Mga Pamangkot

◼ Kon nagapanaksi sa telepono, dapat bala naton ipaathag ang kahimusan sa donasyon?

Kon naatubang naton kag ginapanaksihan ang isa ka tawo, mahimo naton mapaathag nga ang bug-os kalibutan nga hilikuton sa pagpanudlo sa Biblia sang mga Saksi ni Jehova bug-os nga ginasakdag sang boluntaryo nga mga donasyon kag nalipay kita nga magbaton sina nga mga donasyon. Apang, indi dapat pagsambiton ang mga donasyon ukon ang kahimusan sa donasyon kon nagapanaksi sa telepono, kay basi hangpon ini nga isa ka sahi sang pagpangayokayo paagi sa telepono. Ang ministeryo sang mga Saksi ni Jehova indi negosyo sa bisan ano nga paagi.​—2 Cor. 2:17.

◼ Kon nagapanaksi sa telepono, ano ang aton himuon kon mangabay ang isa nga indi na magtawag liwat sa iya ang mga Saksi ni Jehova?

Ang luyag sang tawo dapat tahuron. Isa ka listahan nga may petsa kag ngalan sang tawo ang ibutang sa sobre para sa teritoryo agod ang mga manugbantala indi na magtawag sa sina nga numero sa ulihi. Kada tuig, dapat repasuhon ang listahan sang mga tawo nga nagpangabay nga indi na kita magtawag sa ila. Sa idalom sang panuytoy sang manugtatap sa pag-alagad, iasayn ang eksperiensiado, mataktikanhon nga mga manugbantala sa pagkontak liwat sa sining mga tawo agod pat-uron kon ano na ang ila pagtamod.​—Tan-awa ang “Pamangkot” sa Hunyo 1994 nga Ang Aton Ministeryo sa Ginharian.

◼ Ano ang aton isiling sa answering machine?

Indi pag-ibutang ang telepono. Sa baylo, basaha ang ginhanda sing maayo nga sulat. Mahimo mo isiling: “Ginakasubo ko nga wala ko ikaw masapwan sa inyo balay. Kon luyag mo mamati sing isa ka paghinun-anon pasad sa Biblia tuhoy sa [tig-ulo sang pamulongpulong publiko], palihug kadto sa Kingdom Hall sang mga Saksi ni Jehova. Ginaagda ang tanan. Wala sing pagpangolekta nga himuon.” Nian ihambal sing maathag ang adlaw kag oras sang miting, kag ihatag ang direksion sang kalye ukon ipaathag ang lokasyon sang Kingdom Hall.