Ginahimo Mo Bala ang Imo Masarangan Para Makatuon kay Jehova?

1. Ano ang pagtamod ni Jehova sa pagtudlo?

¹ Luyag sang aton “Daku nga Manunudlo” nga si Jehova nga tudluan kita. (Isa. 30:20, NW) Nagsugod sia sa pagtudlo pagkatapos niya gintuga ang iya panganay nga Anak. (Juan 8:28) Bisan pa nagrebelde si Adan, wala nag-untat si Jehova sa pagtudlo kundi padayon sia nga nagahatag sing mahigugmaon nga instruksion sa di-himpit nga mga tawo.—Isa. 48:17, 18; 2 Tim. 3:14, 15.

2. Anong kampanya sa pagtudlo ang ginahimo sa karon?

² Sa karon, ginatuytuyan ni Jehova ang pinakadaku nga kampanya sa pagtudlo sa kasaysayan. Subong sang gintagna ni Isaias, minilyon sa bug-os nga kalibutan ang nagadugok sa malaragwayon nga “bukid sang balay” ni Jehova. (Isa. 2:2) Ngaa? Agod magpatudlo sa mga dalanon sang Dios, huo, agod matudluan ni Jehova! (Isa. 2:3) Sa 2010 nga tuig sang pag-alagad, ang mga Saksi ni Jehova naghinguyang sing sobra sa 1.6 bilyones ka oras sa pagpanaksi kag pagtudlo sa mga tawo sing kamatuoran sa Biblia. Dugang pa, kada semana may espirituwal nga instruksion nga ginaaman sa sobra sa 105,000 ka kongregasyon sa bug-os nga kalibutan, kag may Cristianong mga publikasyon para sa pagtudlo nga ginaaman ang matutom kag mainandamon nga ulipon sa sobra sa 500 ka lenguahe.

3. Paano ka personal nga nakabenepisyo sa pagtudlo ni Jehova?

³ Manginpulos sing Bug-os: Nakabenepisyo gid kita sa pagtudlo sang Dios! Natun-an naton nga may ngalan ang Dios kag nagaulikid sia sa aton. (Sal. 83:18; 1 Ped. 5:6, 7) Natun-an naton ang mga sabat sa pinakaimportante nga mga pamangkot sa kabuhi subong sang: Ngaa nagaantos kag nagakapatay ang mga tawo? Paano ko masapwan ang matuod nga kalipay? Ano ang katuyuan sang kabuhi? Si Jehova naghatag man sa aton sing panuytoy sa moral agod mangin madinalag-on ang aton dalanon.—Jos. 1:8.

4. Ano ang pila ka kahigayunan nga matudluan ang mga alagad sang Dios karon, kag ngaa dapat naton himuon ang aton masarangan para makatuon kay Jehova?

⁴ Wala labot sa sini, nagaaman si Jehova sing pinasahi nga pagtudlo agod buligan ang pila nga mapasangkad ang ila pag-alagad. Makita sa pahina 4-6 ang mga kahigayunan nga mahimo matigayon sang pila. Bisan pa ang pila sa sini indi puede sa aton kahimtangan, ginapanginpuslan bala naton ang pagtudlo sang Dios nga sarang naton matigayon? Ang aton mga pamatan-on masami ginasugyot sang ila mga maestra kag sang iban nga magkuha sing mataas nga edukasyon sa kalibutan. Ginapalig-on bala naton sila nga magpahamtang sing espirituwal nga mga tulumuron kag magkuha sing pinakamataas nga edukasyon halin sa Dios? Kon ginahimo naton ang aton masarangan para makatuon kay Jehova, buligan niya kita nga mangin malipayon sa karon kag sa walay katubtuban.—Sal. 119:105; Juan 17:3.

Ang Pila ka Kahigayunan nga Matudluan sang Organisasyon ni Jehova

Literacy Class

• Katuyuan: Agod tudluan ang mga tawo kon paano magbasa kag magsulat para matun-an nila ang Biblia kag matudlo ang kamatuoran sa iban.

