Ang Padayon nga Pagdamo Nagadugang sang Pagkinahanglan sing mga Kingdom Hall
1 Sang nagligad ang manalagna ni Jehova nagtagna nga “ang bilidhon nga mga butang sang tanan nga pungsod magaabot.” (Hag. 2:7) Pat-od gid nga nakita naton ang katumanan sini karon. Daw ano ka makalilipay nga 7,559 ang ginbawtismuhan sang 1993 nga tuig sang pag-alagad sa Pilipinas lamang! Agod padayon nga mabuligan ining tanan nga mga bag-uhan, dapat naton ‘ipahamtang ang aton mga tagipusuon sa aton mga dalanon’ agod pat-uron nga ginasakdag naton sing bug-os ang hilikuton sang Dios. (Ipaanggid ang Hageo 1:5.) Huo, ang isa ka importante nga bahin sang aton pagsakdag sa hilikuton sang Dios amo ang pagbulig naton sa pag-aman sing nagakaigo nga mga balay sang pagsimba para sa kadam-an sang bag-ong mga dumalayaw ni Jehova.
2 Ang Kingdom Hall Fund sang Sosiedad nagapanghikot sa Pilipinas sa pila ka tuig na karon kag nagpaposible para makatigayon sing bag-ong mga Kingdom Hall ang 1,013 ka kongregasyon. Sang 1993 nga tuig sang pag-alagad lamang, 101 ka kongregasyon sa 34 ka probinsia ang nakahulam para sa ila proyekto sang mga Kingdom Hall. Makapalig-on makita ang paghulag sang mga manugbantala sa pagsakdag sa sining revolving fund. Ang kuwarta nga ginapahulam sa mga kongregasyon ginabalik sa pundo agod ang tanan nga pundo nga gindonar padayon nga magamit sa pagpatindog sing bag-ong mga Kingdom Hall.
3 Ang Mahalungon nga Pagplano kag Konsultasyon Nagapat-od sang Kadalag-an: Sa Lucas 14:28, 29, ginbalay ni Jesus ang prinsipio nga dapat tun-an sang tanan nga nagasugod sing proyekto sang mga Kingdom Hall. Una kinahanglan ang ‘paglingkod kag pag-isip sang kabilihanan, agod tan-awon kon may igapahuman sila’ sa proyekto. Huo, ang mahalungon nga pagplano kinahanglanon. Indi bastante ang kapagsik, kundi kinahanglan sakdagon sang bug-os nga kongregasyon ang proyekto sa pinansial paagi sa mga kontribusyon. Kon ang mga kauturan ginapamangkot kon pila ang masarangan nila nga iamot kada bulan, dapat sila mangin realistiko, wala nagasaad sing labaw sa masarangan nila agod lamang makahulam. Maayo man kon ang mga kauturan mapangabay sa pagsugod dayon sa pag-amot bisan wala pa makaaplay para makahulam. Sa sining paagi ang pundo matipon kag makita sang mga gulang kon bala masarangan sakdagon sang kongregasyon ang proyekto.
4 Ang isa pa ka nagakaigo nga makasulatanhon nga prinsipio amo ang Hulubaton 15:22, nga nagasiling: “Sa wala sing laygay ang mga katuyuan napaslawan, apang sa kadam-an sang mga manuglaygay napalig-on sila.” Nagakahulugan ini nga dapat anay konsultahon sang mga gulang ang isa kag isa kag hambalan ini sing maayo antes ini ipresentar sa kongregasyon. Wala sing isa ka gulang ang dapat mamat-od sing kinaugalingon. Daku nga kagumon kag dipaghangpanay ang nagresulta sang ginhimo ini sang mga gulang. Dugang pa, subong sang ginpanugda sa suplemento sang Disiembre, 1991 nga Ang Aton Ministeryo sa Ginharian, dapat pangayuon ang laygay sang manugtatap sa sirkito. Paano sia makabulig?
