Mga Kinaiya nga Nagapalig-on sa Aton nga Magtambong sa mga Miting

1-2. (a) Ano ang makita ni Jehova kon magtipon ang minilyon para saulugon ang Panihapon sang Ginuo? (Tan-awa ang piktyur sa kober.) (b) Ano ang binagbinagon naton sa sini nga artikulo?

IMADYINA ang makita ni Jehova kon magtipon ang minilyon para saulugon ang Panihapon sang Ginuo. Makita niya ang madamo nga katawhan, pero ginatalupangod man niya ang kada isa. Halimbawa, makita niya kon sin-o ang mga matutom nga nagatambong kada tuig. Mahimo nga ginahingabot pa gani ang iban sa ila. May iban nga indi regular nga nagatambong sa mga miting, pero ginapabaloran gid nila ang Memoryal. Makita man ni Jehova ang mga nagatambong sa una nga tion, ayhan para mag-obserbar.

² Pat-od nga nalipay gid si Jehova nga madamo ang nagatambong sa Memoryal. (Luc. 22:19) Pero, indi ang kadamuon ang importante kay Jehova. Mas importante kay Jehova ang rason ukon motibo sa pagtambong. Sa sini nga artikulo, binagbinagon naton ining importante nga pamangkot: Ngaa dapat naton tambungan indi lang ang Memoryal kada tuig kundi pati man ang mga miting kada semana nga ginaaman ni Jehova sa mga nagapalangga sa iya?

ANG PAGKAMAPAINUBUSON NAGAPALIG-ON SA ATON

3-4. (a) Ngaa nagatambong kita sa mga miting? (b) Kon nagatambong kita sa mga miting, ginapakita sini nga may ano kita nga kinaiya? (c) Suno sa 1 Corinto 11:23-26, ngaa dapat gid kita magtambong sa Memoryal?

³ Ang panguna nga rason kon ngaa nagatambong kita sa mga miting amo nga bahin ini sang aton pagsimba. Nagatambong man kita bangod ginatudluan kita ni Jehova sa mga miting. Ang mga bugalon nagapati nga indi na nila kinahanglan nga tudluan. (3 Juan 9) Pero sa aton bahin, nalangkag kita nga tudluan ni Jehova paagi sa iya organisasyon.—Isa. 30:20; Juan 6:45.

⁴ Kon nagatambong kita sa mga miting, ginapakita sini nga mapainubuson kita kag handa kita nga tudluan. Nagatambong kita sa Memoryal sang kamatayon sang Cristo, indi lang bangod nagabatyag kita nga obligasyon naton ini kundi bangod mapainubuson man naton nga ginatuman ining sugo ni Jesus: “Padayon ninyo nga himua ini sa pagdumdom sa akon.” (Basaha ang 1 Corinto 11:23-26.) Ini nga miting nagapabakod sang aton paglaum sa palaabuton, kag nagapahanumdom sa aton sang gugma ni Jehova. Pero, kabalo si Jehova nga indi bastante nga makaisa lang kita palig-unon kag pabakuron kada tuig. Gani nag-aman sia sang mga miting kada semana kag gusto niya nga tambungan naton ini. Ang pagkamapainubuson nagapalig-on sa aton nga tumanon sia. Madamo nga oras ang ginagamit naton kada semana sa paghanda kag pagtambong sa sini nga mga miting.

5. Ano ang reaksion sang mga mapainubuson sa imbitasyon ni Jehova?

⁵ Kada tuig, madamo nga mapainubuson ang nagabaton sang imbitasyon ni Jehova nga tudluan sila. (Isa. 50:4) Nalipay sila sang makatambong sila sa Memoryal, gani gintambungan man nila ang iban pa nga miting. (Zac. 8:20-23) Nalipay kita lakip ang mga bag-uhan nga matudluan kag magiyahan ni Jehova, “ang nagabulig kag nagaluwas sa [aton].” (Sal. 40:17) May iban pa bala nga imbitasyon nga mas importante sangsa imbitasyon nga tudluan ni Jehova kag sang palangga gid niya nga Anak nga si Jesus?—Mat. 17:5; 18:20; 28:20.

