“Nagapanudlo . . . sang mga Butang nga Ginsugo Ko sa Inyo”
1 Ang paghimo sing mga disipulo nagalakip sang pagpanudlo. Antes ang isa ka indibiduwal mangin disipulo ni Cristo, dapat sia tudluan “sa pagtuman sang tanan nga mga butang” nga ginsugo ni Jesus. (Mat. 28:19, 20) Ang pinakamaayo nga paagi sa paghimo sini amo ang isa ka pagtuon sa Biblia sa puluy-an.
2 Ang mga pagtuon sa Biblia indi pirme mahapos sugdan, apang indi magluya ang buot. Ang kadalag-an sa pagsugod sing mga pagtuon sa Biblia nagakinahanglan sing determinasyon kag sing hanuot nga handum nga ipaambit ang kamatuoran sa iban.—Gal. 6:9.
3 Pagpalambo sing Interes: Sa imo nahauna nga pagduaw, depende sa mga sirkunstansia, ang isa ka tract, brosyur, ukon mga magasin mahimo mabilin sa tagbalay. Mahimo mo magamit ang isa sini sa pagsugod sing pagtuon sa Biblia sa puluy-an. Kon ang tagbalay nagapakita sing dugang nga interes sa mensahe, mahimo sia mapatuhoy sa isa pa ka nagakaigo nga publikasyon sa masunod nga pagduaw.
4 Ang paghanda amo ang yabi sa kadalag-an. Ngaa indi magpili sing abanse sing isa ka teksto sa Kasulatan nga ginbalikwat sa tract, brosyur, ukon magasin nga ginaplano mo nga gamiton sa imo pagduaw liwat? Sa sinang paagi sarang mo maangot ang mga komento gikan sa publikasyon sa imo pagpakigsugilanon. Mahimo mo pa gani mabasa ang isa ukon duha ka parapo sing direkta gikan sa publikasyon.
5 Mahimo mo ini isiling:
◼ “Ginasugid namon ang pila ka impormasyon nahanungod sa talalupangdon nga tagna nga nagakatuman karon mismo.” Basaha ang Mateo 24:3, nian iangot ang laragway kag ang mga komento sa pahina 24 sang “Toloka!” nga brosyur. Ang kaanggid nga pagpalapit mahimo magamit sa pagtanyag sing tract nga Ini Bala nga Kalibutan Makalampuwas?
6 Kon ginpakita ang matuod nga interes, dapat ini sa gilayon tatapon. Tinguhai nga makabalik sa sina mismo nga semana agod ang katapusan nga paghambalanay mangin lab-as gihapon sa hunahuna sang tagbalay. Sa kada pagduaw mo, binagbinaga ang pila ka parapo gikan sa publikasyon nga ginbilin mo. Nian, sa nagakaigo nga tion, sarang mo mapakilala ang Mabuhi sing Dayon nga libro, nagapadayon sang amo gihapon nga paagi.
7 Sa karon daku gihapon nga hilikuton ang pagahimuon sa dakung tig-alani nga gintagna ni Jesus. (Mat. 9:37, 38) Samtang padayon naton nga ginatudluan ang mga bunayag sing tagipusuon, naghatag sa aton si Jesus sing makapabakud nga pasalig nga ‘magaupod sia sa aton sa tanan nga adlaw tubtob sa katapusan sang sistema sang mga butang.’