Ngaa Dapat Ka Mangin Interesado sa Biblia?

Ang Biblia amo subong ang pinakapopular nga libro sa bilog nga kalibutan. Ngaa? Una, bangod mahapos ini makaapektar sa isa. Nagaunod ini sang matuod nga kasaysayan sang mga tawo kag kon paano sila nagpakig-angot sa isa kag isa kag sa Dios. Ini nga mga kasaysayan nagatudlo sa aton sang praktikal nga mga leksion paagi sa simple kag prangka nga mga tinaga nga mabadbad sa ginatos ka lenguahe kag mahangpan bisan diin kag bisan san-o. Kag pirme gid epektibo ang mga prinsipio sini.

Ang pinakaimportante nga rason amo nga ang Biblia nagapangangkon nga indi lamang ini libro parte sa Dios kundi naghalin mismo ini sa Dios. Ginasugid sini ang ngalan sang Dios, ang iya kinaiya, kag ang iya wala nagabag-o nga katuyuan sa pagtuga sang duta kag tawo. Ginasugid man sini ang madugay na nga pagsumpunganay sang maayo kag malaut: isa ka makawiwili nga istorya nga may makalilipay nga katapusan. Gani, makatigayon ang isa sing pagtuo kag paglaum kon basahon niya ini nga may bukas nga panghunahuna.

Masapwan naton sa Biblia ang mga impormasyon nga indi matigayon bisan diin. Halimbawa, ginasugiran kita sini sang kamatuoran parte sa masunod nga topiko:

• Ang aton ginhalinan kag kon ngaa nagaantos kita

• Ang ginhimo sang Dios para maluwas ang mga tawo

• Ang ginhimo ni Jesus para sa aton

• Ang palaabuton sang duta kag mga tawo

Ginapangabay ka namon nga basahon ang masunod nga mga pahina kag hibalua ang mensahe sang Biblia.