Mga Introduksion sa Pagpukaw sing Interes
1 Si Jesus lantip sa paggamit niya sing mga introduksion. Nagapamulong man sa isa ka daku nga grupo ukon sa isa ka tawo, nabihag ni Jesus ang igtalupangod sang iya tumalambong paagi sa paglakip sa ila sing personal. Ginpakita niya sa iya mga tagpalamati ang kabilihanan sang iya tema.—Mat. 5:3-12; Luc. 20:25-37; Juan 4:7-30.
2 Kinahanglan ang Abanse nga Paghanda: Agod mapukaw ang interes sa aton mensahe, kinahanglan naton ibagay ang aton mga introduksion agod magalakip ini sa indibiduwal, magahilabot sa iya mga kabalaka, kag magapakita nga ang mensahe sang Ginharian magabulig sa iya sing personal.
3 Sa paghanda para sa ministeryo, repasuha ang una nga ginakabalak-an sang mga tawo sa komunidad. Ano ang magawili sa pamatan-on? Sa may edad? Sa mga bana, mga asawa, ukon mga ginikanan? Sa baylo nga gamiton ang pareho nga introduksion sa tagsa ka ganhaan, masami nga mas epektibo ang paghanda sing lainlain nga mga introduksion kag mangin handa sa pagpasibu sini samtang ginapanilagan mo ang reaksion sang mga tagbalay. Magahupot ini sang imo introduksion nga bag-o kag makawiwili.
4 Sa bulan sang Pebrero, ayhan luyag mo gamiton ang presentasyon nga kaangay sini sa “Mabuhi sing Dayon” nga libro:
◼ “Maayong aga. Ginasugilanon namon ang mga kaingod nahanungod sa kon anong mga kinaiya ang luyag nila makita sa isa ka tawo nga nagagahom sa iban. Mahimo ko bala ikaw mapamangkot kon anong mga kinaiya sa banta mo ang labing importante? [Pasabta sia.] Nahibaluan mo bala nga ginalaragway sang Biblia ang mga kalipikasyon sang Isa nga nahamut-an nga mangin gumalahom sang katawhan? Yari ini sa Isaias 9:6, 7. [Basaha.] Mangin kaangay sang ano sa banta mo ang magkabuhi sa idalom sina nga gumalahom? Pasabta sia kag nian ipatuhoy ang igtalupangod sa Mabuhi sing Dayon nga libro sa pahina 112 kag 113 sa pagpukaw sang dugang nga paghinun-anon.
5 Kon nagapakighambal ka sa mga pamilya, ang masunod nga presentasyon mahimo nga epektibo kon ginagamit ang Mabuhi sing Dayon nga libro.
Pagkatapos sang lokal nga panamyaw, mahimo ka makasiling:
◼ “Napanilagan mo bala nga ang adlaw-adlaw nga mga pag-ipit kag mga problema isa gid ka hangkat sa mga pamilya karon? [Pasabta sia.] May opinyon ka bala kon diin makapangayo sing maayo nga laygay ang mga pamilya? [Pasabta sia.] Ginapatuhoy namon ang igtalupangod sa ginasiling sang Biblia nahanungod sini nga tema. Talupangda kon ano ang ginsiling sang Nag-umpisa sang pag-asawahay sa nahaunang tawhanon nga mag-asawa.” Basaha ang Genesis 1:28 kag nian buksi ang pahina 238 sang Mabuhi sing Dayon nga libro kag padayuna ang inyo paghinun-anon, nga nagagamit sang mga punto gikan sa kapitulo 29.
6 Paagi sa pag-ilog sang mga metodo ni Jesus sa pagkuha sang interes kag paglakip sa mga tagpalamati sa paghinun-anon, ginapakita naton sa mga bunayag sing tagipusuon ang kabilihanan sang espirituwal nga mga butang.