Mangin Mapasibusibuon sa Inyo Ministeryo
1 Ginasiling nga ang pagkananuhaytuhay amo ang rekado sang kabuhi. Sa masami, ang lainlain nga pagpalapit sa topiko nagahimo sini nga mas makawiwili. Matuod ini sa aton ministeryo. Kon indi kita maghalong, ang aton mga presentasyon mahimo nga palareho lamang. Ang pagsulit sing amoamo gihapon nga mga introduksion makatalaka sa aton kag sa mga tagbalay. Busa, mangin mapasibusibuon sa inyo ministeryo. Paano ini himuon?
2 Sa baylo nga magsiling, ‘Maayong aga. Nagaduaw kami sa amon mga kaingod nga dala ang maayong balita sang Ginharian,’ ngaa indi maghunahuna sing mga paagi sa paglainlain sang imo nagabukas nga mga tinaga? Sa pahina 9-15 sang Reasoning nga libro, may introduksion sa 18 ka lainlain nga topiko. Kag may yara duha, tatlo, ukon kapin pa ka introduksion para sa kalabanan nga mga topiko.
3 Kon ginagamit mo ang brosyur nga “Nagaulikid Gid Bala ang Dios sa Aton?” ining introduksion gikan sa seksion nga “Life/Happiness” sa pahina 13 makabulig:
◼ “Ginasugilanon namon ang mga tawo nga nabalaka sa kalidad sang kabuhi karon. Madamo ang nagapamangkot, Posible bala ang malipayon gid nga kabuhi? Ini nga brosyur nagahatag sing makapalig-on nga pagtamod.” Buksi ang brosyur sa pahina 25 kag basaha ang mga punto gikan sa parapo 15 kag 16.
4 Nasapwan sang iban nga mga manugbantala nga sarang magamit ang makawiwili nga pagpalapit paagi sa mga tract.
Ang isa ka lamharon nga manugbantala mahimo maggamit sing tract nga “Magkalipay sa Pagkabuhi Subong Pamilya” kag magsiling:
◼ “May malip-ot ako nga mensahe para sa imo kon paano ihiusa sang Dios ang mga pamilya sa kalipay. Luyag ko ihatag sa imo ining tract nga natig-uluhan Magkalipay sa Pagkabuhi Subong Pamilya.” Ang may mas edad nga manugbantala nga nagapangabudlay upod sa pamatan-on makapamat-od nian kon bala magahatag sia sing dugang pa nga mga komento.
5 Kon ang tagbalay nagapakita sing interes, ang may mas edad nga manugbantala mahimo makasiling:
◼ “Ginapakita sang Biblia ang nagakaigo nga papel sang bana, asawa, kag kabataan sa kahimusan sang pamilya. Sanglit ang Dios amo ang Ginhalinan sang pamilya, indi ka bala magaugyon nga sia ang labing maayo nga makasugid sa aton kon paano dapat magpanghikot ang pamilya? Luyag ko mabatian ang imo opinyon tuhoy sa laygay sang Biblia sa mga katapo sang pamilya.” Nian basaha ang Efeso 5:22, 23, 28-31.
6 Kon ginagamit mo ang Creation nga libro, ngaa indi ipatalupangod ang palaabuton nga ginahatag sang Bugna 21:3, 4? Nian basaha ang parapo 13 sa pahina 239 sang libro. Pamangkuta ang tagbalay kon nagapati sia nga tumanon sang Dios ining mga saad. Ang malip-ot nga paghinun-anon sa mga tagna sang Biblia nga natuman na, subong sang ginapakita sa kapitulo 18 sang libro, dapat magpabakod sang pagtuo sang tagbalay sa ikasarang sang Dios sa pagpakamaayo sa katawhan.
7 Ang tanan nga mga manugbantala sang Ginharian maluyag makigbahin sa pagpauswag sang teokratikong mga interes, pagtanum sing mga binhi sang kamatuoran kon diin posible kag pagpalambo sang interes nga ginpakita. Bangod ginhimo naton ang aton bahin, malipayon naton nga matugyan ang palaabuton nga pagtubo sa kamot ni Jehova.—1 Cor. 3:6.