gugma,” ginahanas kita ni Jehova agod mangin mapuslanon ang aton kabuhi. (2 Cor. 13:11) Nagahanda ini sa aton sa pag-atubang sa mga kabudlayan kag nagabulig nga magmalipayon kita sa ministeryo. Kaangay sang mga disipulo sang unang siglo, nasangkapan kita sing maayo para buligan ang iban, “nga nagapanudlo sa ila nga tumanon ang tanan nga butang” nga ginsugo sa aton.—Mat. 28:20.

Mahimo nga indi kita mahanas sa sining tanan nga eskwelahan, pero makabenepisyo kita sa pila sa sini. Maaplikar naton ang mga pagtudlo nga nabase sa Biblia. Mas mangin epektibo man kita sa ministeryo paagi sa pag-upod sa eksperiensiado nga mga alagad ni Jehova.

Pamangkuta ang imo kaugalingon, ‘Ara bala ako sa kahimtangan sa paglab-ot sang mga kalipikasyon para mahanas sa sini nga mga eskwelahan?’

Isa gid ka pribilehiyo para sa mga sumilimba ni Jehova nga makapakigbahin kag matudluan sa sining mapuslanon nga mga eskwelahan. Kabay pa nga ang paghanas nga imo mabaton makapasuod pa gid sa imo sa Dios kag makabulig para matuman mo ang imo mga responsibilidad sa iya, ilabi na ang hilingagawon nga pagbantala sing maayong balita.

TEOKRATIKO NGA MGA ESKWELAHAN

Teokratikong Eskwelahan Para sa Ministeryo

Katuyuan: Agod hanason ang mga manugbantala nga mangin epektibo sa pagbantala kag pagtudlo sang maayong balita.

Kalawigon: Sigesige.

Lokasyon: Kingdom Hall.

Sin-o ang Puede Magpaenrol: Ang tanan nga nagapakig-upod sing regular sa kongregasyon nga nagaugyon sa mga panudlo sang Biblia kag nagapahisuno sang ila pagkabuhi sa Cristianong mga prinsipio.

Paano Makaaplay: Ginaenrol sang manugtatap sang Teokratikong Eskwelahan Para sa Ministeryo ang mga estudyante.

Si Sharon nga may amyotrophic lateral sclerosis (ALS), nagsiling: “Gintudluan ako sang Teokratikong Eskwelahan Para sa Ministeryo nga mag-research kag mangatarungan sing maayo. Natun-an ko man nga hunahunaon indi lang ang akon espirituwal nga mga kinahanglanon kundi ang iya man sang iban.”

Si Arnie, nga madugay na nga nagalakbay nga manugtatap, nagsiling: “Nagaang-ang ako halin sang bata pa kag nabudlayan magtulok sa mata. Ini nga eskwelahan nagbulig sa akon nga makatigayon sing kompiansa kag magbatyag nga may pulos ako. Ginbuligan ako ni Jehova paagi sini nga paghanas. Gani natun-an ko ang mga pamaagi kon paano makontrol ang akon pagginhawa kag kon paano magkonsentrar. Nagapasalamat gid ako sa ikasarang nga madayaw ang Dios sa kongregasyon kag sa akon ministeryo.”

Bethel Entrants’ School

Katuyuan: Para buligan ang mga bag-uhan sa Bethel nga mangin madinalag-on sa ila pag-alagad.

Kalawigon: 45 minutos kada semana sa sulod sang 16 ka semana.

Lokasyon: Bethel.

Kalipikasyon: Dapat permanente nga miembro sang pamilya Bethel ukon naaprobahan nga temporaryo nga boluntaryo sa Bethel sa sulod sang isa ka tuig ukon kapin pa.

Paano Makapaenrol: Ang bag-o nga mga katapo sang pamilya Bethel awtomatiko nga ginaenrol.

Si Demetrius nga ginhanas sa sini nga eskwelahan sang katuigan 1980, nagsiling: “Ginpauswag sini nga eskwelahan ang akon batasan sang pagtuon kag ginhanda ako para makaalagad sing malawig sa Bethel. Ang mga instruktor, kurikulum, kag praktikal nga mga laygay nagkumbinsi sa akon nga nagaulikid si Jehova kag handum niya nga buligan ako nga magmadinalag-on sa pag-alagad sa Bethel.”

Si Kaitlyn nagsiling: “Ginbuligan ako sini nga hunahunaon pirme ang pinakaimportante, nga amo ang mangin espirituwal nga tawo. Ginpauswag sang Entrants’ School ang akon apresasyon kay Jehova, sa iya balay, kag sa iya organisasyon.”

