Pagpatindog Sing Mga Kingdom Hall sa Pilipinas

¹ Kon tan-awon naton ang bug-os kalibutan nga latagon, makalilipay makita ang daku nga pag-uswag nga ginaagom sang dutan-on nga organisasyon ni Jehova! Sang nagligad nga tuig may kabug-usan nga 3,288 ka kongregasyon nga gindugang sa bug-os nga kalibutan. Bangod sining tanan nga pag-uswag, indi makapakibot nga ginakinahanglan ang dugang pa nga mga Kingdom Hall kag ang pagpakay-o sa mga nagatindog na.

² Madamong kauturan nga lalaki kag babayi ang nagapakita sing tumalagsahon nga kakugi kag suporta sa organisasyon ni Jehova paagi sa pagboluntaryo sang ila tion kag pagkabutang sa pagpatindog sing mga Kingdom Hall. Kada tuig, halos 50 ka bag-ong Kingdom Hall ang ginapatindog diri sa Pilipinas kag madamo pa nga iban ang ginakay-o. Ang mga Congregation Building Committee amo ang gintugyanan sa pagtatap sini nga mga proyekto, kag ang ila mga pinangabudlayan ginapasalamatan. Ang bug-os nga kahimusan sa pagpatindog sing Kingdom Hall ginahimo paagi sa Cristianong espiritu sang paghatag kag pagsakripisyo sa kaugalingon​—⁠kabaliskaran sa espiritu nga makita sing kinaandan sa kalibutan.​—⁠2 Tim. 3:​2, 4.

³ Hupti nga Simple ang Desinyo Sang Kingdom Hall: Dapat pirme hatagan sing konsiderasyon ang pagpatindog sing maugdang nga may simple kag praktikal nga desinyo. Sanglit madamo ang nagaboluntaryo sang ila pagpangabudlay sa mga proyekto sa Kingdom Hall, ang mga manugpangabudlay mahimo magabatyag nga ginahingalitan kon pangabayon sa pagpatindog ukon sa pagbutang sing mauti nga mga puni. Ang Kingdom Hall Loans Department sa sanga talatapan sarang makahatag sing mapuslanon nga laygay nga makabulig sa paghimo sing balanse nga mga desisyon tuhoy sa desinyo sang Kingdom Hall.

⁴ Samtang ang pila ka kongregasyon nakapatindog paagi sa pundo nga gintipon sing lokal, mga 1,000 pa ka kongregasyon sang nagligad nga napulo ka tuig ang nanghulam sa Sosiedad gikan sa Kingdom Hall Fund. Kon ang inyo kongregasyon nagahunahuna sa pagpakay-o sang inyo Kingdom Hall kag magakinahanglan sing bulig sa pinansial, mahimo ninyo sulatan ang Sosiedad. Antes manghulam sa Sosiedad, ang mga gulang dapat magsurbe sing lokal agod hibaluon (1) kon pila ang iamot sa umpisa nga magabulig sa pagbakal sing propiedad kag mga gasto sa pagpatindog, (2) kon pila ang sarang mapahulam sing lokal sadtong nagapakig-upod sa nadalahig nga (mga) kongregasyon, kag (3) kon pila ang iamot kada bulan agod takpan ang mga gasto sang kongregasyon kag agod bayaran ang bisan ano nga mahulam gikan sa Sosiedad. Sa sining surbe, ang mga papel nga ihatag indi dapat sulatan sing ngalan. Importante nga ang tanan magahatag sing husto nga mga numero, nagabinagbinag sing maayo sang ila kaugalingon nga kontribusyon kag ginapaabot nga hulamon, kay gamiton sang mga gulang ining mga numero sa paghimo sing mabug-at nga mga desisyon para sa kongregasyon. Naeksperiensiahan namon nga maayo nga tilawan ang lokal nga masarangan paagi sa pagtukod sing Kingdom Hall Building Fund sa sulod sang pila ka bulan antes manghulam gikan sa Sosiedad.​—⁠Lucas 4:​28-30.

