Ngaa Dapat Tun-an ang Biblia?

Napamangkot mo na bala ini? Kon amo, isa ikaw sa madamo nga tawo sa bilog nga kalibutan nga nagahunahuna sining importante nga mga pamangkot. Makakita ka bala sing mga sabat sa sini?

Minilyon ka tawo ang magasabat sing “Huo!” Ngaa? Bangod nasapwan nila ang makapakumbinsi nga mga sabat sa Biblia. Luyag mo bala mahibaluan kon ano ang ginasiling sang Biblia? Kon amo, mahimo ka mabuligan sang wala bayad nga pagtuon sa Biblia nga ginatanyag sang mga Saksi ni Jehova.a

Kon parte gani sa pagbasa sing Biblia, ang iban nagasiling: “Masako gid ako.” “Mabudlay gid ini.” “Indi ko luyag nga ginaobligar ako.” Apang tuhay naman ang pagtamod sang iban. Ginakalitan nila ang kahigayunan nga matun-an ang ginatudlo sang Biblia. Yari ang pila ka halimbawa:

• “Nagasimba ako sa simbahan sang Katoliko kag Protestante, sa templo sang Sikh, sa monasteryo sang Budhista, kag nag-eskwela ako sing teolohiya sa unibersidad. Apang wala masabat ang madamo sang akon mga pamangkot parte sa Dios. Dayon may isa ka Saksi ni Jehova nga nagduaw sa balay. Nagdayaw ako sa mga sabat niya nga base gid sa Biblia, gani nagpasugot ako nga magtuon sing Biblia.”—Gill, England.

• “Madamo ako sing pamangkot parte sa kabuhi, pero indi ako kontento sa mga sabat sang pastor sang amon simbahan. Apang ginsabat sang isa ka Saksi ni Jehova ang akon mga pamangkot, kag gingamit gid niya ang Biblia. Sang ginpamangkot niya ako kon luyag ko magtuon sing dugang pa, ginbaton ko ini dayon.”—Koffi, Benin.

• “Luyag ko mahibaluan ang kahimtangan sang mga patay. Nagapati ako nga mahalitan sang mga patay ang mga buhi, apang luyag ko mahibaluan kon ano ang ginasiling sang Biblia. Gani nagtuon ako sing Biblia sa akon amigo nga isa ka Saksi.”—José, Brazil.

• “Gintilawan ko nga basahon ang Biblia apang indi ko ini mahangpan. Dayon may nagduaw sa akon nga isa ka Saksi ni Jehova kag ginpaathag niya ang pila ka tagna sa Biblia. Luyag ko mahibaluan kon ano pa ang akon matun-an.”—Dennize, Mexico.

• “Nagahunahuna ako kon bala nagaulikid gid ang Dios sa akon. Gani nangamuyo ako sa Dios sang Biblia. Pagkadason nga adlaw nanuktok ang mga Saksi sa akon balay, kag ginbaton ko ang pagtuon sing Biblia.”—Anju, Nepal.

Ini nga mga eksperiensia nagapahanumdom sa aton sang ginsiling ni Jesus: “Malipayon ang mga mahunahunaon sa ila espirituwal nga kinahanglanon.” (Mateo 5:3) Duna gid nga kinahanglan sang mga tawo nga kilalahon ang Dios. Ang Dios lang ang makapuno sina nga kinahanglanon, kag ginahimo niya ini paagi sa iya Pulong, ang Biblia.

Gani, ano ang nadalahig sa pagtuon sing Biblia? Paano ka makabenepisyo sa sini? Ini nga mga pamangkot sabton sang masunod nga artikulo.