SABAT SA MGA PAMANGKOT SA BIBLIA

Diin naghalin ang Yawa?

Wala gintuga sang Dios ang Yawa. Sa baylo, ang isa ka anghel nga gintuga Niya nangin Yawa sang ulihi, kag kilala man nga Satanas. Si Jesus nagsiling nga sadto ang Yawa indi pa butigon kag wala sing sala. Gani sang una, ang Yawa isa ka matarong nga anghel nga anak sang Dios.—Basaha ang Juan 8:44.

Paano nangin Yawa ang isa ka anghel?

Ginpili sang anghel nga nangin Yawa nga pamatukan ang Dios kag ginsulay niya ang una nga mag-asawa nga magbuylog sa iya. Gani ginhimo niya ang iya kaugalingon nga Satanas, nga nagakahulugan sing “Manugpamatok.”—Basaha ang Genesis 3:1-5; Bugna 12:9.

Pareho sa iban nga maalam nga tinuga sang Dios, ang anghel nga nangin Yawa may kahilwayan sa pagpili sang maayo kag malain, pero naghandum sia nga simbahon. Ang iya handum nga himayaon sia mas mabaskog sangsa iya handum nga pahamut-an ang Dios.—Basaha ang Mateo 4:8, 9; Santiago 1:13, 14.

Paano padayon nga ginaimpluwensiahan sang Yawa ang mga tawo? Dapat ka bala mahadlok sa iya? Makita mo ang sabat parte sa sini sa Biblia.