Magkooperar kay Jehova Kada Adlaw

1. Paano kita makakooperar kay Jehova?

GUSTO sang aton Manunuga nga magkooperar sa iya ang perpekto nga mga tawo para matuman ang iya katuyuan. Bisan pa indi perpekto ang mga tawo subong, makakooperar gihapon kay Jehova ang mga matutom sa iya kada adlaw. Halimbawa, “mga masigkamanugpangabudlay [kita] sang Dios” kon nagabantala kita sang maayong balita sang iya Ginharian kag nagatudlo sa iban. (1 Cor. 3:5-9) Isa gid ka pribilehiyo nga magkooperar sa labing gamhanan nga Manunuga sang uniberso sa hilikuton nga importante sa iya! Pero makakooperar kita kay Jehova indi lang paagi sa pagbantala kag pagtudlo sa iban. Binagbinagon sini nga artikulo kon paano kita makakooperar sa iya kon nagabulig kita sa aton pamilya kag mga kauturan, kon nagaabiabi sa iban, kon nagaboluntaryo sa mga proyekto sang organisasyon, kag kon nagapauswag sang aton pag-alagad.—Col. 3:23.

2. Ngaa indi mo dapat pag-ipaanggid sa iban ang imo mahimo para kay Jehova?

² Samtang ginatun-an naton ini nga artikulo, indi pag-ipaanggid sa iban ang imo mahimo para kay Jehova. Dumduma nga indi palareho ang aton edad, panglawas, kahimtangan, kag ikasarang. Si apostol Pablo nagsiling: “Dapat usisaon sang kada isa ang iya kaugalingon nga hinimuan, kag kon makita niya nga maayo ini magkalipay sia, apang indi niya dapat pag-ipaanggid ini sa hinimuan sang iban.”—Gal. 6:4.

BULIGI ANG IMO PAMILYA KAG MGA KAUTURAN

3. Ngaa masiling naton nga nagakooperar sa Dios ang mga nagaatipan sa ila pamilya?

³ Gusto ni Jehova nga atipanon sang iya mga alagad ang ila pamilya. Halimbawa, mahimo nga nagatrabaho ka para maaman ang kinahanglanon sang imo pamilya. Madamo nga iloy ang nagaatipan sang ila gagmay nga kabataan sa ila balay. Kag ang hamtong na nga kabataan mahimo nga nagaatipan sa ila nagamasakit nga mga ginikanan. Importante ini nga mga hilikuton. Ang Pulong sang Dios nagasiling: “Ang bisan sin-o nga wala nagaaman sa mga natungod sa iya, ilabi na sa mga katapo sang iya panimalay, nagapanghiwala sang pagtuo kag malain pa sa tawo nga wala sing pagtuo.” (1 Tim. 5:8) Kon may amo ka sini nga mga responsibilidad, posible nga limitado lang ang imo mahimo sa pag-alagad, bisan pa gusto mo kuntani nga dugangan ini. Pero indi maluyahan sing buot. Nalipay si Jehova kon ginaamanan mo ang imo pamilya.—1 Cor. 10:31.

4. Paano mapakita sang mga ginikanan nga ginauna nila ang Ginharian sa ila kabuhi, kag ano ang resulta sini?

⁴ Nagakooperar kay Jehova ang Cristiano nga mga ginikanan kon ginabuligan nila ang ila kabataan nga maglab-ot sang mga tulumuron sa pag-alagad. Madamo nga ginikanan ang naghimo sini, gani sang ulihi nagdesisyon ang ila kabataan nga mag-alagad sing bug-os tion, bisan sa malayo nga lugar. May pila nga nangin misyonero, ang iban nagapayunir sa lugar nga nagakinahanglan sing bulig, kag ang iban nagaalagad sa Bethel. Bangod ara sila sa malayo, indi sila pirme makaupdanay bilang pamilya. Pero ginapalig-on gihapon sang nagasakripisyo nga mga ginikanan ang ila kabataan nga magpadayon sa ila pag-alagad. Ngaa? Nalipay gid sila nga ginauna sang ila kabataan ang Ginharian sa ila kabuhi. (3 Juan 4) Mahimo nga ginabatyag man sini nga mga ginikanan ang ginbatyag ni Hana, nga nagsiling nga ‘ginpahulam’ niya ang iya anak nga si Samuel kay Jehova. Para sa ila, daku gid nga kadungganan ang pagkooperar kay Jehova sa sini nga paagi.—1 Sam. 1:28, footnote.

