Buligi ang Iban nga Makabenepisyo sa Gawad
Saulugon ang Memoryal Sang Kamatayon ni Cristo sa Abril 12
1. Ano ang isa ka paagi nga mapakita sang katawhan sang Dios ang ila apresasyon sa gawad?
1 “Salamat sa Dios bangod sa iya di-malaragway nga walay bayad nga dulot.” (2 Cor. 9:15) Ginapabutyag gid sining mga pulong ang aton balatyagon tuhoy sa pagkaayo kag mahigugmaon nga kaayo nga ginpakita sang Dios sa iya katawhan paagi sa iya Anak nga si Jesucristo. Ilabi na nga makita ini nga apresasyon sa aton pagtilipon sa Abril 12 sa pagsaulog sang Memoryal sang kamatayon ni Cristo.
2. Sin-o ang nagabuylog sa mga alagad ni Jehova sa pagsaulog sang Memoryal, kag ano ang dapat nila himuon agod makabenepisyo sa gawad?
2 Mga dies milyones ang nagabuylog sa mga alagad ni Jehova sa pagsaulog sang Memoryal kada tuig. Sa paghimo sini, ginapakita nila ang isa ka kasangkaron sang pag-apresyar sa halad ni Cristo. Apang, agod makabenepisyo sa gawad, dapat sila magtuo sa sini. (Juan 3:16, 36) Paano naton sila mabuligan nga mapalambo ina nga pagtuo? Sa sining panag-on sang Memoryal, mahimo naton sila mapalig-on nga magtuon sa Biblia kag magtambong sa semanal nga mga miting sang kongregasyon. Binagbinaga ang masunod nga mga panugda.
3. Paano naton masugdan ang isa ka pagtuon sa Biblia kon nagaagda sa mga tawo sa Memoryal?
3 Mga Pagtuon sa Biblia: Kon ginaagda mo ang mga interesado nga magtambong sa Memoryal, ngaa indi mo pagtilawan nga sugdan ang isa ka pagtuon sa Biblia upod sa ila sa Ginatudlo Sang Biblia nga libro? Ipaathag sa tawo ang pagsaulog sang Memoryal paagi sa pagbukas sang pahina 206-8 kag binagbinagon ang topiko nga “Ang Panihapon Sang Ginuo—Isa ka Selebrasyon nga Nagapadungog sa Dios.” Mahimo mo tungaon ang pagbinagbinag sini nga impormasyon sa imo duha ka pagduaw, ayhan sa isa ka pagtuon sa Biblia sa ganhaan. Kon matuptupan na ninyo ang materyal, ayhan luyag sang tawo nga hinun-anunan ang kapitulo 5, “Ang Gawad—Ang Labing Bilidhon nga Regalo Sang Dios.” Kon mangin regular na ang pagtuon sa Biblia, mahimo balikan ang unang apat ka kapitulo sang libro.
4. Kay sin-o kita mahimo makasugod sing pagtuon sa Biblia sa panag-on sang Memoryal?
4 Kay sin-o kita mahimo makasugod sing pagtuon sa Biblia sa sining pamaagi? Ayhan magasugot sa sina nga paghinun-anon ang pila sang imo kaupod sa trabaho, kabutho, ukon mga kaingod. Mahimo palapitan sang mga utod nga lalaki ang ditumuluo nga mga bana sang mga utod sa kongregasyon. Kag indi pagkalimti ang inyo di-Saksi nga mga paryente. Dugang pa, luyag naton nga maghinguyang sing pinasahi nga panikasog nga imbitahon sa Memoryal ang mga aktibo nga nagapakig-upod sang una sa kongregasyon. (Luc. 15:3-7) Tinguhaan gid naton nga buligan ini nga mga tawo nga makabenepisyo sa gawad.
5. Paano naton mapalig-on ang mga estudyante sa Biblia kag ang iban pa nga interesado nga magtambong sa semanal nga mga miting sa kongregasyon?
5 Mga Miting sa Kongregasyon: Ang Memoryal amo ang una nga miting nga natambungan sang madamo nga estudyante sa Biblia kag mga interesado. Apang, paano naton sila mapalig-on nga panginpuslan ang iban pa nga miting sa kongregasyon? Ang Mayo 2005 nga Ang Aton Ministeryo sa Ginharian, pahina 1, nagpanugda sang masunod: “Sambita ang tig-ulo sang masunod nga pamulongpulong publiko. Ipakita sa ila ang pagatun-an sa Pagtinuon sa Ang Lalantawan kag sa Pagtinuon Sang Kongregasyon sa Libro. Ipaathag ang Teokratikong Eskwelahan Para sa Ministeryo kag ang Miting sa Serbisyo. Kon may asaynment ka sa eskwelahan, ayhan sarang mo ini maensayo upod sa ila. Ipaambit ang talalupangdon nga mga punto nga ginpresentar sa mga miting. Agdaha sila nga magtambong bisan sa una pa lang ninyo nga pagtuon.”
6. Sa anong duha ka paagi nga mabuligan naton ang mga bunayag sing tagipusuon nga makabenepisyo sa gawad?
6 Kon regular na ang pagtuon sa Biblia sang mga bunayag sing tagipusuon kag magtambong sa mga miting sang kongregasyon sing regular, masami nga madasig ang iya pag-uswag sa espirituwal. Busa, kabay pa nga palig-unon naton ang iban nga panginpuslan ining espirituwal nga mga aman kag makabenepisyo sa labing daku nga dulot sang Dios—ang gawad.