TOPIKO SA KOBER | NGAA DAPAT MANGIN BUNAYAG?
Ang Epekto sa Imo sang Pagkadibunayag
“Sa masami, may mabudlay nga mga sitwasyon nga masolbar lang paagi sa diutay nga pagkadibunayag.”—Samantha, South Africa.
Nagaugyon ka bala sa sini? Pareho kay Samantha, nakaatubang kita sing mabudlay nga mga kahimtangan. Ang aton reaksion sa mga kahimtangan nga nagasulay sa aton nga mangin indi bunayag, nagapakita kon ano gid ang aton ginapabaloran. Halimbawa, kon mas importante sa aton nga indi mahuy-an, mahimo tamdon naton nga kinahanglanon ang pagkadibunayag. Pero malain gid ang mga resulta sang pagkadibunayag kon mahibaluan na kon ano ang matuod. Binagbinaga ang masunod.
ANG PAGKADIBUNAYAG NAGAGUBA SANG PAGSALIG
Nagabakod ang mga kaangtanan kon may pagsalig ang kada isa. Kon ang duha ka tawo may pagsalig sa kada isa, nagabatyag sila sing kalig-unan. Pero ang pagsalig indi awtomatiko. Nagabakod ang pagsalig sang mga tawo sa isa kag isa kon pirme sila nagaupdanay, nagaistoryahanay sing tampad kag indi maiyaiyahon. Apang mahimo maguba ang pagsalig sa isa lang ka buhat sang pagkadibunayag. Kag kon maguba na ang pagsalig, mabudlay gid ini ibalik.
Nakaagi ka na bala nga gintunto sang isa nga ginkabig mo nga abyan? Kon huo, ano ang imo ginbatyag? Mahimo gid nga nasakitan ka, ukon nagbatyag nga gintraidoran. Natural lang ina. Ang pagkadibunayag makaguba gid sang hamili nga kaangtanan.
ANG PAGKADIBUNAYAG MAKALALATON
Nasapwan sang pagtuon ni Robert Innes, isa ka propesor sang economics sa University of California, nga “ang pagkadibunayag makalalaton gid.” Gani, ang pagkadibunayag mapaanggid sa kagaw—kon pirme ka nagaupod sa tawo nga nagapangdaya, mas daku ang posibilidad nga “malatnan” ka sang pagkadibunayag.
Paano mo malikawan nga masiod sang pagkadibunayag? Ang Biblia makabulig sa imo. Palihug usisaa ang pila ka prinsipio sa Biblia.