5. Paano ka makabulig sa mga kauturan sa inyo kongregasyon? (Tan-awa ang piktyur sa umpisa sini nga artikulo.)

⁵ Kon wala ka sing mabug-at nga mga responsibilidad sa pamilya, mabuligan mo bala ang mga kauturan nga nagamasakit, tigulang na, ukon may iban pa nga kinahanglanon, kag ang mga nagaatipan sa ila? Hibalua kon sin-o sa inyo kongregasyon ang nagakinahanglan sing bulig. Halimbawa, puede mo maupdan ang tigulang na nga ginikanan sang isa ka utod nga nagaatipan sa iya para may tion man ang utod sa iban pa nga hilikuton. Ukon basi makabulig ka sa iban paagi sa pagdul-ong sa ila sa miting, pagpamalaklon para sa ila kinahanglanon, ukon pagduaw sa naospital. Kon himuon mo ini, mahimo nga nagakooperar ka kay Jehova sa pagsabat niya sang pangamuyo.—Basaha ang 1 Corinto 10:24.

MANGIN MAABIABIHON

6. Paano kita mangin maabiabihon?

⁶ Kilala gid nga maabiabihon ang mga masigkamanugpangabudlay sang Dios. Sa Cristianong Griegong Kasulatan, ang termino nga gin-translate nga “pagkamaabiabihon” nagakahulugan sing “kaayo sa mga dumuluong.” (Heb. 13:2; footnote) May mga kasaysayan sa Pulong sang Dios nga nagatudlo sa aton nga mangin maabiabihon. (Gen. 18:1-5) Makabulig kita sa iban kag dapat gid naton sila buligan kon may mga kahigayunan nga mahimo naton ini, “mga masigkatumuluo” man naton sila ukon indi.—Gal. 6:10.

7. Paano ka makabenepisyo kon abiabihon mo ang mga nagaalagad sing bug-os tion nga nagakinahanglan sing dalayunan?

⁷ Makakooperar ka bala sa Dios paagi sa pag-abiabi sa mga nagaalagad sing bug-os tion nga nagakinahanglan sing dalayunan? (Basaha ang 3 Juan 5, 8.) Kon himuon mo ini, mangin kahigayunan ini nga “makapalig-unay” kamo. (Roma 1:11, 12) Binagbinaga ang eksperiensia ni Olaf sang pamatan-on pa sia. Sang nagduaw sa ila kongregasyon ang manugtatap sang sirkito nga isa ka soltero, wala sia sing madayunan. Ginpamangkot ni Olaf ang iya mga ginikanan nga indi Saksi kon puede magdayon sa ila balay ang manugtatap sang sirkito. Nagsugot sila pero nagsiling sila nga sa sofa na lang matulog si Olaf. Wala gid sia maghinulsol. “Makapalig-on gid yadto nga semana!” siling ni Olaf. “Aga pa kami nga nagabugtaw sang manugtatap sang sirkito kag ginabinagbinag namon ang madamo nga topiko samtang nagapamahaw. Napalig-on ako sini nga mag-alagad sing bug-os tion.” Sa nagligad nga 40 ka tuig, nag-alagad si Olaf bilang misyonero sa madamo nga pungsod.

8. Ngaa dapat kita magpakita sing kaayo bisan pa daw wala ini ginaapresyar sang primero? Maghatag sing halimbawa.

⁸ Mapakita mo ang kaayo sa mga dumuluong sa madamo nga paagi bisan pa daw wala ini ginaapresyar sang primero. Binagbinaga ini nga halimbawa. Samtang nagatudlo sang Biblia ang isa ka manugbantala sa Spain, natalupangdan niya nga nagasige hibi ang iya ginatudluan nga si Yesica, nga taga-Ecuador anay. Ginpamangkot niya si Yesica kon ngaa nagahibi sia. Ginsugid ni Yesica nga sang didto pa sia sa Ecuador, kaimol gid sa iya. Isa ka adlaw, wala gid sia sing ipakaon sa iya bata kundi tubig lang. Gin-iliili niya na lang ang iya bata para matulugan kag nangamuyo nga buligan sia. Wala magdugay, duha ka Saksi ang nagduaw sa iya, pero naakig sia sa ila kag gingisi niya ang magasin nga ginhatag nila. “Amo ini ang gusto ninyo nga ipakaon ko sa akon bata?” siling niya. Gin-uluuluhan sia sang mga utod, pero wala sia mamati. Sang ulihi, nagbalik sila kag nagbutang sa iya puertahan sang isa ka basket nga puno sing pagkaon. Nagdayaw gid sia sa kaayo nga ginpakita sa iya, pero nagalalain sia kay wala niya ginsapak ang sabat sang Dios sa iya pangamuyo. Pero subong, determinado na sia nga alagaron si Jehova. Maayo gid ang resulta sang ginpakita nila nga kaalwan.—Man. 11:1, 6.

