Mga Ginikanan, Ginabuligan Bala Ninyo ang Inyo Bata Para Makapabawtismo?

1. Ano ang gusto masigurado sang Cristianong mga ginikanan antes magpabawtismo ang ila kabataan?

“PILA na ka bulan nga ginahambalan ko sanday Tatay kag Nanay nga gusto ko magpabawtismo, kag pirme nila ako ginaistorya parte sa sini. Gusto nila pat-uron kon serioso ako. Sang Disiembre 31, 1934, natabo ining pinakaimportante nga hitabo sa akon kabuhi.” Amo sini ang paglaragway ni Blossom Brandt sang namat-od sia nga magpabawtismo. Ang Cristianong mga ginikanan subong maluyag man nga buligan ang ila kabataan nga makadesisyon sing maayo. Kon padugayon pa ang pagpabawtismo nga wala sing malig-on nga rason, mahimo nga magahalit ini sa kaangtanan sang bata kay Jehova. (Sant. 4:17) Gani ginasigurado sang mga ginikanan nga antes magpabawtismo ang ila kabataan, dapat handa na sila nga mangin disipulo sang Cristo.

2. (a) Ngaa nabalaka ang pila ka manugtatap sang sirkito? (b) Ano ang binagbinagon naton sa sini nga artikulo?

² May pila ka manugtatap sang sirkito nga nabalaka kay may nakilala sila nga mga tin-edyer kag mga beintehon ang edad nga nagdaku sa Cristianong panimalay pero wala pa makapabawtismo. Pirme sila nagatambong sa mga miting kag nagagua sa latagon. Ginakabig nila ang ila kaugalingon nga mga Saksi ni Jehova. Pero wala pa gihapon sila magdedikar kay Jehova kag magpabawtismo. Ano ang rason? Sa pila ka kahimtangan, ginapunggan sila sang ila mga ginikanan nga magpabawtismo. Sa sini nga artikulo, binagbinagon naton ang apat ka rason nga nagapugong sa Cristianong mga ginikanan nga buligan ang ila kabataan nga magpabawtismo.

MAY BUOT NA BALA ANG AKON BATA?

3. Ano ang ginakabalak-an sang mga ginikanan ni Blossom?

³ Ang mga ginikanan ni Blossom, nga ginsambit sa una nga parapo, may rason nga magkabalaka kon bala mahangpan na sang ila bata kon daw ano kaimportante kag kaserioso ang pagpabawtismo. Paano mahibaluan sang mga ginikanan kon bala makadedikar na ang ila bata?

4. Paano makabulig sa mga ginikanan ang sugo ni Jesus sa Mateo 28:19, 20 kon ginatudluan nila ang ila kabataan?

⁴ Basaha ang Mateo 28:19, 20. Suno sa nabinagbinag na nga artikulo, wala sing ginpat-od nga edad sa Biblia nga dapat magpabawtismo ang isa. Pero maayo kon pamensaron sang mga ginikanan kon ano ang nadalahig nga mangin disipulo. Ginapakita sang Mateo 28:19 nga ginatun-an kag ginahangop sang isa ka disipulo ang mga panudlo ni Jesus kag handa sia nga tumanon ini. Gani ang tulumuron sang tanan nga Cristianong ginikanan amo ang pagtudlo sa ila kabataan sugod sa pagkalapsag nga mangin nabawtismuhan nga disipulo sang Cristo. Matuod nga ang lapsag indi kalipikado sa pagpabawtismo. Pero ginapakita sang Biblia nga bisan ang kabataan makahangop sang mga kamatuoran sa Biblia.

5, 6. (a) Ano ang masiling naton sa paglaragway sang Biblia sa pagpabawtismo ni Timoteo? (b) Paano mabuligan sing maayo sang mga ginikanan nga may paghantop ang ila kabataan?

