Kon Mapatyan sing Pinalangga

KON napatyan ka sing pinalangga, mahimo nabatyagan mo man ang sarisari nga emosyon, halin sa kasubo asta sa pagbatyag nga nagaisahanon kag wala sing mahimo. Basi naakig ka man, nakonsiensia, kag nahadlok. Mahimo namensar ka pa gani kon bala may pulos pa ang imo kabuhi.

Dumduma nga indi malain ang pagpangasubo. Nagapakita ini kon daw ano mo ka palangga ang napatay. Pero, may makabulig ayhan sa imo para maghaganhagan ang imo kasakit?

ANG NAKABULIG SA IBAN NGA MAKABATAS

Bisan pa daw indi na madula ang imo kasubo, mahimo makabulig sa imo ang masunod nga mga panugda:

PASUGTI ANG IMO KAUGALINGON NGA MAGPANGASUBO

Sarisari ang paagi ukon kalawigon sang pagpangasubo sang kada isa. Pero makabulig gid ang paghibi. Si Vanessa, nga ginsambit kaina, nagsiling: “Nagahibi lang ako; kinahanglan ko ipautwas ang akon kasakit.” Si Sofía, nga gulpi lang napatay ang iya manghod nga babayi, nagsiling: “Nasubuan gid ako kon ginapamensar ko ang natabo. Pareho lang nga ginbuksan ang imo pilas para limpyuhan. Daw indi maagwanta ang sakit, pero makabulig ini para mag-ayo ang pilas.”

ISUGID ANG IMO GINAPENSAR KAG GINABATYAG

Normal lang nga kon kaisa gusto mo mag-isahanon. Pero mabudlay maatubang ang kasubo kon ikaw lang. Si Jared nga disisiete anyos nga napatyan sang amay, nagsiling: “Ginasugid ko sa iban ang akon ginabatyag. Daw indi gani nila maintiendihan ang akon ginapanghambal, pero nagapahaganhagan ini sang akon ginabatyag.” Si Janice, nga ginsambit sa umpisa nga artikulo, nagsugid sang isa pa ka benepisyo: “Maumpawan ka gid kon mag-istorya ka sa iban. Pamatyag ko may nakaintiende sa akon kag nagabulig sa akon.”

MAGPABULIG

Ang isa ka doktor nagsiling: “Kon ang isa magpabulig sa iya pamilya kag mga abyan sa tapos mapatay ang iya pinalangga, mas mahapos kag madali niya maatubang ang iya kasubo.” Pahibalua ang imo mga abyan kon ano ang puede nila mabulig, kay mahimo gusto nila magbulig pero indi sila kabalo kon paano.—Hulubaton 17:17.

MAGPALAPIT SA DIOS

Si Tina nagsiling: “Sang gulpi lang napatay ang akon bana bangod sa kanser, indi ko na masugid sa iya ang akon ginabatyag, gani ginasugid ko sa Dios ang tanan! Ginasugdan ko ang akon adlaw paagi sa pagpangabay sa Dios nga buligan ako kag pirme gid niya ako ginabuligan.” Si Tarsha, nga napatyan sang iloy sang 22 anyos pa lang sia, nagsiling: “Ang pagbasa sang Biblia kada adlaw nakapaumpaw kag nakapalig-on gid sa akon.”

IMADYINA ANG PAGKABANHAW

Nagsiling pa si Tina: “Sang primero, indi ko mabatyagan ang paglaum sang pagkabanhaw kay kinahanglan ko ang akon bana kag kinahanglan sang akon mga bata nga lalaki ang ila tatay. Pero subong, pagligad sang apat ka tuig, nakabulig gid sa akon ini nga paglaum para magpadayon. Ginaimadyin ko nga magakitaay kami liwat, kag nagahatag ini sa akon sing kalinong kag kalipay!”

Indi insigida nga madula ang imo kasubo. Pero ang eksperiensia ni Vanessa makapabakod gid sa imo. Nagsiling sia, “Pamatyag mo daw indi ka na maumpawan, pero amat-amat nga magahaganhagan ang imo kasubo.”

Dumduma, nga bisan pa indi madula ang imo kahidlaw, may pulos gihapon ang imo kabuhi. Paagi sa mapinalanggaon nga bulig sang Dios, makakita ka sang maayo nga mga abyan kag mabatyagan mo nga may katuyuan ang imo kabuhi. Dali na lang banhawon sang Dios ang mga patay. Gusto niya nga mahakos mo liwat ang imo pinalangga. Kag ang kasakit nga ginabatyag mo subong madula na sing bug-os!