Ngaa Padayon nga Nagaluntad ang Korapsion?
“Ang isa ka tawo may gahum sa isa sa iya kasamaran.”—MANUGWALI 8:9.
INA nga pulong maathag nga nagalaragway sa paggahom sang mga tawo. Amo ini ang kabangdanan sang pag-antos kag kasubo. Halin pa sang una, padayon nga ginaupangan sang kakagod kag korapsion ang mga tawo nga may maayo nga katuyuan sa pagpaluntad sang isa ka matadlong nga sosiedad. Ngaa ayhan? Kag ngaa padayon nga nagaluntad ang korapsion? Bangod sa masunod nga tatlo ka malain nga impluwensia.
1. Ang impluwensia sang sala.
Ang Biblia maathag nga nagasiling nga ang tanan yara sa “idalom sang sala.” (Roma 3:9) Pareho sang napanubli nga malala nga balatian, ang sala “nagapuyo,” sa tunga sang katawhan. Sa sulod sang linibo ka tuig, “naggahom” ini sa mga tawo pareho sang isa ka hari. Ang “kasuguan” sini padayon nga nagaimpluwensia sa aton. Ang makasasala nga huyog nagapahulag sa madamo nga unahon ang ila luyag ukon isentro ang ila pagkabuhi sa pagtigayon sang materyal nga pagkabutang ukon gahom bisan pa mahalitan ang iban.—Roma 5:21; 7:17, 20, 23, 25.
2. Ang impluwensia sang malaut nga kalibutan nga aton ginaistaran.
Lapnag sa kalibutan ang kakagod kag pagkamaiyaiyahon. Bangod sini, nabudlayan ang iban nga mangin tuhay. Madamo ang nangin uhaw sa gahom bangod sang ila makagod nga ambisyon. Mabaskog man ang ila handum nga makatigayon sang madamo nga kuarta kag pagkabutang nga sobra sangsa ila kinahanglanon. Makapasubo nga handa sila magpangdaya para makuha lang ang ila ginahandum. Sa baylo nga batuan ining malain nga mga impluwensia, ini nga mga tawo ‘nagasunod sa kadam-an sa paghimo sing malaut.’—Exodo 23:2.
3. Ang impluwensia ni Satanas nga Yawa.
Si Satanas, nga isa ka rebelyuso nga espiritu, amo ang “nagapatalang sa bug-os napuy-an nga duta.” (Bugna 12:9) Ginapanikasugan niya nga kontrolon ang mga tawo. Mahimo niya hingalitan sing malimbungon ang handum sang isa sa materyal nga kasulhayan kag pinansial nga kaayuhan asta sa punto nga magdinaya na ini.
Nagakahulugan bala ina nga daw mga kikokiko lang kita sa mga kamot ni Satanas—nga obligado kita nga magsunod sa iya mga luyag? Mahibaluan naton ang sabat sa masunod nga artikulo.