Kingdom Ministry School

Katuyuan: Agod hanason ang mga nagalakbay nga manugtatap, mga gulang, kag kon kaisa ang mga ministeryal nga alagad sa ila pagdumala kag mga salabton sa organisasyon. (Binu. 20:28) Ginabinagbinag diri ang bag-o nga mga sitwasyon, nagakatabo, kag kinahanglanon sang kongregasyon. Ini nga eskwelahan ginahiwat kada pagligad sang pila ka tuig suno sa desisyon sang Nagadumala nga Hubon.

Kalawigon: Sang nagligad nga mga tinuig, ginahiwat ini sing duha tubtob duha ka adlaw kag tunga para sa mga nagalakbay nga manugtatap, isa ka adlaw kag tunga sa mga gulang, kag isa ka adlaw naman sa mga ministeryal nga alagad.

Lokasyon: Masami sa Kingdom Hall ukon Assembly Hall.

Kalipikasyon: Dapat nagalakbay nga manugtatap, gulang, ukon ministeryal nga alagad.

Paano Makapaenrol: Ang mga gulang kag mga ministeryal nga alagad ginaagda sang manugtatap sang sirkito. Ang mga nagalakbay nga manugtatap naman ginaagda sang sanga talatapan. “Bisan malip-ot lang ini nga eskwelahan, nagapalig-on ini sa mga gulang kag nagabulig sa ila para mahuptan ang ila kalipay kag ‘magpakalalaki’ sa pag-alagad kay Jehova. Ang bag-uhan kag madugay na nga mga gulang makatuon sa pagtatap sing epektibo kag mahiusa ‘sa isa ka painuino.’”—Quinn (sa ubos).

“Ini nga paghanas makapabakod sang aton apresasyon sa espirituwal nga mga butang, nagahatag sing paandam sa mga katalagman, kag nagatudlo sing praktikal nga mga paagi para matatap ang panong. Maayo gid si Jehova kay ginabuligan niya kita.”—Michael.

Pioneer Service School

Katuyuan: Agod buligan ang mga payunir sa ‘pagtuman sing bug-os sang ila ministeryo.’—2 Tim. 4:5.

Kalawigon: Duha ka semana.

Lokasyon: Ginapili sang sanga talatapan; masami sa Kingdom Hall.

Kalipikasyon: Dapat nagaalagad subong regular payunir sa di-magkubos isa ka tuig.a

Paano Makapaenrol: Ang kalipikado nga mga payunir awtomatiko nga ginaenrol kag ginapahibalo sang manugtatap sang sirkito.

“Ini nga eskwelahan nagbulig sa akon nga maatubang ang mga kabudlayan sa ministeryo kag sa akon kabuhi,” siling ni Lily (sa tuo). “Nag-uswag gid ang akon pamaagi sang pagtuon, pagtudlo, kag paggamit sang Biblia. Mas nangin handa ako sa pagbulig sa iban, pagsuporta sa mga gulang, kag sa pagpakigbahin sa pagpauswag sang kongregasyon.”

Si Brenda, nga nakaeskwela sing duha ka beses sa sini nga eskwelahan, nagsiling: “Nakabulig ini sa akon para makapakigbahin sing bug-os sa akon pagsimba, mapabakod ang akon konsiensia, kag magkonsentrar sa pagbulig sa iban. Maalwan gid si Jehova!”

a Kon indi makompleto ang kadamuon sang bag-o nga mga payunir, ang pila ka payunir nga wala makaeskwela sang nagligad nga lima ka tuig mahimo agdahon nga mag-eskwela liwat.

School for Congregation Elders

Katuyuan: Agod buligan ang mga gulang sa pag-atipan sang ila mga responsibilidad sa kongregasyon kag sa pagpabakod sang ila espirituwalidad.

Kalawigon: Lima ka adlaw.

Lokasyon: Ginapili sang sanga talatapan; masami sa Kingdom Hall ukon Assembly Hall.

Kalipikasyon: Dapat gulang.

Paano Makapaenrol: Ang mga gulang ginaagda sang sanga talatapan.

Yari ang mga komento sang pila ka nakaeskwela sa ika-92 nga klase sa Estados Unidos:

“Nakabenepisyo gid ako sa sini nga eskwelahan. Ginbuligan ako sini nga usisaon ang akon kaugalingon kag kon paano atipanon ang panong ni Jehova.”

“Handa na ako nga palig-unon pa gid ang tanan paagi sa pagpadaku sang panguna nga mga punto sa Kasulatan.”