⁵ Pagbulubanta sa Gasto kag mga Paagi sa Pagkuwenta: Antes sugdan ang isa ka proyekto sa pagpatindog sing Kingdom Hall, ang mga gasto sa pagpatindog dapat bulubantaon sing maayo antes isumiter ang pat-od nga kantidad nga hulamon. Malikawan sini ang paglulan sa mga manugbantala sing mas mabug-at nga iskedyul sa pagbayad sangsa kinahanglanon. Subong man, magabilin ini sing kuwarta sa Society Kingdom Hall Fund nga mahulam sang iban pa nga mga kongregasyon nga may daku nga kinahanglanon para sa isa ka ginpatahom nga Kingdom Hall. (Filip. 4:5) Walay sapayan nga ang wala ginapaabot nga mga gasto mahimo nga magalabaw sa badyet, ang halos husto nga mga pagbulubanta sarang matulutimbang upod ang maayong pagplano kag pag-usisa.

⁶ Ang isa ka proyekto sa pagpatindog sing Kingdom Hall nagakinahanglan sing daku nga kantidad nga kuwarta nga magasto sang kongregasyon. Dapat pat-uron sang mga gulang nga ang pundo ginauyatan sa masaligan nga paagi. Dapat huptan ang husto nga mga rekord sa kuwenta, kag dapat ihatag ang maathag nga mga report sa nadalahig nga (mga) kongregasyon kada bulan. Dapat pat-uron sang nagadumala nga manugtatap nga ang pundo sa pagpatindog kag ang tanan may kahilabtanan nga kuwenta ginausisa kada apat ka bulan lakip sa regular nga kuwenta sang kongregasyon. Apang, sa sulod sang panag-on sang pagpatindog nga madamong balayran ang ginabayaran, ang kuwenta dapat usisaon kada bulan. Dapat aprobahan sang kongregasyon sa kabilugan ang proyekto pagkatapos nga masugiran sing bug-os tuhoy sa mga detalye kag ginabulubanta nga mga gasto. Pagkatapos sina, ang pagpasugot sa tanan nga balayran dapat ihatag sa nagakaigo nga paagi antes ibayad ang bisan ano nga pundo. Kon matapos na ang proyekto, ang tanan nga gasto dapat kuwentahon sing maathag.

⁷ Ang mga Boluntaryo Nagasuportar sa Maayo nga Hilikuton: Ang Sosiedad nagapasalamat sa madamong boluntaryo nga nagabulig sa pagpatindog sing Kingdom Hall. Makalilipay gid nga makita ang linibo ka boluntaryo nga nagahalad sang ila kaugalingon sa tanan nga bahin sang pagpatindog sing Kingdom Hall. Nangin madinalag-on ini nga programa bangod sining kinabubut-on, maalwan, kag mabinuligon nga espiritu sang boluntaryo nga mga manugpangabudlay, nga nagasakripisyo sing tion nga kuntani magamit nila sa ila mga kongregasyon kag mga pamilya. (Sal. 110:​3; Col. 3:23) Bangod sining mahigugmaon nga paghulag, takus sila sang aton komendasyon, apresasyon, kag bug-os nga suporta.​—⁠Roma 12:​10; Heb. 13:⁠1.

⁸ Kon ang isa ka Kingdom Hall ginatukod, ang mga manugbantala sa kaingod nga mga kongregasyon sarang maagda nga makigbahin sa proyekto. Sarang ini mahimo paagi sa pagsulat sang Congregation Building Committee sa nagadumala nga mga manugtatap sang kaingod nga mga kongregasyon kag sa pagpahibalo sa ila nga nagakinahanglan sila sing bulig. Ang tanan nga sarang makaboluntaryo nagahimo sing bilidhon nga pag-alagad.

⁹ Paghupot sang mga Gasto sa Pagpatindog nga Pinakamanubo: Ang mga Congregation Building Committee dapat mangita sing mas maayo nga prisyo paagi sa pagpamalaklon nga ginapaanggid ang mga bili kag sa mapaindis-indison nga subasta. Sa sining paagi, sarang mahibaluan kon diin nga mga suplayer ang dapat gamiton kag kon anong mga materyales ang dapat baklon. Agod mapat-od nga ang pundo ginagamit sing makinuton, dapat aprobahan sang Congregation Building Committee ang tanan nga gasto gikan sa pundo sa pagpatindog.