MAGBOLUNTARYO SA MGA PROYEKTO SANG ORGANISASYON

9, 10. (a) Ano ang pila ka kahigayunan sang katawhan sang Dios sa pagboluntaryo sang panahon sang Biblia? (b) Ano ang pila ka hilikuton nga ginaatipan sang mga lalaki nga handa magbulig sa kongregasyon subong?

⁹ Sang una, may madamo nga kahigayunan ang mga Israelinhon sa pagboluntaryo. (Ex. 36:2; 1 Cron. 29:5; Neh. 11:2) Subong, may madamo ka man nga kahigayunan nga gamiton ang imo tion, materyal nga mga butang, kag ikasarang sa pagbulig sa imo mga kauturan. Kon himuon mo ini, malipay ka gid kag mabaton mo ang madamo nga pagpakamaayo.

¹⁰ Ginapalig-on sang Pulong sang Dios ang mga lalaki sa kongregasyon nga magkooperar kay Jehova paagi sa pag-alagad bilang mga gulang kag ministeryal nga alagad. (1 Tim. 3:1, 8, 9; 1 Ped. 5:2, 3) Gusto sini nga mga lalaki nga makabulig sa mga kauturan sa espirituwal kag sa iban pa nga paagi. (Binu. 6:1-4) Ginpangabay ka bala sang mga gulang kon puede ka mangin atendant ukon magbulig sa pag-atipan sa mga literatura, teritoryo, pagmentinar, ukon sa iban pa nga hilikuton? Sugiran ka sang mga nagaatipan sa sini nga mga hilikuton nga nalipay gid sila sa pagbulig sa iban.

11. Paano nakabulig sa isa ka utod ang iya nangin mga abyan sang nagaboluntaryo sia sa mga proyekto sang organisasyon?

¹¹ Ang mga nagaboluntaryo sa mga proyekto sang organisasyon masami nga may makilala nga bag-o nga mga abyan. Binagbinaga ang natabo kay Margie, nga nagaboluntaryo sa pagpatindog sang mga Kingdom Hall sing 18 na ka tuig. Madamo nga pamatan-on nga mga utod nga babayi ang nabuligan niya kag nahanas. Nagsiling sia nga bangod sini nga mga proyekto, makapalig-unay ang mga boluntaryo. (Roma 1:12) Sang nakaeksperiensia sia sang mga problema, ginpalig-on sia sang mga nangin abyan niya sa sini nga mga proyekto. Natilawan mo na bala nga magboluntaryo sa pagpatindog sang mga pasilidad? Puede ka makaboluntaryo bisan pa wala ka sing pinasahi nga ikasarang.

12. Paano ka makabulig sa tion sang kalamidad?

¹² Sa tion sang kalamidad, may kahigayunan ang katawhan sang Dios nga magkooperar sa iya sa pagbulig sa ila mga kauturan. Halimbawa, makaamot sila sing kuarta sa mga nahalitan. (Juan 13:34, 35; Binu. 11:27-30) Makabulig man sila sa pagpaninlo ukon sa pagpangay-o. Bangod sang baha, naguba ang balay ni Gabriela, isa ka utod nga taga-Poland. Pero nalipay gid sia sang ginbuligan sia sang mga kauturan halin sa mga kongregasyon nga malapit sa ila. “Indi ko gusto istoryahan ang nadula sa akon, kay materyal lang ini nga mga butang,” siling niya. “Gusto ko isugid sa inyo ang nabaton ko. Bangod sang akon naeksperiensiahan, napalig-on ako nga isa gid ka daku nga pribilehiyo kag kalipay ang mangin bahin sang Cristiano nga kongregasyon.” Amo man sini ang ginabatyag sang madamo nga nabuligan pagkatapos sang kalamidad. Daku man ang kalipay sang mga nagakooperar kay Jehova sa pagbulig sa ila.—Basaha ang Binuhatan 20:35; 2 Corinto 9:6, 7.