“Tumanon ko gid ang akon natun-an sa bug-os ko nga kabuhi.”

School for Traveling Overseers and Their Wives

Katuyuan: Agod buligan ang mga manugtatap sang sirkito kag distrito nga mangin mas epektibo sa pag-alagad sa mga kongregasyon kag sa ‘pagpangabudlay sing lakas sa paghambal kag pagpanudlo.’—1 Tim. 5:17; 1 Ped. 5:2, 3.

Kalawigon: Duha ka bulan.

Lokasyon: Ginapili sang sanga talatapan.

Kalipikasyon: Dapat manugtatap sang sirkito ukon distrito.

Paano Makapaenrol: Ang mga nagalakbay nga manugtatap kag ang ila asawa ginaagda sang sanga talatapan.

“Napabakod ang amon apresasyon sa pagkaulo ni Jesus sa organisasyon. Natun-an namon nga kinahanglan palig-unon ang mga kauturan nga amon ginaalagaran kag pabakuron ang paghiusa sa tagsa ka kongregasyon. Gintudluan kami sini nga eskwelahan nga bisan pa ang nagalakbay nga manugtatap nagalaygay, ukon nagatadlong pa gani kon kaisa, ang iya panguna nga tulumuron amo nga ipakita sa mga kauturan nga ginahigugma sila ni Jehova.”—Joel, una nga klase, 1999.

Bible School for Single Brothers

Katuyuan: Agod ihanda ang di-minyo nga mga gulang kag ministeryal nga alagad para sa dugang nga responsibilidad sa organisasyon ni Jehova. Ang kalabanan nga gradweyt ginaasayn sa mga lugar sa ila pungsod nga may daku nga kinahanglan. Ang iban mahimo i-asayn sa iban nga pungsod kon ipahibalo nila nga puede sila. Ang iban nga naggradwar mahimo mag-alagad subong temporaryo nga espesyal payunir para buksan kag pasangkaron ang hilikuton sa malayo kag naligwin nga mga lugar.

Kalawigon: Duha ka bulan.

Lokasyon: Ginapili sang sanga talatapan; masami sa Kingdom Hall ukon Assembly Hall.

Kalipikasyon: Di-minyo nga utod nga lalaki nga 23 tubtob 62 anyos. Dapat may maayo nga panglawas kag luyag mag-alagad sa mga lugar diin mas daku ang kinahanglan. (Mar. 10:29, 30) Dapat mga regular payunir sila sing di-magkubos duha ka tuig kag mga gulang ukon ministeryal nga alagad sing di-magkubos duha ka tuig nga wala untat.

Paano Makaaplay: May miting nga ginahiwat sa sirkito nga asembleya para sa mga interesado mag-eskwela.

“Paagi sa pagtuon sing maayo sa sini nga kurso, ang espiritu ni Jehova nagpabag-o gid sa akon,” siling ni Rick sang ika-23 nga klase sa Estados Unidos. “Kon naghatag si Jehova sing asaynment, buligan ka niya sa sina nga asaynment. Natun-an ko nga kon magkonsentrar ako sa paghimo sang kabubut-on sang Dios kag indi sa akon kaugalingon, pabakuron niya ako.”

“Nahangpan ko nga ang pagpanghikot sang organisasyon sang Dios karon pareho sang isa ka milagro,” siling ni Andreas nga nagaalagad sa Germany. “Ang paghanas nakabulig sa akon nga mangin handa sa mga hilikuton sa palaabuton. Natun-an ko man gikan sa madamo nga halimbawa sa Biblia ining importante nga kamatuoran: Ang pag-alagad sa mga kauturan kag kay Jehova nagahatag sing matuod nga kalipay.”

Bible School for Christian Couples

Katuyuan: Agod hatagan ang mga mag-asawa sing pinasahi nga paghanas para magamit sila sing labi pa ni Jehova kag sang iya organisasyon. Ang kalabanan nga gradweyt ginaasayn sa mga lugar sa ila pungsod nga may daku nga kinahanglanon. May pila nga mahimo magbaton sing asaynment sa iban nga pungsod kon ipahibalo nila nga puede sila. Ang iban naman mahimo mag-alagad subong temporaryo nga espesyal payunir para buksan kag pasangkaron ang hilikuton sa malayo kag naligwin nga mga lugar.

Kalawigon: Duha ka bulan.

Lokasyon: Ini nga eskwelahan ginahiwat na sa Estados Unidos, kag sugod sa Septiembre 2012, hiwaton man ini sa mga teritoryo sang pinili nga mga sanga talatapan; masami sa Kingdom Hall ukon Assembly Hall.