6. Paano ang pagkamapainubuson nagpalig-on sa isa ka lalaki nga magtambong sa Memoryal?

⁶ Nagapanikasog gid kita kada tuig sa pag-imbitar sa madamo nga tawo nga magtambong sa Memoryal sang kamatayon ni Jesus. Kag madamo nga mapainubuson ang nagabaton sang aton imbitasyon. Binagbinaga ini nga halimbawa. Pila ka tuig na ang nagligad, isa ka lalaki ang ginhatagan sang brother sang imbitasyon para sa Memoryal, pero nagsiling sia nga indi sia makatambong. Pero sang tion na sang Memoryal, nakibot ang brother sang mag-abot ang lalaki sa Kingdom Hall. Nagdayaw gid ang lalaki sa pag-abiabi sa iya sang mga kauturan gani gintambungan man niya ang aton mga miting kada semana. Tatlo lang ka miting sa bilog nga tuig ang wala niya matambungan. Ano nga kinaiya ang nagpalig-on sa iya nga himuon ini? Mapainubuson sia kay ginbag-o niya ang iya hunahuna. Ang brother nga nag-imbitar sa iya nagsiling, “Mapainubuson gid sia nga tawo.” Pat-od gid nga ginbuyok sia ni Jehova sa pagsimba sa Iya. Bawtismado na subong ini nga lalaki.—2 Sam. 22:28; Juan 6:44.

7. Paano ang aton ginatun-an sa mga miting kag ang aton ginabasa sa Biblia makabulig sa aton nga mangin mapainubuson?

⁷ Ang aton ginatun-an sa mga miting kag ang aton ginabasa sa Biblia makabulig sa aton nga mangin mapainubuson. Mga pila ka semana antes sang Memoryal, ang aton mga miting masami nga nagapokus sa mga halimbawa ni Jesus kag sa pagkamapainubuson nga iya ginpakita sang ginhatag niya ang iya kabuhi bilang gawad. Kag mga pila ka adlaw antes sang Memoryal, ginapalig-on kita nga basahon sa Biblia ang mga hitabo antes sang kamatayon ni Jesus asta sa iya pagkabanhaw. Ang aton matun-an sa sini nga mga miting kag ang aton mabasa sa sini nga mga hitabo sa Biblia magabulig sa aton nga apresyahon pa gid ang sakripisyo ni Jesus para sa aton. Gani mapalig-on kita nga ilugon ang iya pagkamapainubuson kag himuon ang kabubut-on ni Jehova, bisan pa mabudlay ini.—Luc. 22:41, 42.

ANG KAISOG NAGAPALIG-ON SA ATON

8. Paano ginpakita ni Jesus ang kaisog?

⁸ Gusto man naton ilugon ang kaisog ni Jesus. Hunahunaa ang iya kaisog mga pila ka adlaw antes sang iya kamatayon. Kabalo sia nga pakahuy-an sia sang iya mga kaaway, sakiton, kag patyon. (Mat. 20:17-19) Pero, kinabubut-on niya nga ginbaton ang iya kamatayon. Sang malapit na sia patyon, ginsilingan niya ang matutom nga mga apostoles nga kaupod niya sa Getsemane: “Tindog kamo, malakat kita. Nagapalapit na ang magaluib sa akon.” (Mat. 26:36, 46) Pag-abot sang isa ka grupo nga may mga armas para dakpon sia, nagpalapit sia sa ila, nagpakilala sia, kag ginsilingan niya ang mga soldado nga palakton ang iya mga apostoles. (Juan 18:3-8) Dalayawon gid ang kaisog ni Jesus! Subong, ginapanikasugan sang hinaplas nga mga Cristiano kag sang mga bahin sang iban nga mga karnero nga ilugon ang kaisog ni Jesus. Paano?

