Ginpakamaayo Ako ni Jehova sing Sobra Pa sa Akon Ginpaabot

Sang nagpayunir na ako, nagbag-o ang akon kabuhi nga wala ko gid ginpaabot. (Efe. 3:20) Pero basi mamangkot kamo kon paano ini natabo. Isugid ko anay ang natabo sugod sang natawo ako.

Natawo ako sa Berlin, Germany, pila pa lang ka bulan nga nagsugod ang Bug-os Kalibutan nga Inaway II sang 1939. Sang malapit na matapos ini nga inaway sang 1945, grabe ang pagpamomba sa Berlin sang mga eroplano sang militar. Isa ka bes, ginbombahan ang lugar nga amon ginaistaran, gani nagpalagyo ang amon pamilya sa isa ka palanaguan. Sang ulihi, nagpalagyo kami sa Erfurt, ang lugar nga natawhan ni Nanay.

Gusto gid ni Nanay mabal-an ang kamatuoran. Ginbasa niya ang mga libro sang bantog nga mga manunudlo kag gin-usisa niya ang lainlain nga mga relihion, pero pamatyag niya daw may kulang. Sang mga 1948, duha ka Saksi ni Jehova ang nagkadto sa amon balay. Ginpasulod sila ni Nanay kag madamo sia sing ginpamangkot sa ila. Wala pa isa ka oras, ginsilingan niya kami sang akon manghod nga babayi, “Amo ini ang kamatuoran!” Sang ulihi, nagtambong na kami ni Nanay kag sang akon manghod sa mga miting sa Erfurt.

Sang 1950, nagbalik kami sa Berlin, kag nakig-upod kami sa Berlin-Kreuzberg Congregation. Dayon nagsaylo kami sa isa pa ka lugar sa Berlin, kag nagtambong kami sa Berlin-Tempelhof Congregation. Sang ulihi, nagpabawtismo si Nanay, pero pamatyag ko indi pa ako handa sa sini. Ngaa?

NABATUAN KO ANG AKON PAGKAMAHULUY-ON

Wala ako nag-uswag sa pag-alagad bangod mahuluy-on gid ako. Bisan pa duha ka tuig na ako nga nagaupod-upod sa pagbantala, wala gid ako nakaistorya sa mga tawo. Pero nabuligan ako sang nakilala ko ang maisog nga mga kauturan nga nangin matutom kay Jehova. Ang pila sa ila ginpriso sang mga Nazi ukon sa mga prisuhan sa East Germany. Ang iban sekreto nga nagdala sang mga publikasyon sa East Germany, bisan pa mahimo sila dakpon kag prisuhon. Nagdayaw gid ako sa ila halimbawa. Napensaran ko nga kon sila gani kabuhi gid kag kahilwayan ang ginrisgo nila para kay Jehova kag para sa ila mga kauturan, dapat ko man tinguhaan nga batuan ang akon pagkamahuluy-on.

Nabatuan ko ang akon pagkamahuluy-on sang nag-upod ako sa pinasahi nga pagbantala sang 1955. Sa isa ka sulat nga mabasa sa Informant,a ginpahibalo ni Brother Nathan Knorr nga amo ini ang pinakamasangkad nga pagbantala nga himuon sang organisasyon. Nagsiling sia nga kon suportahan ini sang tanan nga manugbantala, dumdumon gid ini nga amo ang pinakamalipayon nga bulan sa pagbantala. Nangin matuod gid ini! Pagkatapos sini, nagdedikar ako kay Jehova, kag sang 1956, nagpabawtismo ako kaupod ni Tatay kag sang akon manghod. Pero dapat naman ako liwat magdesisyon.

Madugay ko na nga gusto magpayunir, pero pirme ko lang ini ginapaiway. Gusto ko magtuon anay sa Berlin sang parte sa pagbakal kag pagbaligya sang mga produkto sa mga negosyante sa iban nga pungsod. Pagkatapos sini, gusto ko magtrabaho para mangin sagad pa gid ako sa akon propesyon antes magpayunir. Gani sang 1961, nag-obra ako sa Hamburg, ang pinakadaku nga siudad sang Germany nga may pantalan. Nanamian gid ako sa akon trabaho amo nga pirme ko lang ginapaiway ang pagpayunir. Ano ang dapat ko himuon?

Nagapasalamat ako kay Jehova kay gingamit niya ang mapinalanggaon nga mga kauturan para mahangpan ko nga ang pag-alagad sa iya amo ang pinakaimportante. Nagpayunir ang pila ko ka abyan kag maayo sila nga halimbawa sa akon. Ginpalig-on man ako nga magsalig kay Jehova sang isa ka utod nga napriso anay, si Brother Erich Mundt. Nagsiling sia nga sa prisuhan, nagluya ang mga kauturan nga nagsalig sa ila kaugalingon. Pero ang mga nagsalig sing bug-os kay Jehova nagpabilin nga matutom kag nakabulig sa kongregasyon.

