Dayawa ang Dios sang Pagpanuga

¹ Matahom nga mga talan-awon, maduagon nga pagtunod sang adlaw, mabituunon nga kalangitan sa kagab-ihon, malulot nga ambahanon sang kapispisan​—kay sin-o mo ginapatungod ang kadayawan sa sining makalilipay nga mga butang? Huo, ginapahulag kita nga dayawon ang Dios sang pagpanuga. Bug-os tagipusuon kita nga nagaugyon sa ginasiling sang Bugna 4:11. Bangod sang pagtuga niya sa tanan nga mga butang, si Jehova nga Dios takus sang aton pagdayaw.

² Walay sapayan sang pamatuod sang mga buhat sa pagpanuga sang Dios, ang mga tawo nagpauswag sang ideya nga ang kabuhi nagluntad sing aksidente ukon paagi sa bulag nga ebolusyon. Ining daku nga kabutigan nagpanubo kag nagpaluya sa mga tawo, kag isa ini ka mapasipalahon nga pagpakahuya sa aton Dakung Manunuga.​—Manugw. 12:1; Roma 1:​20, 25.

³ Sa Hunyo, subong matutom nga mga alagad ni Jehova, may kahigayunan kita nga itanyag ang kamatuoran nahanungod sa aton Manunuga kag sa iya makatilingala nga mga binuhatan. Ang libro nga Life​—How Did It Get Here? By Evolution or by Creation? igatanyag sa tanan nga nagapakita sing interes sa paghibalo sang mga kamatuoran nahanungod sa ginhalinan kag katuyuan sang kabuhi. Ini nga publikasyon nagasangkap sa aton nga mapangapinan sing maayo ang kamatuoran nahanungod sa ginhalinan sang kabuhi.

⁴ Pinasahi nga mga Teritoryo: Luwas sa pagpanaksi sa pamalaybalay, pinasahi naton nga mapanikasugan nga masugilanon ang mga tawo nga may partikular nga interes sa topiko sang ebolusyon, ukon pagpanuga, hambalon sila sa ila ulubrahan ukon eskwelahan. Halimbawa, ginpakita ini sang lamharon nga mga Saksi sa ila mga manunudlo. Isa ka Saksi nga pamatan-on ang naghatag sa iya manunudlo sing Creation nga libro kag nakibot sia sa paghibalo nga wala lamang ini gintun-an sang manunudlo kundi ginsugdan nga gamiton ini subong sadsaran sa pagtudlo sa klase. (l90 9/1 p. 32; l86 10/1 p. 32) Ngaa indi palapitan ang kada isa sang imo mga manunudlo kag mga kabutho nga sa banta mo malipay sa pagbasa sining publikasyon?

⁵ Ang pinasahi nga panikasog sarang mapatuhoy sa paglab-ot sa mga estudyante kag mga edukador sa kolehiyo nga nagaistar ukon nagatrabaho sa inyo teritoryo. Ang mga propesyonal subong sang mga abogado kag mga doktor nagpasalamat sa kadalom sang panalawsaw kag dokumentasyon nga masapwan sa Creation nga libro. (yb87 p. 54) Yadtong imo masugilanon mahimo man maluyag sa pagtigayon sining matahom sing laragway nga publikasyon subong reperensia.

⁶ Maalamon nga itanyag ang Creation nga libro sa tanan nga masugilanon naton sa Hunyo. Walay duhaduha nga samtang ginapaathag mo ang isa ukon kapin pa ka espesipiko nga mga punto gikan sa libro nga edukasyunal kag nagatukod sing pagtuo sa Manunuga, madamo ikaw sing masapwan nga maluyag sa pagtuon sing dugang pa kag handa sa pagkuha sing libro.

⁷ Kabay nga ining matahom nga instrumento indi lamang magabulig sa madamo pa nga makita kon daw ano ka sayop ang teoriya sang ebolusyon kundi magabulig man sa ila sa pagpalambo sing apresasyon para sa “Magbubuhat sang langit kag duta.”​—Sal. 146:6.