Pat-ura nga Magduaw Liwat
1 “Sa sulod sang nagligad nga duha ka tuig, nabasa ko [ang Creation nga libro] sing makap-at kag nagadayaw gihapon ako sa madalom nga pagtuon, kaalam, kag dokumentasyon nga ginhimo sa pagbalhag sini. Ini nga libro dapat makadangat sa mga kamot sang tagsa ka tawo sa kalibutan. Kon matabo ini, ang tanan nga pagmulay kag kagumon tuhoy sa aton ginhalinan kag ang ateistikong pagpati matapos sa gilayon.” Sulat sang isa ka abogado, subong ginreport sa Mayo 8, 1992, pahina 32 nga Magmata!
2 Bangod sang subong sina kaayo nga komento, indi bala kita tanan maluyag sa pagpahamtang sang Creation nga libro sa madamong interesado kon mahimo? Nian dapat naton pat-uron nga magduaw liwat agod pukawon ang padayon nga interes sa sining publikasyon.
3 Wala sing isa sa aton ang nakahimo sing detalyado nga pagtuon sa madamong teoriya nga ginpauswag sang mga ebolusyunista. Apang, indi kinahanglan nga hibaluon naton ang tanan nga mga teoriya sang mga ebolusyunista agod ipakita sa bunayag nga mga tawo ang daku nga pamatuod nga ang panudlo sang ebolusyon isa pa ka paagi nga ginagamit ni Satanas sa pagpasipala sa Manunuga sang katawhan. Indi mang-alag-ag nga magduaw liwat sa kahadlok nga basi indi mo masabat ang teknikal nga mga pamangkot nga mahimo ipamangkot sang iban. Ang publikasyon mismo nagahatag sing bugana nga pamatuod para sa tagsa ka pinamulong nga ginahimo sini.
4 Dugang pa, ang kapitulo 16 tubtob 20 may madamo nga impormasyon nahanungod sa panudlo sang Biblia tuhoy sa ginhalinan sang katawhan, sa katuyuan sang Dios para sa sining duta kag tawo, kag sa mga pagpili nga nagaatubang sa katawhan karon. Gani may madamong maayong impormasyon nga matigayon para sa paghimo sing mga pagduaw liwat.
5 Kon ikaw nagapang-alag-ag sa pagduaw liwat, ngaa indi paupdon ang isa nga mas eksperiensiado ukon ang isa nga mas nakahibalo sa panudlo sang ebolusyon? Ayhan isa ka mas batan-on nga utod nga lalaki ukon babayi nga nagatuon sa eskwelahan nga mas pamilyar sa karon nga mga teoriya sang ebolusyon. Ukon ayhan isa sa inyo kongregasyon nga nagapati anay sa ebolusyon apang nakatuon na sang kamatuoran sang Biblia kag karon makabulig sa pagbali sa butig nga mga panudlo sang ebolusyon.
6 Indi mang-alag-ag sa pagpatuhoy sang igtalupangod sa kapitulo 19 sang Creation nga libro kag sa paggamit sang paglaum sang Biblia tuhoy sa palaabuton subong sadsaran sang imo pagduaw liwat. Ina nga kapitulo may madamong punto nga sarang magamit sa pagpalig-on sa isa ka tawo nga tun-an ang nahanungod sa mga saad sang Biblia para sa palaabuton. Magamit mo ang seksion sa umpisa sang pahina 236 sa subtitulo nga “The Earth Transformed,” sundan sang “An End to Poverty” kag “No More Sickness, No More Death” sa pahina 238-9.
7 Ining matahom nga publikasyon nakabulig sa madamo nga tawo sa pagsapo sang dalan padulong sa kabuhi. Mabuligan naton ang iban pa paagi sa pagpalig-on sa ila nga basahon ang ginasiling sang Creation nga libro nahanungod sa kabuhi kag kon paano ini nagluntad diri.