¹⁰ Ang Tanan Sarang Makabulig: Kita tanan may kahigayunan nga makaamot sing pinansial sa Society Kingdom Hall Fund suno sa ginatugot sang aton mga kahimtangan. Sugod sang gintukod ang Society Kingdom Hall Fund, linibo ka kongregasyon ang nabuligan nga makatigayon sing mga Kingdom Hall. Madamong kongregasyon ang wala kuntani makatigayon sining mga duog tilipunan kon indi bangod sang gugma sa paghiliutod nga ginpakita sang inyo maalwan nga pagsuporta sa Society Kingdom Hall Fund. Ining pundo nagapahulam agod makabulig sa pagpatindog sing bag-ong mga Kingdom Hall. Samtang ginabayad liwat sing makugi ang kuwarta, ining pundo ginapahulam sa iban nga mga kongregasyon nga nagakinahanglan.

¹¹ Mga Ekspresyon Sang Apresasyon: Sang natapos ang ila bag-ong Kingdom Hall, amo sini ang ginsiling sang isa ka kongregasyon sa isa ka sulat sa Sosiedad: “Nagasulat kami sa inyo agod pasalamatan kamo tungod sa inyo mahigugmaon nga bulig sa pagpatindog sang amon bag-ong Kingdom Hall. Ang amon tinukod natapos na kag gindedikar na kay Jehova, kag ang kongregasyon nagapasalamat sing daku nga makatigayon sing subong sini katahom nga tinukod para sa pagsimba kay Jehova. Ang amon kongregasyon pirme malipayon sa pagsuporta sa Society Kingdom Hall Fund kag sa lokal nga mga proyekto sa pagpatindog kag magapadayon sa paghimo sini, nakahangop sang daku nga kinahanglanon sang iban pa nga mga kongregasyon nga makapanginpulos gikan sa sining maalwan kag importante nga aman.”

¹² Isa pa ka kongregasyon ang nagpabutyag sing pasalamat tungod sa mahigugmaon nga bulig nga ginpakita sa ila, nga nagasiling: “Luyag namon ipabutyag sa inyo ang amon tudok gid nga pasalamat tungod sa bulig sang Society Kingdom Hall Fund. Kon wala ini ang pagpatindog sang [amon] tilipunan nangin mas mabudlay kuntani kag napalantang sa pila pa ka tion. Ang kaalam ni Jehova maathag gid nga makita sa sining kahimusan.”

¹³ Ang Hilikuton sa Unahan: Kita tanan may rason nga magpasalamat samtang ginatatap naton ang kinahanglanon sa pag-aman sing mas madamo kag mas maayo nga mga Kingdom Hall. Dapat naton tigayunon ang espiritu sang kooperasyon​—⁠nga nagapangabudlay sing tingob kag nagasuportar sing bug-os sa sining kinahanglanon nga hilikuton. (Sal. 133:1) Daw ano gid ang aton kalipay nga ang organisasyon ni Jehova nagtangdo sing mga lalaki sa pagpanguna sa espirituwal nga mga butang kag sa pagpatindog sing kinahanglanon nga mga pasilidad! Si Pablo nangabay sa mga taga-Filipos, nga nagasiling: “Himun-i ninyo ang akon kalipay agod nga mag-isa kamo sing hunahuna kag nga may isa ka gugma.” (Filip. 2:2) Sa pagkamatuod, may rason gid kita sa pagkasadya, samtang ginatulinan kita sing maayong balita tuhoy sa gintukod na nga Ginharian nga “ibantala sa bug-os napuy-an nga duta nga panaksi sa tanan nga kapungsuran” antes mag-abot ang katapusan. (Mat. 24:14) Ang pagtindog naton nga malig-on dampig sa sinang Ginharian kag ang mainunungon nga pagpangabudlay para sa kaayuhan sini nagapahalipay sang tagipusuon ni Jehova. “Magmaalam ka, anak ko, kag pasadyaha ang akon tagipusuon, agod nga masabat ko sia nga nagapakahuya sa akon.” (Hulu. 27:11) Daw ano gid ka tumalagsahon ang aton pribilehiyo nga makapangabudlay kag makapakigbahin sing malipayon upod ni Jesucristo sa hilikuton ni Jehova!