5 Ang pagpili sing lugar para sa tilipunan nagadalahig sing madamo nga butang dugang sa bili sang propiedad. Sentro bala ini para sa mga kauturan? Malapit bala ini sa kalsada, ukon suludlon bala ini? May matinlo bala nga titulo ang lote? May mga tawo bala nga nagapuyo sa lote ang mahimo nga indi maghalin kon mabakal na ini? Ang manugtatap sa sirkito mahimo nga makahatag sang iya laygay sa sining mga butang sa wala pa mabakal ang lote. Mahimo man sia makarekomendar sing isa ka utod nga lalaki nga magapat-od nga wala sing legal nga mga problema sa titulo. Dugang pa, mahimo matan-aw sa ulihi sang manugtatap sa sirkito ang mga plano nga nahimo sang mga gulang, kag makahatag sing mga panugda sa kadakuon sang Kingdom Hall kag sa plano sini. Mahimo man niya matan-aw ang ila loan application (aplikasyon para makahulam) agod pat-uron nga nahimo ang tanan nga mga kinahanglanon.
6 Kon maaprobahan na sang Sosiedad ang mga plano, wala sing daku nga mga pagbag-o sa desinyo ukon kadakuon sang Kingdom Hall ukon sa lokasyon sini ang dapat himuon nga wala anay ginakonsulta ang Sosiedad. Gin-islan sang pila ka kongregasyon ang lokasyon sang lote ukon ang desinyo sang tilipunan nga wala nagapahibalo sa Sosiedad. Nagtuga ini sing dikinahanglanon nga mga problema.
7 Ginapanugda nga, kon mahimo, tinguhaan sang kongregasyon nga baklon ang lote kag patituluhan ini sa ngalan sang korporasyon sang sirkito antes ipadala ang ila loan application sa Sosiedad. Magapadasig ini sang proseso sa paghulam kay ang lote ginapanag-iyahan na sang mga kauturan.
8 Ang sibu kag detalyado nga mga rekord sa pinansial dapat huptan nga husto sugod sa pag-umpisa sang pagpatindog. Maayo nga duha ukon tatlo ka utod nga lalaki ang magabuligay sa pag-uyat sang kwenta agod malikawan ang bisan ano nga dipagsalig ukon dipaghangpanay. Pagkatapos sang proyekto, ang kongregasyon dapat nga may kompleto nga rekord sang mga kwenta para sa proyekto.
9 Ang Boluntaryo nga mga Manugpangabudlay Nagapadasig sang Trabaho kag Nagabuhin sang Gasto: Mas maayo nga gamiton ang mga ikasarang nga matigayon sa sulod sang kongregasyon nga ginakinahanglan sa bag-ong mga Kingdom Hall. Wala sing pangduhaduha nga, subong sang ginpakita ni Jesus sa Juan 10:12-15, ang isa nga nagapangabudlay sing boluntaryo bangod sang gugma mangin mas mapisan sangsa “sinuhulan,” nga interesado lamang sa bayad kag “wala nagakabalaka sa mga karnero.” Bisan pa nga isa lamang ka utod ang may ikasarang sa isa ka obra, mahimo sia mapangabay nga hanason ang iban samtang nagaobra sia. Sa sining paagi madamo pa ang mangin sangkol sa pagbulig sa iban pa nga mga proyekto sa ulihi. Ang boluntaryo nga trabaho nagabulig sa pagbuhin sang gasto, sa amo ginagamit sing maalamon ang bilidhon nga mga pundo nga gin-aman sang mga kauturan. Sa sining paagi, ang bug-os nga kongregasyon makapakigbahin kag, subong sadtong kaadlawan ni Nehemias, ang mga kauturan padayon nga “may kabubut-on sa pagpangabudlay.” (Neh. 4:6b) Kon matapos ang ila kaugalingon nga proyekto, ang mga kauturan dapat pahulagon sang gugma sa pagbulig sa pagpatindog sing mga Kingdom Hall para sa iban nga mga kongregasyon.—Neh. 5:19; Filip. 2:3, 4.
