Paggamit sing mga Brosyur sa Pagpangita sa mga Interesado
1 Ang mga brosyur epektibo nga mga instrumento. Sa 32 ka pahina lamang, malig-on nga mapasad sang brosyur ang Makasulatanhon nga mga kamatuoran kag mabaliskad ang mga pangatarungan kag mga panudlo nga supak sa ihibalo sa Dios.—2 Cor. 10:5.
2 Sa tapos mabasa ang brosyur nga Mga Saksi ni Jehova—Nahiusa nga Nagahimo sang Kabubut-on sang Dios sa Bug-os nga Kalibutan, ang isa ka tawo nagsulat: “Wala pa ako makakita sing subong nga organisasyon. . . . Makadalayaw makita ang mga tawo nga nagahimo sang kabubut-on sang Dios sing hanuot sa sining dag-on sang dakung relihiosong pagkasalimpapaw.” Gintun-an sang isa ka albularyo sa Aprika ang brosyur nga Agoma ang Kabuhi sa Duta sing Dayon! Ano ang epekto sini sa iya? Gin-untat niya ang iya pagkaalbularyo kag ginbulagan ang mga babayi nga ginpuyopuyo niya luwas sa iya una nga asawa. Nian ginpakaslan niya sia.
3 Ang brosyur nga Dapat Ka Bala Magpati sa Trinidad? isa ka epektibo nga instrumento sang kamatuoran. Ang isa ka manunulat para sa The Sunday Gleaner sa Jamaica, nagsiling tuhoy sini: “Ang publikasyon . . . isa ka obra-maestra sang mga Saksi kag karon wala sing Trinitaryo ang luwas. . . . Mabudlay gid para sa sining manunulat sang relihion nga makita kon paano masabat sang ordinaryo nga katapo sang iglesia ang . . . mga argumento nga gintipon sang mga Saksi batok sa pagpati nga si Jesus Dios.”
4 Gamita Ini sing Maayo: Agod mangin epektibo, ining makagalanyat nga mga instrumento dapat ipahamtang sa mga tawo nga magabasa sini. Sanglit nanarisari ang aton mga brosyur, nga ang tagsa nagahinun-anon sang lainlain nga tema, dapat naton panikasugan nga itanyag ang isa nga sa banta naton labing nagakaigo para sa indibiduwal nga aton ginapanaksihan. Bangod nabasa naton sing maayo ang aton mga brosyur kag may nanarisari sini, mas mahapos naton ini magamit, sa pag-alagad sa latagon, sa balay, ukon sa bisan diin man.
5 Halimbawa, kon nagapakighambal sa isa nga naligban sa doktrina nga Trinidad sang Cristiandad ukon mahimo nagahunahuna nga si Jesus Dios, diin nga brosyur ang gamiton mo? Kon ang isa mamangkot kon ngaa ang isa ka mahigugmaon nga Dios nagapahanugot sa daku nga pag-antos, diin nga brosyur ang nagakaigo? Kon ang isa ka tawo nagapabutyag sing kabalaka nahanungod sa pagkakinahanglanon sang isa ka gobierno nga magabulig sa katawhan, ano ang nagakabagay nga brosyur para sa iya?
6 Dugang sa paghibalo kon diin nga brosyur ang gamiton, panikasugi nga pukawon ang gana sang tawo tuhoy sa mga kaundan sini. Ipakita ang isa ka komento ukon ilustrasyon nga mahimo makapukaw sang iya interes nga basahon ang materyal. Ukon mahimo nimo mabasa ang isa ukon duha ka parapo sa iya, mapangita ang mga teksto, kag mapaathag ang materyal. Madamong maayong pagtuon sa Biblia ang nasugdan sa sining paagi.
7 Ang aton mga brosyur nagahatag sing Makasulatanhon nga mga sabat kag nagapatudok sing paglaum sa mga nagapanghayhay kag nagabakho sa makangilil-ad nga mga butang nga ginahimo sa kalibutan. (Ipaanggid ang Ezequiel 9:4.) Ang mga tawo nga katulad-karnero magahulag sa mensahe nga ginaunod sina nga literatura. Pribilehiyo naton nga gamiton sing maayo ang mga brosyur samtang ginapangita naton ang mga interesado.