Pamangkot

◼ Dapat bala naton teleponohan ang Sosiedad agod matigayon ang mga sabat sa mga pamangkot sa Biblia ukon ang personal nga laygay?

Madamo nga tawo ang nagagamit sing telepono agod mangin madasig, apang sa masami labi pa sa kadasig ang nadalahig. Sa kalibutan kinaandan na nga unahon ang personal nga kasulhay; ang mga tawo nagalikaw sa pagpanikasog.

Kabaliskaran gid sa laygay sang Dios! Ginalaygayan niya kita nga pangitaon ang ihibalo subong sang natago nga bahandi, nga nagapakita sang aton kahanda sa pagpanikasog. Ginapakita sang eksperiensia nga ang paghimo naton sini nagaresulta sa mas mapinadayunon nga kaayawan.​—Hulu. 2:​1-4.

Ina nga panikasog nagakaigo kon magautwas ang pamangkot samtang nagahanda kita para sa isa ka miting ukon nagaatubang kita sing personal nga problema. Sa baylo nga teleponohan ang Sosiedad, makabenepisyo kita paagi sa personal nga pagpanalawsaw sa Biblia kag sa aton mga publikasyon, labi na sa Watch Tower Publications Index.

Pagkatapos naton ‘mapangita ang natago nga mga bahandi,’ sarang naton mapalapitan ang isa sang lokal nga mga gulang kon nagakinahanglan gihapon kita sing bulig. Ang mga gulang may eksperiensia sa pagpangita sing impormasyon. Ang ila timbang nga bulig labi na nga nagakaigo kon nagakinahanglan kita sing laygay tuhoy sa isa ka personal nga problema ukon desisyon, kay malapit sila sa aton kag sa aton kahimtangan.​—Ipaanggid ang Binuhatan 8:​30, 31.

Kon daw kinahanglan gihapon ang dugang nga impormasyon sing direkta gikan sa Sosiedad, masami nga mas maayo ang magsulat. Magahatag ini sing tion nga masabat ina nga sulat pasad sa nagakaigo nga panalawsaw, nga masami nga imposible sa telepono.