May Empatiya Bala ang Dios?

ANG GINATUDLO SANG MGA TINUGA

Ang empatiya nagakahulugan sang “ikasarang nga mahibaluan ang ginabatyag ukon naeksperiensiahan sang isa paagi sa pag-imadyin kon ano ang ginabatyag niya sa sina nga sitwasyon.” Ang eksperto sa panghunahuna nga si Dr. Rick Hanson, nagsiling nga ang “empatiya ara na nga daan sa aton.”

BINAGBINAGA: Sa tanan nga tinuga, ngaa kita lang ang may empatiya? Ginapaathag sang Biblia nga gintuga sang Dios ang tawo sa iya larawan. (Genesis 1:26) Gani, mapakita naton ang iya personalidad kag maayo nga mga kinaiya. Kon ang mga maluluy-on magabulig sa iban bangod sa empatiya, ginapakita nila ang empatiya sang ila maluluy-on nga Manunuga, si Jehova nga Dios.—Hulubaton 14:31.

KON ANO ANG GINATUDLO SANG BIBLIA PARTE SA EMPATIYA SANG DIOS

May empatiya ang Dios sa aton kag indi niya gusto nga mag-antos kita. Sang ang mga Israelinhon sang una nagbatas sang mapintas nga pagkaulipon sa Egipto kag sang 40 ka tuig sa kamingawan, ang Biblia nagasiling: “Sa tanan nila nga pag-antos, nag-antos man sia.” (Isaias 63:9) Talupangda nga wala lamang nahibaluan sang Dios ang ila kabudlayan. Mabatyagan man niya ang ila kasakit. “Nahibaluan ko gid ang ila pag-antos.” (Exodo 3:7) “Ang nagatandog sa inyo,” siling sang Dios, “nagatandog sa tawotawo sang akon mata.” (Zacarias 2:8) Kon nasakitan kita bangod sa iban, nasakitan man sia.

Ang Biblia nagapasalig sa aton nga bisan pa nga ginakonsiensia kita kag nagabatyag nga indi takus sang empatiya sang Dios, “ang Dios labaw pa sa aton tagipusuon kag nakahibalo sang tanan nga butang.” (1 Juan 3:19, 20) Mas kilala kita sang Dios. Nahibaluan gid niya ang tanan naton nga kahimtangan, panghunahuna, kag balatyagon. May empatiya Sia sa aton.

Ang Biblia nagapasalig sa aton

• “Magapanawag kamo, kag si Jehova magasabat; magapangayo kamo sing bulig, kag magasiling sia, ‘Yari ako!’”—ISAIAS 58:9.

• “‘Kay nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum. Magapanawag kamo sa akon kag magadangop kamo kag magapangamuyo sa akon, kag magapamati ako sa inyo.’”—JEREMIAS 29:11, 12.

• “Isulod ang akon mga luha sa imo panit nga suludlan. Indi bala nga nasulat ini sa imo libro?”—SALMO 56:8.

ANG DIOS NAKATALUPANGOD, NAKAHANGOP, KAG NAGAULIKID SA ATON

Makabulig bala sa aton nga maatubang ang kabudlayan kon mahibaluan naton nga may empatiya ang Dios sa aton? Binagbinaga ang eksperiensia ni Maria:

“Pamatyag ko kabudlay gid kag indi patas ang kabuhi sang maeksperiensiahan ko ang grabe nga kasubo sang mapatay ang akon 18 anyos nga soltero pagkatapos nga mag-antos sa kanser sing duha ka tuig. Naakig ako kay Jehova kay wala sia sing ginhimo para mag-ayo sia!

“Pagligad sang anom ka tuig, may mahigugmaon kag maluluy-on nga utod sa kongregasyon nga namati samtang ginasugid ko sa iya nga pamatyag ko indi ako palangga ni Jehova. Ginpabay-an niya ako nga mag-istorya sing pila ka oras, dayon ginpaambit niya sa akon ang isa ka teksto. Ini amo ang 1 Juan 3:19, 20, nga nagasiling: ‘Ang Dios labaw pa sa aton tagipusuon kag nakahibalo sang tanan nga butang.’ Ginpaathag niya nga nahangpan ni Jehova ang aton kabudlayan.

“Pero nabudlayan gihapon ako nga dulaon ang akon kaakig! Nabasa ko ang Salmo 94:19, nga nagasiling: ‘Sang nagdamo ang akon kabalaka, ginlugpayan kag ginpaumpawan mo ako.’ Pamatyag ko para gid ini sa akon! Sang ulihi, nalipay gid ako kon ginasugid ko ang akon mga kabudlayan kay Jehova, kay nahibaluan ko nga nagapamati sia kag nahangpan niya ako.”

Maayo gid nga nahangpan kita sang Dios! Pero ngaa madamo ang nagaantos? Ginasilutan bala kita sang Dios bangod sang aton mga sala? Dulaon bala sang Dios ang tanan nga pag-antos? Sabton ini sa masunod nga mga artikulo.