• Kalawigon: Suno sa kinahanglanon.

• Lokasyon: Lokal nga Kingdom Hall.

• Sin-o ang Puede Makatambong: Tanan nga manugbantala kag interesado.

• Paano Makaaplay: Nagaorganisar ang mga gulang sang kongregasyon sing literacy class suno sa lokal nga kinahanglanon kag ginapalig-on nila sa pagtambong ang tanan nga mahimo makabenepisyo.

Teokratikong Eskwelahan Para sa Ministeryo

• Katuyuan: Agod hanason ang mga manugbantala nga mangin epektibo sa pagbantala kag pagtudlo sang maayong balita.

• Kalawigon: Sigesige.

• Lokasyon: Lokal nga Kingdom Hall.

• Sin-o ang Puede Magpaenrol: Tanan nga manugbantala. Subong man ang iban nga aktibo nga nagapakig-upod sa kongregasyon nga nagaugyon sa mga panudlo sang Biblia kag nagapahisuno sang ila pagkabuhi sa Cristianong mga prinsipio.

• Paano Makaaplay: Makighambal sa manugtatap sang Teokratikong Eskwelahan Para sa Ministeryo.

Foreign-Language Class

• Katuyuan: Agod tudluan ang mga manugbantala kon paano magbantala sing maayong balita sa iban nga lenguahe.

• Kalawigon: Apat ukon lima ka bulan. Masami nga ginahiwat ang klase sing isa ukon duha ka oras kada Sabado sang aga.

• Lokasyon: Masami nga ginahiwat sa malapit nga Kingdom Hall.

• Sin-o ang Puede Magpaenrol: Mga manugbantala nga may maayo nga tindog nga luyag magbantala sa isa ka dumuluong nga lenguahe.

• Paano Makaaplay: Ang sanga talatapan ang nagahimo sing kahimusan para sa sini nga klase suno sa kinahanglanon.

Kingdom Hall Construction

• Katuyuan: Agod magtukod kag mag-renovate sang mga Kingdom Hall. Indi ini eskwelahan, pero ang mga boluntaryo nagatuon sing lainlain nga skill agod makabulig sa pagpanukod.

• Kalawigon: Suno sa kahimtangan sang boluntaryo.

• Lokasyon: Bisan diin sa gin-asayn nga lugar sang Regional Office sang Kingdom Hall Construction Desk. Ang pila ka boluntaryo mahimo man agdahon sa pagbulig sa relief work sa mas malayo nga lugar nga nahalitan sang kalamidad.

• Kalipikasyon: Bawtismado nga mga utod nga lalaki kag babayi nga gin-aprobahan sang hubon sang mga gulang, may skill man ukon wala.

• Paano Makaaplay: Magpil-ap sang Application for Kingdom Hall Construction Volunteer Program (A-25) form nga ginahatag sang manugtatap sang sirkito ukon mahimo pangabayon sa sanga talatapan.

Pioneer Service School

• Katuyuan: Agod buligan ang mga payunir sa ‘pagtuman sing bug-os sang ila ministeryo.’—2 Tim. 4:5.

• Kalawigon: Duha ka semana.

• Lokasyon: Ginapili sang sanga talatapan; masami sa malapit nga Kingdom Hall.

• Kalipikasyon: Dapat nag-alagad subong regular payunir sa di-magkubos sa isa ka tuig.

• Paano Makapaenrol: Ang kalipikado nga mga payunir awtomatiko nga ginaenrol kag ginapahibalo sang manugtatap sang sirkito.

Bethel Entrants’ School

• Katuyuan: Ini nga eskwelahan gindesinyo agod buligan ang mga bag-uhan sa Bethel nga mangin madinalag-on sa ila pag-alagad.

• Kalawigon: Isa ka oras kada semana sa sulod sang disiseis ka semana.

