“Ang Tawo nga Mapinatihon, Nagapati sa Bisan Ano nga Mabatian Niya”

KON sang nagligad nga sobra 200 ka tuig indi tanan nga mabasahan sa pamantalaan ang masaligan, amo man sini sa kalabanan nga mabasa sa Internet sa ika-21 nga siglo. Matigayon na subong ang madamo gid nga impormasyon—matuod kag indi, mapuslanon kag wala pulos, maayo kag makahalalit—bangod sang moderno nga teknolohiya. Dapat gid naton pilion ang aton basahon. Ang mga bag-o pa lang nagagamit sang Internet mahimo magsiling nga matuod ang isa ka report ukon balita, bisan pa tumalagsahon ini ukon daw indi mapatihan, bangod lamang mabasa ini sa Internet ukon ginpadala ini sang isa ka abyan sa e-mail. Gani, nagapaandam ang Biblia: “Ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.”—Hulu. 14:15.

Paano kita mangin “maalamon” para mahibaluan kon pangdaya, indi matuod nga istorya, pagpanunto, kag sala nga impormasyon ang makita naton sa aton kompyuter? Mamangkot anay: ‘Naghalin bala ini sa isa ka opisyal kag masaligan nga website ukon sa blog ukon indi mahibaluan ang ginhalinan sini? Ginpahibalo na bala sang masaligan nga mga website nga indi ini matuod?’a Kon amo sini, gamita ang “maayo nga paghangop.” (Hulu. 7:7) Kon daw indi mapatihan ang isa ka balita, basi indi mo gid man ini dapat pagpatihan. Kag kon nagapakalain ini sa iban, hunahunaa kon sin-o ang makabenepisyo kon maglapta ini kag kon may malain nga motibo ang ginhalinan sini.

GINAPASA MO BALA DAYON ANG MGA E-MAIL?

Para mangin sikat sila, gusto gid sang iban nga sila ang una nga magsugid sang balita kag magpasa sini sa tanan nila nga kilala bisan pa wala nila masiguro kon matuod ini ukon mabinagbinag kon ano ang mangin resulta. (2 Sam. 13:28-33) Pero kon “maalamon” kita, hunahunaon naton nga mahimo sini gub-on ang reputasyon sang isa ka tawo ukon organisasyon.

Kinahanglan ang tion kag panikasog para masiguro nga matuod ang balita. Gani ginapabay-an na lang sang iban nga himuon ini sang ila ginapasahan. Pero daw ano kadugay niya ini himuon? Hamili ang tion. (Efe. 5:15, 16) Gani sa baylo nga hunahunaon, “Kon nagaduhaduha, ipasa,” mas maayo nga magsiling: “Kon nagaduhaduha, ibasura!”

Mamangkot: ‘Ginapasa ko bala dayon ang mga e-mail? Natabo na bala nga nangayo ako sing pasaylo sa akon mga kilala kay sala ukon binutig gali nga impormasyon ang napadala ko sa ila? May nagsiling na bala sa akon nga indi na ako magpasa sang mga e-mail?’ Dumduma nga ang imo ginapadalhan sang e-mail makabukas man sang Internet kag makapangita sang ila gusto mahibaluan bisan indi mo sila pagbuligan. Indi nila kinahanglan ang sobra kadamo nga makahalam-ot nga mga istorya, video clip, ukon slide show. Indi man maalamon nga ipasa ang mga rekording ukon mga nota sa mga pamulongpulong sa Biblia.b Kag kon ipasa naton sa iban ang aton mga gin-research, mga teksto para sa pagtuon sa Biblia, ukon mga sabat para sa mga miting sang kongregasyon, indi sila makabenepisyo nga pareho sa kon sila mismo ang naghanda.

Ano ang himuon mo kon may makita ka sa Internet nga balita nga nagapakalain sa organisasyon ni Jehova? Indi mo gid ini dapat pagpatihan. Kon ipahibalo mo ini sa iban para makuha ang ila opinyon, mapalapta mo gid ang makahalalit nga impormasyon. Kon may makita kita sa Internet nga nagatublag sa aton, mangamuyo kita kay Jehova nga hatagan niya kita sing kaalam kag isugid ini sa hamtong nga mga utod nga lalaki. (Sant. 1:5, 6; Jud. 22, 23) Sayop man nga ginsumbong si Jesus, gani ginpaandaman niya ang iya mga sumulunod nga hingabuton sila sang ila mga kaaway kag ‘butangbutangan sang tanan nga sahi sang kalautan.’ (Mat. 5:11; 11:19; Juan 10:19-21) Dapat naton gamiton ang aton “ikasarang sa paghunahuna” kag “paghantop” para makilala ang “tawo nga nagahambal sing kabutigan” kag ang “mga malimbungon sing dalanon.”—Hulu. 2:10-16.

RESPETUHA ANG KINAMATARONG SANG IBAN

Dapat man kita maghalong sa mga balita ukon mga eksperiensia sang mga kauturan nga nabatian lang naton. Bisan pa kon matuod ini, indi buot silingon nga dapat na ini ipalapta. May mga tion nga indi husto kag mahigugmaon ang pagsugid sini sa iban. (Mat. 7:12) Halimbawa, indi mahigugmaon kag makapalig-on ang pagkutsokutso, bisan pa mahimo matuod ang impormasyon. (2 Tes. 3:11; 1 Tim. 5:13) Mahimo nga kompidensial ang pila ka balita, gani dapat naton respetuhon ang kinamatarong sang iban sa pagpahibalo sini sa nagakaigo nga tion kag mga paagi. Makahalit gid kon ginaunahan naton ang pagpalapta sang impormasyon.

Posible na gid subong ang paglapta sang balita—matuod ukon indi, mapuslanon ukon wala pulos, maayo ukon makahalalit—sing tuman kadasig. Bisan sa isa lang ka tawo ikaw magpadala sang e-mail ukon text, hungod man ukon indi, mahimo ini maglapta sa bilog nga kalibutan sa pila lang ka segundo. Gani punggan naton ang aton kaugalingon sa pagpasa dayon sang impormasyon kay bisan sin-o. Kon makabasa kita sang balita nga daw interesante, dumduma nga ang gugma wala nagasuspetsa dayon; indi man ini mapinatihon. Labaw sa tanan, ang gugma wala nagapati sa makahalalit nga impormasyon parte sa organisasyon ni Jehova ukon sa mga kabutigan parte sa aton mga kauturan nga ginapalapta sang mga tawo nga ulipon sang “amay sang kabutigan,” si Satanas nga Yawa. (Juan 8:44; 1 Cor. 13:7) Ang aton ikasarang sa paghunahuna kag paghantop magabulig sa aton nga mangin “maalamon” kag hunahunaon sing maayo kon paano gamiton ang madamo nga impormasyon nga mabaton naton kada adlaw. Suno sa Biblia, “ang tawo nga mapinatihon magapanubli sang kabuangan, apang ang tawo nga maalamon may korona sang ihibalo.”—Hulu. 14:18.