TOPIKO SA KOBER | PUEDE KA BALA MANGIN SUOD SA DIOS?
Wala Na sing Maayo Pa nga Kabuhi
Ano ang imo himuon para mangin suod sa Dios? Binagbinaga ang masunod nga mga paagi agod mapalambo mo ang suod nga kaangtanan sa iya:
Kilalaha kag gamita ang ngalan sang Dios, si Jehova.
Makig-istorya sa iya paagi sa pangamuyo kag pagtuon sa iya Pulong, ang Biblia.
Tinguhai nga himuon ang nahamut-an ni Jehova.
Mangin suod sa Dios paagi sa paggamit sang iya ngalan, pagpangamuyo sa iya, pagtuon sa iya Pulong, kag paghimo sang nahamut-an niya
Base sa sini, makasiling ka bala nga ginahimo mo ang kinahanglanon para mangin suod sa Dios? May mga palauswagon ka pa bala? Pat-od gid nga kinahanglan ang panikasog, pero talupangda ang mangin resulta sini.
“Makalilipay gid ang pagpanikasog nga mapalambo ang suod nga kaangtanan sa Dios,” siling ni Jennifer, nga taga-Estados Unidos. “Ini nga kaangtanan nagadala sang madamo nga pagpakamaayo: mas malig-on nga pagsalig sa Dios, mas madalom nga paghangop sa iya personalidad, pero labi sa tanan, mas hanuot nga gugma sa iya. Wala na sing maayo pa nga kabuhi!”
Kon luyag mo nga mangin suod sa Dios, ang mga Saksi ni Jehova malipay sa pagbulig sa imo. Mahimo sila maghiwat sang pagtuon sa Biblia upod sa imo sing libre. Ginaagda ka man nga magtambong sa ila pagtilipon sa Kingdom Hall sa inyo lugar kay masadyahan ka sa pagpakig-upod sa mga nagapabalor sang ila kaangtanan sa Dios.a Sa paghimo sini mabatyagan mo ang nabatyagan sang salmista sang nagsiling sia: “Maayo sa akon nga magpalapit sa Dios.”—Salmo 73:28.
a Kon gusto mo magtuon sa Biblia ukon makita ang Kingdom Hall nga malapit sa inyo, istoryaha ang naghatag sa imo sini nga magasin ukon kadtui ang amon Web site nga www.jw.org/hil, kag tan-awa ang KONTAKA KAMI sa ubos sang pahina.