Si Brother Martin Poetzinger, nga nangin miembro sang Nagadumala nga Hubon sang ulihi, pirme man nagapalig-on sa mga kauturan paagi sa pagsiling, “Ang kaisog amo ang pinakamapuslanon nga kinaiya nga makabulig sa inyo!” Ginpamalandungan ko ini, gani naghalin ako sa akon trabaho kag nagpayunir sang Hunyo 1963. Amo ini ang pinakamaayo ko nga desisyon! Pagligad sang duha ka bulan, antes pa ako magpangita sang bag-o nga trabaho, gin-asayn ako bilang espesyal payunir. Pila ka tuig sang ulihi, ginpakamaayo ako ni Jehova nga wala ko gid ginpaabot. Gin-agda ako nga mag-eskwela sa ika-44 nga klase sang Gilead School.

ANG IMPORTANTE NGA LEKSION NGA NATUN-AN KO SA GILEAD

“Indi magpadalidali sa pagbiya sa inyo asaynment.” Isa ini sa pinakaimportante nga natun-an ko, ilabi na kanday Brother Nathan Knorr kag Brother Lyman Swingle. Ginpalig-on nila kami nga magpadayon sa amon asaynment bisan may kabudlayan. Si Brother Knorr nagsiling: “Sa ano kamo magakonsentrar? Sa higko, sa mga sapatsapat, sa kaimulon? Ukon makita bala ninyo ang mga kahoy, ang mga bulak, kag ang malipayon nga mga tawo? Palanggaa ninyo ang mga tawo!” Isa ka bes, sang ginapaathag ni Brother Swingle kon ngaa wala nagdugay ang iban nga kauturan sa ila asaynment, daw mahibi sia kag naglumawlumaw ang iya mga mata. Nagpundo sia anay sa paghambal asta nga nagkalma sia. Napalig-on gid ako nga mangin determinado nga indi pagpaslawon ang Cristo kag ang iya matutom nga mga utod.—Mat. 25:40.

Sang nabaton namon ang amon asaynment, ginpamangkot sang iban nga Bethelite ang pila sa amon kon diin kami naasayn. Kanami sang ila ginhambal parte sa kada lugar nga kadtuan sang iban ko nga klasmeyt. Dayon nagsiling ako: “Congo (Kinshasa).” Pagkahambal ko sini, daw naurungan sila kag nagsiling: “Ay abaw! Congo? Kabay pa nga ubayan ka ni Jehova!” Pirme sadto ginabalita nga nagailinaway kag nagapinatyanay ang mga tawo sa Congo (Kinshasa). Pero ginpamalandungan ko ang mga natun-an ko. Pagkatapos sang amon gradwasyon sang Septiembre 1967, nagbiyahe kami nanday Heinrich Dehnbostel kag Claude Lindsay pakadto sa Kinshasa, ang kapital sang Congo.

MADAMO KAMI SING NATUN-AN BILANG MISYONERO

Pag-abot namon sa Kinshasa, nagtuon kami sang French sing tatlo ka bulan. Dayon nagbiyahe kami sa eroplano pakadto sa Lubumbashi, nga ginatawag sadto nga Elisabethville, malapit sa dulunan sang Zambia sa bagatnan sang Congo. Nag-istar kami sa balay para sa mga misyonero sa sentro sang siudad.

Wala pa sadto mabantalaan ang kalabanan nga lugar sa Lubumbashi, gani kami ang una nga nakasugid sang kamatuoran sa madamo nga nagaistar diri. Kadamo gid sang gusto magtuon sang Biblia amo nga indi na namon matudluan ang iban sa ila. Nagbantala man kami sa mga opisyal nga nagaobra sa gobierno ukon sa mga pulis. Madamo ang nagapabalor gid sa Pulong sang Dios kag nagaapresyar sa aton pagbantala. Ang kalabanan sa mga tawo nagahambal sing Swahili, gani nagtuon man kami ni Claude Lindsay sini nga lenguahe. Sang ulihi, gin-asayn kami sa Swahili nga kongregasyon.

Madamo kami sang makalilipay nga mga eksperiensia, pero may mga kabudlayan man kami nga naagyan. Ang hubog nga mga soldado nga may mga pusil ukon ang nagapanggamo nga mga pulis masami nga nagaakusar sa amon sang wala man namon ginhimo. Isa ka bes, ginsulod sang madamo nga pulis nga may mga pusil ang amon balay samtang nagahiwat kami sang miting sang kongregasyon kag gindala kami nga mga lalaki sa presinto. Ginpalumpagi nila kami sa mahigko nga salog asta mga alas dies sang gab-i kag ginbuy-an.