13. Paano naton mapabakod ang aton gugma kay Jehova kon nagaboluntaryo kita? Maghatag sing halimbawa.

¹³ Nalipay si Stephanie kag ang iban pa nga manugbantala sa pagkooperar sa Dios paagi sa pagbulig sa refugee nga mga Saksi sa Estados Unidos. Nagbulig sila para may istaran kag may makita nga mga gamit ang mga pamilya nga nalagyo bangod sang inaway sa ila pungsod. “Napalig-on gid kami sang nakita namon ang ila kalipay kag apresasyon sa pagpalangga sang ila mga kauturan sa bilog nga kalibutan,” siling ni Stephanie. “Para sa sini nga mga pamilya, ginbuligan namon sila, pero ang matuod, mas daku ang nabulig nila sa amon.” Nagsiling pa sia, “Ang gugma, paghiusa, pagtuo, kag pagsalig kay Jehova nga naeksperiensiahan namon nagpabakod gid sang amon gugma kay Jehova, kag bangod sini, ginaapresyar gid namon ang tanan nga nabaton namon paagi sa iya organisasyon.”

TINGUHAI NGA MAPAUSWAG ANG IMO PAG-ALAGAD

14, 15. (a) Ano ang panimuot ni manalagna Isaias? (b) Paano mailog sang mga manugbantala sang Ginharian ang panimuot ni Isaias?

¹⁴ Gusto mo pa bala dugangan ang imo panikasog sa pagkooperar kay Jehova? Handa ka bala magsaylo kag mag-alagad sa lugar nga kinahanglan ang dugang nga manugbantala? Matuod, mapakita sang mga alagad sang Dios ang ila kaalwan bisan indi sila magsaylo sa malayo nga lugar. Pero ang kahimtangan sang pila ka kauturan nagatugot sa ila nga himuon ini. Pareho sa panimuot ni manalagna Isaias ang ila panimuot. Sang namangkot si Jehova, “Sin-o ang ipadala ko, kag sin-o ang magatiglawas sa amon?” nagsabat sia: “Yari ako! Ipadala ako!” (Isa. 6:8) Gusto mo man bala magbulig sa organisasyon ni Jehova kag ginatugot bala ini sang imo kahimtangan? Paano ka makabulig?

¹⁵ Amo ini ang ginsiling ni Jesus parte sa pagbantala kag pagtudlo nga hilikuton: “Madamo ang alanyon, apang diutay lamang ang mangangani. Gani, pakiluoy kamo sa Agalon sang alanyon nga magpadala sia sang mga mangangani sa iya alanyon.” (Mat. 9:37, 38) Puede ka bala magpayunir sa lugar nga nagakinahanglan sing bulig? Ukon may mabuligan ka bala nga makahimo sini? Ginhunahuna sang madamo nga kauturan nga mapakita gid nila ang ila gugma sa Dios kag isigkatawo kon magpayunir sila sa mga lugar ukon teritoryo nga kinahanglan ang dugang nga manugbantala. May mahimo ka pa bala para mapauswag ang imo pag-alagad? Malipay gid ikaw kon himuon mo ini.

16, 17. Paano mo pa mapauswag ang imo pag-alagad kay Jehova?

¹⁶ Gusto mo bala mag-alagad sa Bethel ukon magbulig sa pagpatindog sang mga pasilidad sing isa ka adlaw ukon pila ka adlaw kada semana, ukon bilang temporaryo nga boluntaryo? Kinahanglan pirme ang mga handa mag-alagad kay Jehova, diin man sila iasayn kag ano man ang ihatag nga trabaho sa ila. Kon kaisa, dapat nila himuon ang isa ka trabaho bisan pa may eksperiensia na sila sa lain nga trabaho. Pero ginapabaloran ni Jehova ang pagsakripisyo sini nga mga utod nga handa mag-alagad bisan diin man nga kinahanglan ang ila bulig.—Sal. 110:3.

¹⁷ Gusto mo bala nga hanason ka pa gid para mapauswag ang imo pag-alagad? Puede ka mag-aplay sa School for Kingdom Evangelizers. Ginahanas diri ang hamtong nga mga utod nga nagaalagad na sing bug-os tion, para mapauswag pa nila ang ila pag-alagad. Ang nagaaplay sa pag-eskwela diri dapat handa nga mag-alagad bisan diin sila iasayn paggradwar nila. Gusto mo bala nga makabenepisyo sa sini nga eskwelahan para mapauswag mo pa gid ang imo pag-alagad?—1 Cor. 9:23.

18. Ano nga benepisyo ang mabaton mo kon magkooperar ka kay Jehova kada adlaw?

¹⁸ Napalig-on kita nga mga alagad ni Jehova nga mangin maalwan, maayo, mainayuhon, kag mahigugmaon, kag mabalaka sa iban kada adlaw. Nagahatag ini sa aton sing kalipay kag paghidait. (Gal. 5:22, 23) Ano man ang imo kahimtangan, malipay ka kon ilugon mo ang kaalwan ni Jehova kag magkooperar sa iya!—Hulu. 3:9, 10.