Kalipikasyon: Mag-asawa nga 25 tubtob 50 anyos. Dapat may maayo nga panglawas kag yara sa kahimtangan nga makaalagad sa lugar diin mas daku ang kinahanglanon, kag may panimuot nga: “Yari ako! Ipadala ako.” (Isa. 6:8) Dapat duha ka tuig na sila nga asawahay kag nagaalagad sing bug-os tion sing di-magkubos duha ka tuig nga wala untat. Ang bana dapat gulang ukon ministeryal nga alagad sing di-magkubos duha ka tuig nga wala untat.

Paano Makaaplay: May miting nga hiwaton sa distrito nga kombension para sa mga interesado mag-eskwela. Kon luyag ninyo mag-aplay pero wala sing amo sini nga miting sa mga kombension sa inyo pungsod, mahimo kamo magsulat sa sanga talatapan para sa dugang nga impormasyon.

“Ining walo ka semana nga paghanas nagpabag-o gid sang amon kabuhi kag daku ini nga kahigayunan para sa mga mag-asawa nga nagahandum nga mag-alagad sing labi pa! Determinado kami nga mangin balanse sa amon pagkabuhi agod magamit namon sing maalamon ang amon tion.”—Eric kag Corina (sa ubos), una nga klase, 2011.

Watchtower Bible School of Gilead

Katuyuan: Agod hanason ang mga estudyante para mangin misyonero sa mga lugar nga madamo sing pumuluyo, mangin nagalakbay nga manugtatap, ukon Bethelite. Katuyuan sini nga pabakuron ang pagministeryo kag ang pag-organisar sa sanga.

Kalawigon: Lima ka bulan.

Lokasyon: Watchtower Educational Center, Patterson, New York, U.S.A.

Kalipikasyon: Mag-asawa nga yara na sa pinasahi nga bug-os tion nga pag-alagad, pareho sang mga misyonero nga wala pa makaeskwela sa Gilead, espesyal payunir, nagalakbay nga manugtatap, ukon Bethelite. Dapat pareho sila nga tatlo ka tuig na sa sini nga pag-alagad nga wala sing untat. Dapat maayo sila maghambal, magbasa, kag magsulat sing Ingles.

Paano Makaaplay: Ang mga mag-asawa mahimo agdahon sang ila Komite sang Sanga nga mag-aplay.

Sanday Lade kag Monique sang Estados Unidos nagaalagad karon sa Aprika. “Ang Gilead School naghanda sa amon nga magkadto sa bisan diin nga bahin sang kalibutan, batunon ang ano man nga hilikuton, kag magpanghikot upod sa mga kauturan,” siling ni Lade.

Si Monique nagsiling man: “Samtang ginaaplikar ko ang akon natun-an sa Pulong sang Dios, nalipay gid ako sa akon asaynment. Ginakabig ko ini nga dugang nga pamatuod sang gugma ni Jehova.”

School for Branch Committee Members and Their Wives

Katuyuan: Agod buligan ang mga Komite sang Sanga sa pagdumala sang puluy-an Bethel, paghatag sing igtalupangod sa pag-alagad sa mga kongregasyon, kag pagtatap sang sirkito kag distrito. Ginatun-an man nila ang parte sa pagbadbad, pag-imprinta, kag pagpadala sang mga literatura.

Kalawigon: Duha ka bulan.

Lokasyon: Watchtower Educational Center, Patterson, New York, U.S.A.

Kalipikasyon: Dapat miembro sang Komite sang Sanga ukon Komite sang Pungsod ukon inug-asayn sa sina nga katungdanan.

Paano Makapaenrol: Ang mga utod nga lalaki kag ang ila asawa ginaagda sang Nagadumala nga Hubon.

Sanday Lowell kag Cara, sang ika-25 nga klase, nagaalagad sa Nigeria. “Napahanumdom ako nga bisan ano man sa akon kasako ukon ano man nga hilikuton ang ginhatag sa akon, ang sekreto para mapahamut-an si Jehova amo ang espirituwalidad,” siling ni Lowell. “Ginpadaku man sa klase nga importante gid nga ilugon naton si Jehova sa pagpakita sang gugma sa iya mga alagad.”

“May isa ka komento nga ginpamalandungan ko gid,” siling ni Cara. “Kon indi ko mapaathag sing maayo ang isa ka punto, kinahanglan ko ini tun-an sing maayo antes itudlo sa iban.”