⁵ Si Timoteo isa ka disipulo nga namat-od nga mag-alagad kay Jehova sang bata pa sia. Nagsiling si apostol Pablo nga natun-an ni Timoteo ang kamatuoran halin sa Kasulatan kutob sa pagkalapsag. Bisan pa nga ang amay niya wala nagaalagad kay Jehova, ginbuligan sia sang iya iloy kag lola nga pabaloran ang Kasulatan. Gani nangin mabakod ang iya pagtuo. (2 Tim. 1:5; 3:14, 15) Sang mga 20 anyos na sia, nahatagan sia sing pinasahi nga mga pribilehiyo sa kongregasyon.—Binu. 16:1-3.

⁶ Siempre ang tagsa ka bata tuhay; wala sila nagahamtong sing dulungan. Ang pila nakahangop sang kamatuoran, makadesisyon sing maayo kag gusto magpabawtismo bisan bata pa sila. Ang iban naman medyo may edad na antes magpabawtismo. Gani wala ginapilit sang mga ginikanan nga may paghantop ang ila kabataan nga magpabawtismo. Sa baylo, ginabuligan nila sila nga mag-uswag sa espirituwal suno sa ila ikasarang. Nalipay ang mga ginikanan kon dumdumon sang ila bata ang ginasiling sang Hulubaton 27:11. (Basaha.) Pero indi nila dapat pagkalimtan nga ang ila tulumuron amo nga buligan ang ila kabataan nga mangin mga disipulo. Puede binagbinagon sang mga ginikanan ang pamangkot, ‘Bastante na bala ang ihibalo sang akon bata para makadedikar sia sa Dios kag magpabawtismo?’

BASTANTE BALA ANG NAHIBALUAN SANG AKON BATA?

7. Dapat bala nga nahibaluan na sang gusto magpabawtismo ang tanan nga detalye sa Biblia? Ipaathag.

⁷ Gusto tudluan sing maayo sang mga ginikanan ang ila kabataan sang kamatuoran para makadedikar sila sa Dios. Pero indi buot silingon nga dapat nahibaluan nila ang tanan nga detalye antes sila magdedikar kag magpabawtismo. Ang tanan nga disipulo dapat padayon gihapon nga maglambo sa sibu nga ihibalo bisan nagpabawtismo na sila. (Basaha ang Colosas 1:9, 10.) Gani daw ano kadamo ang natun-an sang isa antes sia magpabawtismo?

8, 9. Ano ang matun-an naton sa natabo kay Pablo kag sa manugbilanggo?

⁸ Ang eksperiensia sang isa ka pamilya sang unang siglo makabulig sa mga ginikanan subong. (Binu. 16:25-33) Sang mga 50 C.E., nagkadto si Pablo sa Filipos sa iya ikaduha nga paglakbay subong misyonero. Sang didto sila sang iya kaupod nga si Silas, ginsumbong sila, gindakop, kag ginpriso. Pagkagab-i, naglinog kag nag-uyog ang mga pundasyon sang bilangguan kag nagbukas ang tanan nga puertahan. Bangod hinadlukan nga basi nakapalagyo ang mga bilanggo, manginmatay na kuntani ang manugbilanggo, pero gintawag sia ni Pablo. Nakapanaksi sing maayo sanday Pablo kag Silas sa manugbilanggo kag sa iya pamilya. Ano ang ila ginhimo kay nalipay sila sa mga kamatuoran nga natun-an nila parte kay Jesus? Nagpabawtismo sila dayon. Ano ang matun-an naton sa sini?

⁹ Mahimo nga beterano nga soldado ang manugbilanggo. Wala sia sing nahibaluan sa Kasulatan. Gani para mangin Cristiano, dapat nahibaluan niya ang panguna nga mga panudlo sa Biblia, nahangpan niya kon ano ang nadalahig para mangin alagad sang Dios, kag dapat gusto niya nga sundon ang mga panudlo ni Jesus. Bisan sa malip-ot lang nga tion, nahibaluan niya nga importante ang mga kamatuoran sa Biblia kag gusto na niya nga magpabawtismo. Siempre, padayon sia nga nagtuon bisan nabawtismuhan na sia. Base sa sini nga halimbawa, ano ang imo himuon kon gusto sang imo bata nga magpabawtismo kay ginahigugma niya si Jehova kag gusto niya nga tumanon sia? Mahimo ninyo sia pakadtuon sa mga gulang para mahibaluan nila kon puede na sia mabawtismuhan.a Pareho sang tanan nga Cristiano nga nabawtismuhan na, dapat padayon nga tun-an niya ang katuyuan ni Jehova sa bilog niya nga kabuhi, asta sa wala sing katapusan.—Roma 11:33, 34.