10 Mangin maayo para sa mga manugtatap sa sirkito nga magtago sing listahan sang mga kauturan sa ila sirkito nga may ikasarang sa lainlain nga obra kag nga handa magboluntaryo sa proyekto nga mga Kingdom Hall sa iban nga mga kongregasyon. Bangod madamo pa ang mahanas, ini nga listahan magadugang. Nian, sa tion nga may proyekto sa sulod sang sirkito, mahimo masakdag sang grupo sang may ikasarang nga mga manugpangabudlay ang lokal nga mga kauturan paagi sa pagboluntaryo sang ila mga serbisyo, busa nagapamag-an sang daku nga kahuol sang lokal nga kongregasyon. Ang pagbulig sa sining paagi isa ka pamatuod sang aton gugma sa aton pinakasuod nga mga isigkatawo—ang aton Cristianong mga kauturan.—Mat. 7:12; 22:39; Juan 13:35.
11 Pagpakita sing Gugma kag Apresasyon Para sa Kahimusan: Dumduma nga ang ginpahulam sa aton kongregasyon naghalin sa boluntaryo nga mga amot sang mga kauturan sa bug-os nga kalibutan. Pat-od gid nga indi naton luyag nga indi pasalamatan ining mahigugmaon nga kalulo sang mga kauturan, kaangay sang siam ka aruon sang panahon ni Jesus, indi bala? (Luc. 11:12-18) Nagapakita bala kita sing pasalamat kon ginapatumbayaan naton ang pagbayad sang aton hinulam subong sang ginsaad? Pagpakita bala ini sing gugma para sa aton mga kauturan sa iban nga mga kongregasyon? Kon nagabaton lamang kita sing bulig sa pagpatindog sang aton Kingdom Hall kag dayon wala nabalaka sa mga kauturan sa iban nga mga kongregasyon nga nagakinahanglan sing bulig, pagpakita bala ini sang espiritu sang Filipos 2:4?
12 Bangod nabalaka, indi lamang sa ila kaugalingon nga kongregasyon, kundi sa “bug-os nga paghiliutod sa kalibutan,” (1 Ped. 5:9) madamong kongregasyon ang boluntaryo nga naghimo sing mga resolusyon nga magpadala sa Sosiedad sing mga amot para sa Kingdom Hall Fund kada bulan. Bisan ang pila ka Kingdom Hall nga nagabayad sing utang nagapadala sing amot sa sining pundo. Daw ano kaayo nga espiritu ang ginapakita sini! Dumduma, “daku pa ang kalipay sa paghatag sangsa pagbaton,” gani tinguhaan naton tanan nga mangin mga manughatag kag indi lamang mga manugbaton paagi sa pagbulig sa iban nga mga kongregasyon subong sang masarangan naton.—Binu. 20:35.
13 Ang Kinabubut-on nga Espiritu Ginaapresyar: Ang kinabubut-on nga espiritu kag kakugi sang mga kauturan sa pagpatindog sing mga tilipunan makita gid, subong sang ginsulat sang isa ka grupo: “Daw ano ka daku nga kalipay nga makita ang mga nagapamulong sing Koreano, Espanyol, kag Ingles nga mga kongregasyon nga nagapangabudlay tanan sing tingob sa nahiusa nga pagsimba kay Jehova!” Matuod gid ang mga pinamulong sang Salmo 133:1, 3: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa!”
