Likawi ang Pagtinguha sa “Walay Pulos nga mga Butang”
1 Ang isa ka bantog karon nga paagi sa pagkomunikar amo ang E-mail. Bisan pa nagakaigo nga magpaambitay sing personal nga mga eksperiensia kag mga panghunahuna ang mga magkapamilya kag mga mag-abyan paagi sa sini, ano ang “walay pulos nga mga butang” nga sarang maangot sa pataka nga paggamit sing E-mail?—Hulu. 12:11.
2 Mga Paandam Tuhoy sa E-Mail: Ang iban nagabatyag nga mas maayo ang ila komunikasyon sa organisasyon ni Jehova kon makabaton sila sang ila ginatamod nga lab-as nga mga impormasyon paagi sa E-mail. Mahimo magalakip ini sing mga eksperiensia, mga sulat tuhoy sa mga nagakatabo sa Bethel, mga report tuhoy sa mga kalamidad ukon paghingabot, kag bisan gani sang kompidensial nga mga impormasyon nga ginpahibalo sa mga Kingdom Ministry School. Ang iban nalangkag gid nga ipadala ini nga mga mensahe, nagalaum nga sila ang mauna sa pagpahibalo sini nga mga impormasyon sa ila mga abyan.
3 Kon kaisa, ginapatiko ukon ginapasobrahan ang mga impormasyon kag mga eksperiensia. Ukon ayhan bangod sang panikasog nga mangin makapulukaw, sayop nga impresyon ang napaalinton sang pila. Ang mga nagapadasodaso sa pagpahibalo sining mga butang masami nga wala makahibalo sang bug-os nga impormasyon. (Hulu. 29:20) Sa pila ka kaso, bisan pa daw indi mapatihan ang impormasyon, ginapadala ini subong makawiwili lamang nga yangkotyangkot. Ining indi sibu ukon makapatalang nga mga report nagaresulta sa “butig nga mga sugilanon,” nga wala nagapasanyog sang matuod nga diosnon nga debosyon.—1 Tim. 4:6, 7.
4 Kon ipadala mo ang impormasyon nga indi gali matuod, may responsabilidad ka man sa kasubo ukon pagsalangisag nga matuga sini. Sang nakabaton si David sing ginpasobrahan nga report nga ang tanan niya nga anak nga lalaki ginpatay, iya “gingisi ang iya panapton” bangod sang kasubo. Apang, ang matuod, isa lamang ka anak niya nga lalaki ang napatay. Makapahuol na yadto, apang ining pagpasobra nagdugang sang kahuol ni David. (2 Sam. 13:30-33) Sa pagkamatuod indi naton luyag nga maghimo sing bisan ano nga butang nga magapatalang ukon magapaluya sa kay bisan sin-o naton nga utod.
5 Ang Gintangdo sang Dios nga Alagyan: Dumduma nga ang aton langitnon nga Amay may gintangdo nga alagyan sang komunikasyon, “ang matutom kag mainandamon nga ulipon.” Ining “ulipon” may responsabilidad nga pat-uron kon ano nga mga impormasyon ang ipahibalo sa panimalay sang pagtuo, subong man ang “nagakaigo nga tion” sa pagpahibalo sini. Ining espirituwal nga pagkaon matigayon lamang paagi sa teokratikong organisasyon. Dapat maghulat kita pirme sa gintangdo sang Dios nga alagyan sang komunikasyon para sa masaligan nga mga impormasyon, indi sa isa ka network sang mga nagagamit sang Internet.—Mat. 24:45.
6 Mga “Internet Web Site”: May opisyal kita nga Internet Web site: www.watchtower.org. Ini nga site bastante na sa paghatag sing impormasyon sa publiko. Indi na kinahanglan kay bisan sin-o nga indibiduwal, komite, ukon kongregasyon nga maghanda sing isa ka Web page tuhoy sa mga Saksi ni Jehova. Ang pila nagbutang sing mga kaundan sang aton mga publikasyon lakip ang tanan nga kasulatan kag mga reperensia kag nagtanyag pa gani sing mga kopya sang materyal sa kombension nga nagapangayo sing donasyon. May ganansia man ukon wala, ang buhat nga paghimo liwat kag pagpanagtag sing mga publikasyon sang mga Saksi ni Jehova sa elektroniko nga dokumento isa ka paglapas sang copyright laws. Samtang ginatamod ini sang iban nga pagbulig sa mga kauturan, wala ini gintugutan kag dapat untaton.
7 Ang paggamit sing maayo nga paghukom kag maligdong nga hunahuna kon nagagamit sing elektroniko nga komunikasyon magapat-od nga ang aton mga hunahuna mapuno sing “bilidhon kag maayong mga butang nga may balor.”—Hulu. 24:4.