SABAT SA MGA PAMANGKOT SA BIBLIA
May paglaum pa bala ang mga patay?
Ang kamatayon pareho sa pagtulog bangod ang patay wala sing nahibaluan kag mahimo. Pero, puede sila banhawon sang Manunuga sang kabuhi. Bilang pamatuod, ginhatagan sang Dios sing gahom si Jesus nga banhawon ang pila ka tawo.—Basaha ang Manugwali 9:5; Juan 11:11, 43, 44.
Ngaa pareho sa pagtulog ang kamatayon?
Nagsaad ang Dios nga ang mga patay nga yara sa iya memorya pagabanhawon sa isa ka matarong nga bag-o nga kalibutan. Ang mga banhawon dapat nagapabilin nga patay asta nga hatagan sila liwat sang Dios sang kabuhi. Handum sang Labing Gamhanan nga Dios nga gamiton ang iya gahom agod ibalik sa ila ang ila kabuhi.—Basaha ang Job 14:14, 15.
Ano ang kahimtangan sang mga pagabanhawon?
Kon banhawon sang Dios ang mga tawo, makilala nila ang ila kaugalingon, ang ila mga abyan, kag ang ila pamilya. Bisan pa nadunot na ang lawas sina nga tawo, banhawon sia sang Dios nga may bag-o nga lawas.—Basaha ang 1 Corinto 15:35, 38.
Diutay lang ang banhawon nga makadto sa langit. (Bugna 20:6) Madamo sa banhawon ang magapuyo sa ginpasag-uli nga paraiso sa duta. Mahimo na liwat mabuhi ang tawo sing wala katapusan.—Basaha ang Salmo 37:29; Binuhatan 24:15.