9. (a) Ngaa mahimo nga kinahanglan naton ang kaisog para matambungan sing regular ang mga miting? (b) Ano ang epekto sang aton halimbawa sa mga kauturan nga napriso bangod sa ila pagtuo?

⁹ Para matambungan naton sing regular ang mga miting, mahimo nga kinahanglan naton ang kaisog sa mabudlay nga mga kahimtangan. Ang pila sa aton mga kauturan nagatambong sa mga miting bisan pa nasubuan sila, naluyahan sing buot, ukon indi maayo ang panglawas. Ang pila ka kauturan maisog nga nagatambong sa mga miting bisan pa grabe ang pagpamatok sang ila pamilya ukon sang gobierno. Hunahunaa ang epekto sang aton halimbawa sa mga kauturan nga napriso bangod sa ila pagtuo. (Heb. 13:3) Kon mabalitaan nila nga padayon kita nga nagaalagad kay Jehova bisan may mga pagtilaw, mapalig-on sila nga padayon nga ipakita ang pagtuo, kaisog, kag katutom. Amo sini ang naeksperiensiahan ni apostol Pablo. Sang napriso sia sa Roma, nalipay gid sia sang mabalitaan niya nga ang iya mga kauturan padayon nga nagaalagad sa Dios sing matutom. (Fil. 1:3-5, 12-14) Antes ginbuy-an si Pablo ukon mahimo pagkatapos sia buy-an, nagsulat sia sa mga Hebreo. Ginpalig-on niya ining matutom nga mga Cristiano nga ‘padayon nga ipakita ang ila utudnon nga gugma’ kag indi pagpabay-an ang ila pagtilipon.—Heb. 10:24, 25; 13:1.

10-11. (a) Sin-o ang dapat naton imbitahon sa Memoryal? (b) Suno sa Efeso 1:7, ngaa dapat naton sila imbitahon?

¹⁰ Nagapakita kita sang kaisog kon ginaimbitar naton sa Memoryal ang aton mga paryente, mga kaupod sa trabaho, kag mga kaingod. Ngaa ginaimbitar naton sila? Nagapasalamat gid kita sa ginhimo ni Jehova kag ni Jesus para sa aton amo nga gusto naton nga imbitahon ang iban nga magtambong sa Memoryal. Gusto naton nga matun-an man nila kon paano sila makabenepisyo sa “wala tupong nga kaayo” ni Jehova paagi sa gawad.—Basaha ang Efeso 1:7; Bug. 22:17.

¹¹ Kon nagapakita kita sang kaisog paagi sa pagtambong sa mga miting, ginapakita man naton ang isa pa ka hamili nga kinaiya nga dalayawon nga ginpakita sang Dios kag sang iya Anak.

ANG GUGMA NAGAPALIG-ON SA ATON

12. (a) Paano ang aton mga miting nagapabakod sang aton gugma kay Jehova kag kay Jesus? (b) Para mailog si Jesus, ano ang ginapalig-on sang 2 Corinto 5:14, 15 nga himuon naton?

¹² Ang aton gugma kay Jehova kag kay Jesus nagapalig-on sa aton nga magtambong sa mga miting. Kag ang aton ginatun-an sa mga miting nagapabakod sang aton gugma kay Jehova kag sa iya Anak. Regular kita nga ginapahanumdom sa aton mga miting parte sa ginhimo nila para sa aton. (Roma 5:8) Pero kon Memoryal, mas labi kita nga ginapahanumdom parte sa kadaku sang ila gugma, bisan sa mga wala nakahangop kon daw ano kaimportante ang gawad. Bangod ginapasalamatan gid naton ini, ginatinguhaan naton nga ilugon si Jesus sa aton pagkabuhi adlaw-adlaw. (Basaha ang 2 Corinto 5:14, 15.) Gusto man naton nga dayawon si Jehova sa pag-aman niya sang gawad. Ang isa ka paagi para madayaw naton sia amo ang pagkomento sa aton mga miting.

