TOPIKO SA KOBER | SIN-O ANG MGA SAKSI NI JEHOVA?
Ngaa Nagabantala Kami?
Nakilala gid kami sa amon lapnag nga pagbantala—sa pamalaybalay, sa publiko nga mga lugar, kag bisan diin nga may tawo. Ngaa ginahimo namon ini?
Nagabantala ang mga Saksi ni Jehova agod himayaon ang Dios kag ipakilala ang iya ngalan. (Hebreo 13:15) Gusto namon tumanon si Cristo Jesus, nga nagsugo: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. . . . Tudlui ninyo sila nga tumanon ang tanan nga ginsugo ko sa inyo.”—Mateo 28:19, 20.
Isa pa, ginahigugma namon ang amon isigkatawo. (Mateo 22:39) Siempre, nahibaluan namon nga ang kalabanan nga tawo may kaugalingon nga relihion kag indi tanan interesado sa amon mensahe. Apang nagapati kami nga makaluwas sang kabuhi ang mga panudlo sang Biblia. Gani nagapadayon kami kag ‘wala nagauntat sa pagpanudlo kag sa pagbantala sing maayong balita tuhoy sa Cristo,’ subong sang ginhimo sang mga Cristiano sang unang siglo.—Binuhatan 5:41, 42.
Ang sosyologo nga si Antonio Cova Maduro nagsulat tuhoy sa “panikasog kag kabudlayan nga ginaatubang sang mga Saksi ni Jehova, bisan ginakapoy sila . . . , agod ang sagrado nga pulong makalab-ot sa pinakamalayo nga bahin sang duta.”—El Universal nga pamantalaan, Venezuela
Kalabanan nga nagabasa sang amon mga literatura indi mga Saksi ni Jehova. Kag ang minilyon nga ginatun-an namon sa Biblia miembro sang iban nga relihion. Pero nalipay sila nga nagbisita sa ila ang mga Saksi ni Jehova.
Mahimo nga may mga pamangkot ka pa parte sa mga Saksi ni Jehova. Ginaagda ka namon nga hibaluon ang sabat paagi sa
Pagpamangkot sa mga Saksi ni Jehova.
Pagkadto sa amon website nga www.jw.org/hil.
Pagtambong sa amon mga pagtilipon nga wala sing bayad kag bukas para sa tanan.