• Lokasyon: Bethel.

• Kalipikasyon: Dapat permanente nga miembro sang pamilya Bethel ukon madugay na nga temporaryo nga boluntaryo (isa ka tuig ukon kapin pa).

• Paano Makapaenrol: Ang kalipikado nga mga katapo sang pamilya Bethel awtomatiko nga ginaenrol.

Kingdom Ministry School

• Katuyuan: Agod hanason ang mga gulang kag ministeryal nga alagad sa ila pagdumala kag sa ila organisasyonal nga mga salabton. (Binu. 20:28) Ini nga eskwelahan ginahiwat kada pagligad sang pila ka tuig suno sa desisyon sang Nagadumala nga Hubon.

• Kalawigon: Sang nagligad nga mga tinuig, ginahiwat ini sing isa kag tunga ka adlaw para sa mga gulang kag isa ka adlaw naman sa ministeryal nga mga alagad.

• Lokasyon: Sa masami sa malapit nga Kingdom Hall ukon Assembly Hall.

• Kalipikasyon: Dapat gulang ukon ministeryal nga alagad.

• Paano Makapaenrol: Ang kalipikado nga mga gulang kag ministeryal nga alagad ginaagda sang manugtatap sang sirkito.

School for Congregation Eldersa

• Katuyuan: Agod buligan ang mga gulang sa pag-atipan sang ila mga responsibilidad sa kongregasyon.

• Kalawigon: Lima ka adlaw.

• Lokasyon: Ginapili sang sanga talatapan; masami nga ginahiwat sa malapit nga Kingdom Hall ukon Assembly Hall.

• Kalipikasyon: Dapat gulang.

• Paano Makapaenrol: Ang kalipikado nga mga gulang ginaagda sang sanga talatapan.

School for Traveling Overseers and Their Wivesb

• Katuyuan: Agod buligan ang mga manugtatap sang sirkito kag distrito nga mangin mas epektibo sa pag-alagad sa mga kongregasyon kag sa ‘pagpangabudlay sing lakas sa paghambal kag pagpanudlo’ kag sa pagtatap sang mga gintugyan sa ila.—1 Tim. 5:17; 1 Ped. 5:2, 3.

• Kalawigon: Duha ka bulan.

• Lokasyon: Ginapili sang sanga talatapan.

• Kalipikasyon: Dapat manugtatap sang sirkito ukon distrito.

• Paano Makapaenrol: Ang kalipikado nga mga nagalakbay nga manugtatap kag ang ila asawa ginaagda sang sanga talatapan.

Bible School for Single Brothersc

• Katuyuan: Agod ihanda ang di-minyo nga mga gulang kag ministeryal nga alagad para sa dugang pa nga responsibilidad. Ang kalabanan nga gradweyt ginaasayn sa lugar nga may daku nga kinahanglan sa ila pungsod. May pila nga mahimo magbaton sing asaynment sa iban nga pungsod kon ipahibalo nila nga puede sila.

• Kalawigon: Duha ka bulan.

• Lokasyon: Ginapili sang sanga talatapan; masami nga ginahiwat sa malapit nga Assembly Hall ukon Kingdom Hall.

• Kalipikasyon: Di-minyo nga utod nga lalaki nga 23 tubtob 62 anyos. Dapat may maayo nga panglawas kag luyag mag-alagad sa mga kauturan kag magpasangkad sang intereses sang Ginharian sa lugar diin mas daku ang kinahanglan. (Mar. 10:29, 30) Dapat nakaalagad sila nga may katungdanan sing duha ka tuig nga wala untat.

• Paano Makaaplay: Kon may amo sini nga eskwelahan sa inyo pungsod, may miting nga ginahiwat sa sirkito nga asembleya para sa mga interesado mag-eskwela. Ang dugang nga impormasyon ihatag sa sini nga miting.

