Pagtukod sing Pagtuo sa Manunuga sang Katawhan
1 Madamong tawo ang naimpluwensiahan sing sayop sa pagpati sa ebolusyon sa baylo nga sa pagpanuga subong ang ginhalinan sang kabuhi. Ginausisa sang Creation nga libro ang duha ka bahin sa binais kag ginahatag ang tumalagsahon nga pamatuod bilang pagsakdag sa Biblia. Paano naton buligan ang sinsero nga mga tawo nga nagpakita sing kahanda sa pagpamati? Paagi sa mga pagduaw liwat. Sa aton pagbalik, maayo pirme nga hunahunaon sing pat-od ang butang nga igasiling nga magatukod sang pagtuo kay Jehova subong ang aton Manunuga.
2 Kon ang isa magpakita sing pagtuo sa Biblia, ini nga pagpalapit mahimo mangin epektibo agod masugdan ang inyo paghambalanay:
◼ “Ang Isaias 45:18 nagahatag sing mabakod nga pinamulong nahanungod sa ginhalinan sang uniberso; luyag ko mahibaluan ang imo panghunahuna tuhoy sa sini. [Basaha kag pakumentuha sia.] Ginatawag diri si Jehova nga Manunuga sang mga langit kag sang duta. Kamusta ang kabuhi sa sining duta? Ginahatag man sang Isaias 42:5 sa iya ang tanan nga kadayawan para sa sina. [Basaha.] Kon ang ginasiling sang Biblia matuod, ang ebolusyon indi matuod. Masaligan mo bala ang Biblia sa banta mo?” Patuhuyi ang kapitulo 17 sang Creation nga libro, kag ipakita ang dugang nga mga rason sa pagpati kay Jehova subong ang Manunuga.
3 Masugdan ninyo ang inyo paghambalanay paagi sa sini:
◼ “Sa akon nagligad nga pagduaw, ginpautwas ang pamangkot, Ano ang palaabuton sang tawo kag sang duta? Talupangda kon paano ginasabat sang libro nga ginbilin ko sa imo ina nga pamangkot.” Buksi ang pahina 234-5 sang Creation nga libro kag palig-una sia sa pagbasa sang mga parapo 6 kag 7. Kon ginpakita ang dugang nga interes, mahimo kamo makapamangkot: “Anong mga pagbalhin, sa banta mo, ang mahanabo sa duta?” Kon nagakaigo, ini nga punto mahimo hambalan sa sina nga tion ukon sa inyo masunod nga pagduaw paagi sa pagpadayon sa iban pa nga mga parapo sa sini man nga kapitulo sang Creation nga libro.
4 Ang isa pa ka paagi nga masugdan ninyo ang pagduaw liwat amo ang sa pagsiling:
◼ “Ang katawhan nag-antos sing daku nga kasakit kag kasubo bangod sang kalainan kag kalautan. Si Jehova, ang Manunuga sining duta, nanaad nga pagatapuson ini. [Buksi ang pahina 196, kag basaha ang Hulubaron 2:21, 22.] Ang mga nagakilala sa iya subong ang ila Magbubuhat kag nagahimo sang iya kabubut-on makapaabot sing makatilingala nga mga pagpakamaayo.” Kon nagakaigo sa tion, magpadayon sa pagpaathag sang Bugna 21:4, 5 sa pahina 197-8.
5 Nahibaluan sang eksperiensiado nga mga manugbantala nga labing maayo ang mag-iskedyul sing gintalana nga mga oras para sa mga pagduaw liwat. Ang paghimo sing pat-od nga mga kahimusan para sa sini nga hilikuton magabulig sa aton nga matatap sa gilayon ang interes. Pat-ura ang oras nga labing maayo para sa inyo kag sa inyo teritoryo. Paagi sa regular ninyo nga pagpakigbahin sa sining hilikuton, masapwan ninyo ang kalipay sa pagtuman sa sugo nga ‘maghimo sing disipulo.’—Mat. 28:19, 20.