Ang Ila Rason sa Pagsaulog sang Krismas
“Masako ang tanan kon Krismas. Madamo sing dapat himuon amo nga daw wala ka na sing tion sa imo pamilya kag mga abyan. Gani sa baylo nga makahatag sing kalipay, nangin kabangdanan pa ini kon kaisa sang stress.”—BRAD HENRY, ANAY GOBERNADOR SANG OKLAHOMA [U.S.A.], DISIEMBRE 23, 2008.
SAMTANG nagahilapit ang Krismas, ginapalangkag pa gid sang mga musika, pelikula, kag mga programa sa TV ang mga tawo sa pagsaulog sini. Ano sa banta mo ang pinakaimportante nga rason sa pagsaulog sang Krismas?
Pagdumdom bala kay Jesucristo?
Pagpakita sing kaalwan?
Pagbulig sa mga imol?
Pag-updanay sang pamilya?
Pagpasanyog sang paghidait?
Pareho sa ginsiling ni anay Gobernador Henry, madamo ang nabudlayan nga himuon ini nga mga butang sa tion sang Krismas. Ginahimo sang mga tawo nga negosyo ang Krismas kag masami nga masako sila kag gina-stress. Mabudlay gid man bala nga mangin malipayon kag mabatyagan ang gugma nga amo kuntani ang rason sang iban sa pagsaulog sang Krismas?
Ginapalig-on kita sang Biblia nga dumdumon si Jesucristo, mangin maalwan, magbulig sa mga imol, kag hatagan sing tion ang aton pamilya. Ginatudluan man kita sini nga mangin mahidaiton. Gani, sa baylo nga ipaathag kon ngaa wala nagasaulog ang iban sang Krismas,a binagbinagon sang masunod nga mga artikulo ini nga mga pamangkot:
Ano ang rason sang iban sa pagsaulog sang Krismas?
Ngaa nabudlayan ang iban nga mangin malipayon kag makabatyag sang gugma sa tion sang Krismas?
Ano nga mga prinsipio sa Biblia ang nakabulig sa minilyon nga makita ang butang nga mas maayo pa sangsa Krismas?
a Para mahibaluan mo ang mga rason base sa Biblia kon ngaa wala nagasaulog ang iban sang Krismas, basaha ang artikulo nga “Pamangkot sang mga Bumalasa—Ngaa ang Iban Wala Nagasaulog sang Krismas?”