Magsab-ug sing Bugana Apang May Paghantop
1 Ang tagsa ka mangunguma nakahibalo nga kon magsab-ug sia sang iya binhi sing bugana, pat-od gid nga magaani sia sing bugana, apang kon magsab-ug sia sing halushalos, pat-od gid nga magaani sia sing halushalos. (2 Cor. 9:6) Ang mga mangunguma nagahalong nga indi pag-usikan ang mga binhi paagi sa pagsab-ug sa lugar nga indi ini mahimo magpanubo. Ini man nga paghantop ang kinahanglan kon nagatanyag kita sang aton mga literatura sa latagon. Handum naton nga ibilin ang aton mga literatura sa mga tawo nga interesado sa pagbasa sini.
2 Nakita mo bala nga nagahantal lamang sa aparador sa balay ang mga magasin, mga brosyur, kag iban pa nga mga publikasyon samtang magamit ini kuntani agod mahibaluan sang mga takus sa inyo teritoryo ang kamatuoran? (Ipaanggid ang Mateo 25:25.) Nagaalang-alang ka bala sa pagtanyag sing mga magasin ukon sing iban pa nga mga literatura sa nahauna nga pagduaw bangod daw nasaw-ahan ka sa pagsambit kon paano ginasuportahan ang hilikuton sa pagbantala sing Ginharian? Natukiban sang eksperiensiado nga mga manugbantala nga ang mainapresyahon nga mga tagbalay nagahulag sa isa ka simple, direkta nga pinamulong kon ginasugiran sila kon paano ginagamit ang mga donasyon para sa hilikuton sa Ginharian.
3 Mahimo ka makasiling:
◼ “Ayhan natingala ka kon paano namon matanyag ang mga literatura nga wala sing bayad. Bahin ini sang bug-os kalibutan nga hilikuton sa pagtudlo nga ginasuportahan sang boluntaryo nga mga kontribusyon. Kon luyag mo maghatag sing diutay nga donasyon para sa hilikuton, nalipay gid ako sa pagbaton sini.”
4 Madamong tagbalay ang magapamangkot kon pila ang bili sang mga literatura.
Mahimo ka makasabat:
◼ “Ang mga literatura wala sing bayad bangod ang amon hilikuton ginasuportahan sang boluntaryo nga mga donasyon. Kon luyag mo maghatag sing diutay nga donasyon karon, malipay kami sa pagpat-od nga gamiton ini sa bug-os kalibutan nga hilikuton sang pagbantala.”
5 Sa hilikuton sa magasin ginapakita sang pila ka manugbantala ang pahina sa sulod sang isa ka magasin kag nagasiling:
“Subong sang makita mo diri, ang amon hilikuton ginasuportahan sang boluntaryo nga mga donasyon. Kon luyag mo maghatag sing diutay nga donasyon agod makabulig sa sining hilikuton, mahimo ko ini mapadala para sa imo.”
6 Indi gid kita dapat mag-alang-alang sa pagsab-ug sing mga binhi sang Ginharian bangod indi naton masambit kon paano ginagastuhan ang hilikuton. Sa amo man nga tion, kinahanglan ang paghantop agod ang aton mga literatura indi mausik sa ‘batuhon nga duta.’ (Mar. 4:5, 6, 16, 17) Ang mga tawo nga nagaapresyar sa maayong balita nga dala naton malipay sa kahigayunan nga makaamot agod masuportahan ini sa materyal.—Ipaanggid ang Mateo 10:42.