Sang 1969, gin-asayn ako bilang nagalakbay nga manugtatap. Kon kaisa, ginalatas ko ang malayo nga mga lugar nga nagaagi sa lunang kag matag-as nga mga hilamon, nga kinaandan sa Africa. Sa isa ka baryo, may munga kag mga piso sa idalom sang katre nga ginatulugan ko kon gab-i. Indi ko gid malipatan nga ginapukaw ako sini nga dulom pa kay katunog gid sang panukturuok sini. Nalipay ako kon madumduman ko ang mga gab-i nga nagaistoryahanay kami sang mga kauturan parte sa kamatuoran samtang nagapungko sa tupad sang dabok.

Nangin daku gid namon nga problema ang nagpakunokuno nga mga Saksi nga bahin gali sang grupo nga ginatawag nga Kitawala.b Ang iban sa ila nagpabawtismo kag nangin mga gulang pa gani sa kongregasyon. Daw pareho sila sang “mga bato nga natago,” pero wala madaya sang madamo sa ila ang matutom nga mga kauturan. (Jud. 12) Wala sila gintugutan ni Jehova nga magpabilin sa mga kongregasyon. Sang napahalin na sila, madamo pa gid nga tawo ang nangin Saksi.

Sang 1971, gin-asayn ako sa sanga talatapan sa Kinshasa. Nagtrabaho ako sa mga departamento nga nagatatap sang mga sulat kag mga order sa literatura. Nagtrabaho man ako sa Service Department. Sa Bethel, natun-an ko ang pag-organisar sang aton hilikuton sa isa ka daku nga pungsod nga kulang sing mga dalan, kuryente, kag iban pa nga serbisyo. Kon kaisa, binulan pa nga mabaton sang mga kongregasyon ang amon ginpadala nga mga sulat. Ipadala ini sa eroplano, dayon ikarga sa mga baruto nga sinemana nga indi makahalin bangod sang madamo nga water lily. Pero nalampuwasan namon ang mga kabudlayan pareho sini.

Nagdayaw gid ako sa mga kauturan kay makahiwat kami sang dalagku nga mga kombension bisan pa pigado lang kami. Nagahimo sila sang stage sa mga bungsod sang anay. Ginabugkos nila ang mga kugon para mangin mga dingding kag ginahapnig ang mga kugon para mangin mga pulungkuan. Ginagamit nila ang mga kawayan para sa balayan kag ang mga tabun-ak para sa mga atop kag mga lamesa. Bangod wala sila sing lansang, ginagamit nila ang panit sang kahoy para panghigot. Nagadayaw gid ako sa maayo nga mga ideya kag pamaagi sini nga mga kauturan bisan pa mabudlay ang ila kahimtangan. Ginpalangga ko gid sila. Nasubuan gid ako sang ginbiyaan ko sila bangod sang akon bag-o nga asaynment.

NAG-ALAGAD AKO SA KENYA

Sang 1974, ginsaylo ako sa sanga talatapan sa Nairobi, Kenya. Madamo gid kami sing ginahimo diri, kay ginasuportahan sang sanga talatapan sa Kenya ang pagbantala sa napulo ka malapit nga mga pungsod, kag ang pila sini nagdumili sa aton hilikuton. Pila ka beses ako nga gin-asayn sa pagduaw sa sini nga mga pungsod, ilabi na sa Ethiopia, diin ginhingabot ang mga kauturan kag nagbatas sang mabudlay gid nga mga pagtilaw. Madamo sa ila ang ginsakit ukon ginpriso, kag ginpatay pa gani ang iban. Pero nagpabilin sila nga matutom bangod sang ila maayo nga kaangtanan kay Jehova kag sa kada isa.

Sang 1980, nalipay gid ako sang nagpakasal kami ni Gail Matheson, nga taga-Canada anay. Klasmeyt ko sia sa Gilead. Nagasulatay anay kami kay nagaalagad sia bilang misyonero sa Bolivia. Pagligad sang 12 ka tuig, nagkit-anay kami liwat sa New York. Sang ulihi, nagpakasal kami sa Kenya. Nagapasalamat gid ako kay Gail bangod pirme sia nagahunahuna pareho kay Jehova kag kontento sia sa kon ano lang ang ara sa iya. Padayon niya ako nga ginasuportahan kag ginapalangga.

Sang 1986, gin-asayn ako bilang nagalakbay nga manugtatap samtang nagaalagad bilang miembro sang Komite sang Sanga. Ginduaw namon ang madamo sa mga pungsod nga ginatatap sang sanga sa Kenya.

