“Tan-awa ang Laragway!”

Pila ka beses mo bala ini nga nasiling sa imo kaugalingon ukon sa iban samtang ginatan-aw mo ang bag-o nga isyu sini nga magasin? May katuyuan ining manami nga mga piktyur ukon laragway nga ginpangabudlayan sa paghimo. Ginagamit ini sa pagtudlo para mabuligan kita nga maghunahuna kag magtuo, ilabi na kon nagahanda kita kag nagakomento sa Pagtinuon sa Ang Lalantawan.

Halimbawa, hunahunaa kon ngaa ang una nga laragway sa tagsa ka tulun-an nga artikulo amo ang ginpili para sa sina nga artikulo. Ano ang ginatudlo sini? Paano ini naangot sa tig-ulo sang artikulo ukon sa tema nga teksto? Sa tagsa ka laragway, hunahunaa kon paano ini naangot sa topiko nga ginabinagbinag kag sa imo kabuhi.

Mahimo hatagan sing kahigayunan sang konduktor sa Pagtinuon sa Ang Lalantawan ang kongregasyon nga makakomento sa tagsa ka laragway para mapadaku kon paano ini naaplikar sa ginatun-an ukon ano ang epekto sini sa ila kabuhi. Kon kaisa, makita sa kapsion kon sa diin nga parapo ginabinagbinag ang laragway. May tion naman nga mahimo magdesisyon ang konduktor kon sa diin nga parapo mas maayo nga binagbinagon ang tagsa ka laragway. Paagi sini, ang tanan makabenepisyo sing bug-os sa mga laragway nga magabulig sa ila nga mahanduraw ang mga leksion sa Pulong sang Dios.

Ang isa ka brother nagsiling, “Pagkatapos ko mabasa ang isa ka matahom nga artikulo, ang mga laragway daw icing sa keyk.”