14 Bilang pagpasalamat sa hilikuton nga ginhimo sa Kingdom Hall sang isa ka kongregasyon, ang nagadumala nga manugtatap nagsulat: “Bangod tuman kadamo ang tigulang nga mga kauturan sa sining kongregasyon, ini nga proyekto mahimo nga wala matapos paagi lamang sa amon panikasog. Gani salamat gid sa inyo kag sa mga kauturan kaangay ninyo nga nagabatyag sang gugma ni Jehova kag nga maluyag, indi lamang sa pagbatyag sini, kundi sa pagpakita sini. Kabay nga masiling namon sa amon mga kauturan: ‘Padayuna ang inyo maayo nga hinimuan.’ ”
15 Mga Tumalan-aw Nagdayaw: Ang kitaon nga pagpanghikot sang balaan nga espiritu ni Jehova sa mga kauturan nga nagapangabudlay sa mga proyekto sang pagpatindog sing mga Kingdom Hall nangin isa ka panaksi sa iban. Ang materyales para sa isa ka tilipunan ginbakal gikan sa isa ka kompanya nga nagabaligya sing kahoy, kag sang ulihi ang manedyer nagsulat: “Indi ko madumduman nga nadayaw ko ang isa ka grupo sang mga tawo subong sang pagdayaw ko sa mga Saksi ni Jehova sa tion sang proyekto. Nalipay kag nalangkag ako masaksihan ina nga hitabo, kag nalipay ako nga nakapakigbahin sa diutay nga paagi. Kamo kag ang inyo katawhan dapat dayawon, kag kabay nga magmadinalag-on kamo sa inyo mga proyekto sa ulihi.”
16 Sa isa pa ka hitabo, ang tiglawas sang isa ka suplayer gintangdo sa paghinguyang sing tatlo ka adlaw sa proyekto nga Kingdom Hall. Sia nagsiling: “Napahalipay gid ako nga makaupod kamo sining talipuspusan sang semana. Ang akon impresyon sa mga Saksi ni Jehova nagbag-o! Labi pa sa pagpanuktok sa mga ganhaan ang ginahimo ninyo. Isa ka pribilehiyo ang makapakigbahin. Indi kamo makibot nga makita ako sa inyo miting publiko.”
17 Sang natapos ang isa ka proyekto, ang meyor nagsulat sa ngalan sang siudad, nga nagasiling: “Isa ka inspirasyon nga makita ang ginatos ka boluntaryo nga nagapangabudlay sa pagpatindog sang tilipunan sing tuman kadasig. Isa gid ini ka matahom nga tinukod. Nangin hambalanon sang mga pumuluyo ang tuman kadasig nga pagtindog sang tinukod. Ang bag-o nga Kingdom Hall matuod nga kadayawan sa aton komunidad, kag nalipay kami sa pag-abiabi sini kag sa inyo kongregasyon.”
18 Ang Pinansial nga mga Amot Nagapadayon sa Pagbulig: Ang maalwan nga mga amot sa Kingdom Hall Fund sang Sosiedad nakabulig sa mga kongregasyon sang nagligad kag pat-od gid nga padayon nga magabulig sa palaabuton. Indi bala nga si Jehova nga Dios mismo ang nagapanguna sa dimakagod nga paghatag? (Sant. 1:17) Bisan pa matuod nga ang aton mga ikasarang sa paghatag nanuhaytuhay, kabay nga masapwan naton nga paagi sa pagpasibu sang aton personal nga paggasto, makapakigbahin kita sing bug-os sa pagsakdag sa pagpatindog nga hilikuton. Ina nga pagkamahinatagon nagapahalipay gid sang tagipusuon ni Jehova, subong man nga nagapalig-on sing daku sa aton mga kauturan.
19 Sing dugang pa, “ang bilidhon nga mga butang” nagadugok sa espirituwal nga templo ni Jehova, kag ‘ginapuno [niya] ang iya balay sing himaya. (Hag. 2:7) Kaangay sang matutom nga mga Judiyo sang kaadlawan ni Hageo, kabay nga ipahamtang naton ang aton tagipusuon sa hilikuton sang Dios, bug-os nga nagasakdag sang pagkinahanglan para sa dugang pa nga mga Kingdom Hall. Ang pag-uswag nagapadayon sing madasig. Ang aton padayon nga pagsakdag sa Kingdom Hall Fund sang Sosiedad isa ka labing maayo nga paagi sa pagpakigbahin sa hilikuton sang Dios.