ANO ANG PINAKAMAAYO NGA EDUKASYON PARA SA AKON BATA?

10, 11. (a) Ano ang ginahunahuna sang pila ka ginikanan? (b) Ano dapat ang itudlo sang isa ka ginikanan?

¹⁰ May pila ka ginikanan nga naghunahuna nga mas maayo kon indi anay magpabawtismo ang ila bata asta nga makakuha sing kurso kag makaobra. Maayo man ini nga pangatarungan, pero mangin madinalag-on gid bala ang ila bata? Isa pa, suno bala ini sa aton natun-an sa Kasulatan? Ano ang ginapalig-on sang Pulong ni Jehova?—Basaha ang Manugwali 12:1.

¹¹ Dapat dumdumon nga ang kalibutan kag ang mga butang sa sini nagasumpakil sa katuyuan kag panghunahuna ni Jehova. (Sant. 4:7, 8; 1 Juan 2:15-17; 5:19) Ang suod nga kaangtanan kay Jehova amo ang pinakamaayo nga pangamlig kay Satanas, sa iya kalibutan, kag sa malain nga panghunahuna sini. Kon unahon sang mga ginikanan ang edukasyon kag ang trabaho, mahimo maghunahuna ang ila bata nga mas importante pa ang mga butang sa kalibutan sangsa kaangtanan niya kay Jehova. Makatalagam ini. Bilang mahigugmaon nga ginikanan, gusto mo bala tudluan sang kalibutan ang imo bata kon paano mangin malipayon? Matigayon lamang naton ang matuod nga kalipay kag kadalag-an kon unahon naton si Jehova.—Basaha ang Salmo 1:2, 3.

ANO ABI KON MAKASALA ANG AKON BATA?

12. Ngaa indi gusto sang pila ka ginikanan nga magpabawtismo dayon ang ila bata?

¹² Ginpaathag sang isa ka iloy ang iya rason kon ngaa indi niya gusto nga magpabawtismo dayon ang iya bata nga babayi, “Nahuya ako maghambal nga ang rason amo ang pag-disfellowship.” Pareho sini nga utod, may pila ka ginikanan nga naghunahuna nga mas maayo nga indi lang anay magpabawtismo ang ila bata asta nga madula na niya ang iya binatabata nga panimuot. (Gen. 8:21; Hulu. 22:15) Mahimo sila magsiling, ‘Kon indi mabawtismuhan ang akon bata, indi sia ma-disfellowship.’ Ngaa sayop ini nga panghunahuna?—Sant. 1:22.

13. Kon indi bawtismado ang isa, buot bala silingon nga wala sia sing salabton kay Jehova? Ipaathag.

¹³ Siempre, indi gusto sang mga ginikanan nga magpabawtismo ang ila bata kon indi pa sia handa magdedikar sang iya kaugalingon kay Jehova. Pero sayop maghunahuna nga indi sia manabat kay Jehova kay wala pa sia mabawtismuhan. Ngaa? Ang salabton kay Jehova wala nabase sa pagpabawtismo. Sa baylo, may salabton ang bata sa Dios kon nahibaluan na niya kon ano ang husto kag indi para kay Jehova. (Basaha ang Santiago 4:17.) Gani ang maalam nga mga ginikanan wala nagapugong sa ila bata nga magpabawtismo kundi ginabuligan nila sia nga sundon ang ila ginahimo. Gusto nila tudluan ang ila bata sugod sa pagkalapsag sang mataas nga mga talaksan ni Jehova parte sa kon ano ang maayo kag malain. (Luc. 6:40) Ang gugma sang bata kay Jehova magapugong sa iya nga maghimo sing serioso nga sala, kay gusto niya nga himuon kon ano ang matarong para kay Jehova.—Isa. 35:8.