13. Paano naton mapakita kon daw ano kadaku ang aton gugma kay Jehova kag sa iya Anak? Ipaathag.

¹³ Mapakita naton kon daw ano kadaku ang aton gugma kay Jehova kag sa iya Anak paagi sa aton kahanda nga magsakripisyo para sa ila. Masami nga nagasakripisyo kita para makatambong sa aton mga miting. Madamo nga kongregasyon ang nagahiwat sang isa ka miting kon gab-i, nga mahimo kapoy kita bangod halin kita sa trabaho. Kag ang isa pa ka miting ginahiwat kon Sabado ukon Domingo nga amo ang tion nga ginagamit sang iban nga tawo sa pagpahuway. Nakita bala ni Jehova nga nagatambong kita sa aton mga miting bisan pa kapoy kita? Huo! Kag ginapabaloran gid ni Jehova ang aton mga sakripisyo.—Mar. 12:41-44.

14. Paano si Jesus nagpakita sang pinakamaayo nga halimbawa sang gugma nga handa magsakripisyo?

¹⁴ Si Jesus ang pinakamaayo nga halimbawa sang nagpakita sang gugma nga handa magsakripisyo. Ginpakita niya ini paagi sa iya kahanda nga mapatay para sa iya mga disipulo kag paagi sa pag-una sang ila kaayuhan adlaw-adlaw. Halimbawa, ginhatagan niya sing tion ang iya mga sumulunod bisan pa kapoy sia ukon may ginakabalak-an. (Luc. 22:39-46) Kag nagpokus sia sa kon ano ang mahatag niya sa iban, indi sa kon ano ang mahatag nila sa iya. (Mat. 20:28) Kon may amo man kita sini nga gugma kay Jehova kag sa aton mga kauturan, himuon gid naton ang aton bug-os nga masarangan para matambungan ang Panihapon sang Ginuo kag ang tanan nga miting sang kongregasyon.

15. Sin-o ang gusto gid naton buligan?

¹⁵ Bahin kita sang nagaisahanon nga matuod nga kongregasyon sang mga Cristiano, kag nalipay kita nga imbitahon ang iban nga mag-upod sa aton. Pero, gusto gid naton buligan ang aton mga “masigkatumuluo” nga nangin indi aktibo. (Gal. 6:10) Ginapakita naton ang aton gugma sa ila paagi sa pagpalig-on sa ila nga magtambong sa aton mga miting, ilabi na sa Memoryal. Pareho kay Jehova kag kay Jesus, nalipay gid kita kon ang isa nga indi aktibo magbalik kay Jehova, nga aton mahigugmaon nga Amay kag Manugbantay.—Mat. 18:14.

16. (a) Paano kita makapalig-unay, kag ano ang mabulig sa aton sang aton mga miting? (b) Ngaa maayo gid ini nga tion nga dumdumon ang ginsiling ni Jesus sa Juan 3:16?

¹⁶ Sa masunod nga mga semana, tinguhaan naton nga mag-imbitar sang madamo nga tawo nga magtambong sa Memoryal sa Biernes sang gab-i, Abril 19, 2019. (Tan-awa ang kahon nga “Imbitahon Naton Sila.”) Kabay pa nga magpalig-unay kita sa bilog nga tuig paagi sa pagtambong sing regular sa tanan nga miting nga gin-aman ni Jehova sa aton. Samtang nagahilapit ang katapusan sini nga sistema, kinahanglan naton ang aton miting para buligan kita nga mangin mapainubuson, maisog, kag mahigugmaon. (1 Tes. 5:8-11) Gani bug-os tagipusuon naton nga ipakita ang aton pagpasalamat sa dalayawon nga gugma ni Jehova kag sang iya Anak sa aton!—Basaha ang Juan 3:16.