Bible School for Christian Couplesd

• Katuyuan: Agod hatagan ang mga mag-asawa sing pinasahi nga paghanas para magamit sing labi pa ni Jehova kag sang iya organisasyon. Ang kalabanan nga gradweyt ginaasayn sa lugar nga may daku nga kinahanglan sa ila pungsod. May pila nga mahimo magbaton sing asaynment sa iban nga pungsod kon ipahibalo nila nga puede sila.

• Kalawigon: Duha ka bulan.

• Lokasyon: Ang una nga mga klase ginahiwat sa Watchtower Educational Center sa Patterson, New York, U.S.A. Pagkatapos, hiwaton ini sa mga lugar nga pilion sang sanga talatapan, ayhan sa Assembly Hall ukon Kingdom Hall.

• Kalipikasyon: Mag-asawa nga 25 tubtob 50 anyos. Dapat may maayo nga panglawas kag yara sa kahimtangan nga makaalagad sa lugar diin mas daku ang kinahanglan kag may panimuot nga: “Yari ako! Ipadala ako.” (Isa. 6:8) Dapat duha ka tuig na sila nga asawahay kag nagaalagad sing bug-os tion sing duha ka tuig nga wala untat.

• Paano Makaaplay: Kon may amo sini nga eskwelahan sa inyo pungsod, may miting nga ginahiwat sa adlaw sang pinasahi nga asembleya para sa mga interesado mag-eskwela. Ang dugang nga impormasyon ihatag sa sini nga miting.

Watchtower Bible School of Gilead

• Katuyuan: Agod hanason ang mga payunir kag iban pa nga bug-os tion nga alagad para mangin misyonero.

• Kalawigon: Lima ka bulan.

• Lokasyon: Watchtower Educational Center, Patterson, New York, U.S.A.

• Kalipikasyon: Mag-asawa nga tatlo ka tuig na nga bawtismado kag 21 tubtob 38 ang edad sang ginpasa nila ang ila una nga aplikasyon. Dapat makahibalo maghambal sing Ingles, duha ka tuig na nga asawahay, kag nagaalagad sing bug-os tion sing duha ka tuig nga wala untat. Ang mga aplikante dapat maayo ang panglawas. Mahimo man mag-aplay ang mga payunir nga nagaalagad sa iban nga pungsod (lakip na ang mga misyonero); nagalakbay nga manugtatap; Bethelite; kag mga naggradweyt sa Ministerial Training School, Bible School for Single Brothers, kag Bible School for Christian Couples kon nalab-ot nila ang mga kalipikasyon.

• Paano Makaaplay: Sa pila ka sanga, may miting nga ginahiwat sa distrito nga kombension para sa mga interesado mag-eskwela. Ang dugang nga impormasyon ihatag sa sini nga miting. Kon luyag mo mag-aplay apang wala sing miting nga ginahiwat sa mga kombension sa inyo lugar, mahimo ka magsulat sa sanga talatapan para sa dugang nga impormasyon.

School for Branch Committee Members and Their Wives

• Katuyuan: Agod buligan ang mga Komite sang Sanga sa pag-atipan sing maayo sa pagdumala sang puluy-an Bethel, paghatag sing igtalupangod sa pag-alagad sang mga kongregasyon, kag pagtatap sang sirkito kag distrito nga ila sakop, subong man sa pagbadbad, pag-imprinta, pagpadala sang mga literatura, kag pagdumala sang lainlain nga departamento.—Luc. 12:48b.

• Kalawigon: Duha ka bulan.

• Lokasyon: Watchtower Educational Center, Patterson, New York, U.S.A.

• Kalipikasyon: Komite sang Sanga ukon miembro sang Komite sang Pungsod ukon inug-asayn sa sina nga katungdanan.

• Paano Makapaenrol: Ang kalipikado nga mga utod nga lalaki kag ang ila asawa ginaagda sang Nagadumala nga Hubon.

[Mga Nota]