Paano Mapierde ang Kaaway nga Kamatayon?

BISAN pa wala nagtuman ang aton una nga mga ginikanan nga si Adan kag si Eva kag nagdala sang sala kag kamatayon sa tanan nga tawo, wala sini nabag-o ang katuyuan sang Dios para sa tawo. Paagi sa iya nasulat nga Pulong, ang Biblia, sulitsulit nga ginapamatud-an sang Dios nga wala nagbag-o ang iya katuyuan.

• “Ang mga matarong magapanubli sang duta, kag magapuyo sila sa sini sa wala sing katubtuban.”—Salmo 37:29.

• “Dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.”—Isaias 25:8.

• “Ang kamatayon amo ang katapusan nga kaaway nga iya dulaon.”—1 Corinto 15:26.

• “Wala na sing kamatayon, ukon paglalaw ukon paghibi ukon kasakit pa.”—Bugna 21:4.

Paano dulaon sang Dios ang kaaway nga kamatayon? Subong sang nasambit na, ang Biblia maathag nga nagsiling nga ‘ang mga matarong magapuyo sa duta sing wala sing katubtuban.’ Pero nagsiling man ini nga “wala sing matarong nga tawo sa duta nga nagahimo pirme sing maayo.” (Manugwali 7:20) Buot bala sini silingon nga indi na pagsundon sang Dios iya mga ginapatuman para bisan ang indi perpekto nga tawo mabuhi na sing wala katapusan? Indi gid ina matabo! Indi gid niya ina paghimuon bangod sia ang “Dios nga indi makabutig.” (Tito 1:2) Gani, paano tumanon sang mahigugmaon nga Dios ang iya katuyuan sang ginhimo niya ang tawo?

PAGPIERDE SA KAMATAYON PAAGI SA GAWAD

Si Jehova nga Dios may ginhimo nga mahigugmaon nga paagi para luwason ang tawo sa kamatayon—amo ang pagbayad sing gawad. Ang gawad amo ang paghatag sing pareho nga kantidad para mabayaran ang halit ukon para mapatuman ang hustisya. Bangod ang tanan nga tawo makasasala kag nasentensiahan sang kamatayon, ang Biblia prangka nga nagsiling: “Wala sing isa sa ila ang makatubos sang isa ka utod ukon makahatag sa Dios sing gawad para sa iya, (ang gawad para sa iya kabuhi tuman kamahal amo nga wala gid sing makabayad sini).”—Salmo 49:7, 8.

Kon mapatay ang isa ka indi perpekto nga tawo, mabayaran lang niya ang iya kaugalingon nga sala; indi niya matubos ang iya kaugalingon ukon mabayaran ang mga sala sang iban. (Roma 6:7) Kinahanglan nga may isa ka perpekto kag wala sing sala nga tawo nga maghatag sang iya kabuhi, indi para sa iya kaugalingon nga sala, kundi para sa aton mga sala.—Hebreo 10:1-4.

Amo gid sina ang ginhimo sang Dios. Ginpadala niya ang iya Anak nga si Jesus halin sa langit para ibun-ag diri sa duta bilang perpekto kag wala sing sala nga tawo. (1 Pedro 2:22) Si Jesus nagsiling nga nagkari sia para “ihatag ang iya kabuhi nga gawad kabaylo sang madamo.” (Marcos 10:45) Napatay sia para mapierde ang kamatayon kag para matigayon naton ang kabuhi.—Juan 3:16.

SAN-O MAPIERDE ANG KAMATAYON?

Subong, nagakatuman na ang tagna sang Biblia kay nagakabuhi na kita sa “makahalanguyos nga mga tion nga mabudlay atubangon,” nga pamatuod nga ara na kita “sa katapusan nga mga adlaw” sining malain nga sistema sang mga butang. (2 Timoteo 3:1) Ining katapusan nga mga adlaw matapos “sa adlaw sang paghukom kag sang paglaglag sa mga indi diosnon nga katawhan.” (2 Pedro 3:3, 7) Pero ang mga tawo nga nagahigugma sa Dios maluwas sa sina nga kalaglagan kag makabaton sing “kabuhi nga wala sing katapusan.”—Mateo 25:46.

Minilyon pa ang makabaton sang kabuhi nga wala sing katapusan kon banhawon na sila. Si Jesus may ginbanhaw sang nagkadto sia sa siudad sang Nain. Napatay ang bugtong nga bata sang balo, kag bangod “naluoy [si Jesus] sa iya,” ginbuhi niya liwat ang bata. (Lucas 7:11-15) Si apostol Pablo nagsiling man: “May paglaum ako sa Dios . . . nga may pagkabanhaw sang mga matarong kag mga indi matarong.” Ining mabakod nga paglaum isa ka talalupangdon nga pamatuod nga palangga gid sang Dios ang katawhan.—Binuhatan 24:15.

Binilyon ka tawo ang may paglaum nga mabuhi sing wala katapusan. Ang Biblia nagsiling: “Ang mga matarong magapanubli sang duta, kag magapuyo sila sa sini sa wala sing katubtuban.” (Salmo 37:29) Sa sina nga tion, maeksperiensiahan gid nila ang makalilipay nga mga pulong nga ginsulat ni apostol Pablo mga 2,000 ka tuig na ang nagligad: “Kamatayon, diin ang imo kadalag-an? Kamatayon, diin ang imo sudlot?” (1 Corinto 15:55) Ang mapintas nga kaaway sang katawhan nga kamatayon mapierde gid sa sina nga tion!