MAKABULIG ANG IBAN

14. Paano makabulig ang mga gulang sa ginahimo sang mga ginikanan?

¹⁴ Makabulig ang mga gulang sa mga ginikanan kon palig-unon man nila ang mga kabataan nga magpahamtang sing mga tulumuron sa pag-alagad kay Jehova. Nadumduman sang isa ka utod nga masobra na 70 ka tuig nga payunir ang pag-istoryahanay nila ni Utod Charles T. Russell sang anom sia ka tuig. Nagsiling sia, “Mga 15 minutos kami nga nag-istoryahanay parte sa akon mga tulumuron sa pag-alagad kay Jehova.” Huo, daku ang epekto sang makapalig-on nga paghambalanay. (Hulu. 25:11) Puede man ilakip sang mga gulang ang mga ginikanan kag ang ila kabataan sa mga proyekto sa Kingdom Hall. Puede nila hatagan sing hilikuton ang mga kabataan suno sa ila lang masarangan.

15. Paano mabuligan sang iban sa kongregasyon ang mga kabataan?

¹⁵ Ang mga miembro sang kongregasyon makabulig paagi sa pagpakig-istorya sa mga kabataan. Puede nila talupangdon ang pag-uswag sang kabataan parte sa ila kaangtanan kay Jehova. Nahandaan bala sing maayo sang bata ang iya komento ukon bahin sa mga miting? Ginabatuan bala niya ang mga pag-ipit sa eskwelahan ukon nagapanaksi bala sia didto? Pasalamati dayon sia sa iya ginhimo. Puede naton mangin tulumuron nga antes kag pagkatapos sang miting, istoryahon naton ang mga kabataan. Kon himuon naton ini, magabatyag sila nga bahin sang “daku nga kongregasyon.”—Sal. 35:18.

BULIGI ANG IMO BATA PARA MAKAPABAWTISMO

16, 17. (a) Ngaa dapat magpabawtismo ang kabataan? (b) Ano nga kalipay ang gusto matigayon sang mga ginikanan? (Tan-awa ang piktyur sa umpisa sini nga artikulo.)

¹⁶ Isa gid ka daku nga pribilehiyo sang ginikanan nga padakuon ang ila bata “sa disiplina kag laygay ni Jehova.” (Efe. 6:4; Sal. 127:3) Sa pungsod sang Israel, ang mga kabataan nadedikar na kay Jehova, pero ang aton kabataan subong wala. Dugang pa, wala ginapanubli ang gugma sa Dios kag sa kamatuoran. Sugod sa pagkatawo sang bata, dapat tulumuron sang mga ginikanan nga mangin disipulo sila, nga mangin dedikado kag bawtismado nga alagad ni Jehova. Wala na sing mas importante sa sini. Ang pagdedikar sang isa, pagpabawtismo, kag pag-alagad sing matutom sa Dios magaresulta sa kaluwasan sa nagapakari nga dakung kapipit-an.—Mat. 24:13.

¹⁷ Sang namat-od si Blossom Brandt nga magpabawtismo, ginhibalo sang iya mga ginikanan kon handa na sia sa paghimo sining pinakaimportante nga butang sa iya kabuhi. Sang napat-od na nila, ginsuportahan nila ang iya desisyon. Ginpaathag niya kon ano ang ginhimo sang iya amay sang gab-i antes sia bawtismuhan. Sia nagsiling: “Nagluhod kami tanan kag nangamuyo sia. Ginsilingan niya si Jehova nga nalipay gid sia sa desisyon sang iya bata nga magdedikar sa Iya.” Pagligad sang masobra 60 ka tuig, si Blossom nagsiling: “Indi ko gid malipatan yadto nga gab-i!” Mga ginikanan, amo man sini nga kalipay ang matigayon ninyo kon ang inyo kabataan mangin dedikado kag nabawtismuhan nga alagad ni Jehova.