Nadumduman ko ang paghanda namon para sa kombension sa Asmara (sa Eritrea) sang 1992 sang tion nga wala ginadumilian ang aton hilikuton sa sini nga lugar. Ang nakita lang namon nga lugar para hiwatan sang kombension amo ang isa ka malaw-ay nga kamalig, kag indi pa gid manami ang hitsura sini sa sulod. Sang adlaw na sang kombension, nagdayaw gid ako sang nakita ko nga nakay-o ini sang mga kauturan kag katahom na sa sulod sini, kag nagakabagay na nga gamiton sa pagsimba kay Jehova. Madamo nga pamilya ang nagdala sang matahom nga mga tela kag gintabunan nila sing maayo ang tanan nga indi manami tulukon. Makalilipay gid ang amon kombension nga gintambungan sang 1,279.

Namag-o man kami sa amon mga ginadayunan kay lainlain ini kada semana. Isa ka bes, nagdayon kami sa isa ka daku kag matahom nga balay sa higad sang baybay. Sang lain naman nga tion, nagdayon kami sa gamay nga balay nga human sa sin, kag sobra 100 ka metro ang kalayuon sang kasilyas. Pero diin man kami nagaalagad, mas ginapabaloran namon ang mga tion nga masako kami sa pag-alagad upod ang mapisan nga mga payunir kag manugbantala. Sang nabaton namon ang amon bag-o nga asaynment, biyaan naman namon ang madamo nga abyan nga ginpalangga namon kag hidlawon gid kami sa ila.

GINPAKAMAAYO KAMI SA ETHIOPIA

Sang 1987 asta 1992, nangin legal ang aton hilikuton sa pila ka pungsod nga ginatatap sang sanga sa Kenya. Gani ang kada isa sini may kaugalingon na nga talatapan. Sang 1993, gin-asayn kami nga mag-alagad sa talatapan sa Addis Ababa, Ethiopia, diin nangin legal na ang aton hilikuton pagligad sang madamo nga tinuig nga ginhimo ini sing sekreto.

Ginpakamaayo ni Jehova ang hilikuton sa Ethiopia. Madamo nga kauturan ang nagpayunir. Sugod sang 2012, sobra 20 porsiento sang tanan nga manugbantala ang nagaalagad bilang regular payunir kada tuig. Ginhanas man ang mga kauturan sa teokratiko nga mga eskwelahan, kag sobra 120 ka Kingdom Hall ang napatindog. Sang 2004, nagsaylo sa bag-o nga pasilidad ang pamilya Bethel, kag ang tupad sini nga Assembly Hall isa man ka pagpakamaayo sa mga kauturan.

Nangin suod namon ni Gail nga mga abyan ang aton mga kauturan sa Ethiopia sa mga tinuig nga nakaupod namon sila. Palangga gid namon sila bangod sang ila gugma kag kaayo. Subong, nagluya na ang amon panglawas, gani ginsaylo kami sa sanga talatapan sa Central Europe. Mahigugmaon kami nga ginaatipan diri, pero nahidlaw gid kami sa amon pinalangga nga mga abyan sa Ethiopia.

SI JEHOVA ANG NAGPATUBO

Nakita namon ang pag-uswag nga ginpahanabo ni Jehova sa iya hilikuton. (1 Cor. 3:6, 9) Halimbawa, sang una ako nga nagbantala sa mga taga-Rwanda nga nagamina sing saway sa Congo, wala pa sang manugbantala nga nagareport sa Rwanda. Subong, sobra 30,000 na ang mga kauturan sa sini nga pungsod. Sang 1967, may mga 6,000 ka manugbantala sa Congo (Kinshasa). Subong, mga 230,000 na sila, kag sobra isa ka milyon ang nagtambong sa Memoryal sang 2018. Sa tanan nga pungsod nga ginaatipan anay sang sanga talatapan sa Kenya, may sobra na 100,000 ka manugbantala.

Sang nagligad nga sobra 50 ka tuig, gingamit ni Jehova ang madamo nga kauturan para palig-unon ako nga mag-alagad sing bug-os tion. Mahuluy-on ako gihapon, pero natun-an ko nga magsalig sing bug-os kay Jehova. Bangod sang akon mga eksperiensia sa Africa, nangin mapinasensiahon ako kag kontento. Nagadayaw gid kami ni Gail sa aton pinalangga nga mga kauturan nga maabiabihon, nagbatas sang mabudlay nga mga problema, kag nagsalig kay Jehova. Ginapasalamatan ko gid ang iya wala tupong nga kaayo. Ginpakamaayo gid ako ni Jehova sing sobra pa sa akon ginpaabot.—Sal. 37:4.