Mga Presentasyon nga Nagapukaw sing Interes
1 Dapat kita pirme magpakita sing mainit kag personal nga interes sa mga tawo nga masugilanon naton sa pag-alagad sa latagon. Ang pagpangabay sang ila opinyon nagapakita sang aton pagtahod sa ila pagtamod. Ang mga pamangkot nga ginapautwas naton mahimo nga makapukaw sang ila panghunahuna kag magapahulag sa ila nga magtuon sing dugang pa.
2 Sa Hunyo itanyag naton ang libro nga Life—How Did It Get Here? By Evolution or by Creation? Repasuha ini nga publikasyon sing personal kag magpili sing espesipiko nga mga punto nga ipatalupangod. Kon nagahinun-anon sing mga punto gikan sa Creation nga libro, buksi ini kag idaho sa tagbalay. Patuhuyi ang espesipiko nga mga topiko kag mga ilustrasyon.
3 Pagkatapos mapakilala ang imo kaugalingon, mahimo ka makasiling:
◼ “Sa sining modernong kalibutan, rasonable bala ang magpati nga may isa ka Dios nga nagtuga sa aton kag sa sining matahom nga duta nga ginapuy-an naton? [Pasabta sia.] Kon ginatan-aw naton ang mga katingalahan sa duta kag sa uniberso, nagakatingala kita sa kahim-ong kag desinyo sini. Wala bala ini nagapamatuod sang pagluntad sang isa ka Manunuga? Talupangda ang pangatarungan sang Biblia sa sining butang. [Basaha ang Hebreo 3:4.] Ang tagsa ka tinukod may manugdesinyo kag manunukod. [Kuhaa ang Creation nga libro kag buksi ang ilustrasyon sa pahina 114.] ” Nian buksi ang pahina 122 kag basaha ang kapsion sa ubos sang larawan sang isa ka relo. Ang ilustrasyon kag ang kasulatan nga ginbalikwat sa pahina 127 sarang man magamit. Ang dugang pa nga mga punto makita sa Reasoning nga libro, pahina 84-8.
4 Ukon mahimo ka makasiling:
◼ “Ano sa banta mo ang kinahanglan agod makasapo sing matuod nga paghidait kag kalipay? [Pasabta sia.] Ang Biblia nagasiling nga dapat naton kilalahon ang Dios subong ang Manunuga sang langit kag duta.” Basaha ang Bugna 14:7, kag nian buksi ang Creation nga libro sa pahina 140 kag 141, mga parapo 24 kag 25. Kon ang tagbalay nagapakita sing interes, magliton sa kapitulo 19 kag ipaathag kon paano ang isa ka dutan-on nga paraiso mangin katunayan sa dili madugay.
5 Kon ang tagbalay nagapangduhaduha nahanungod sa pagluntad sang Manunuga, mahimo ka makasiling:
◼ “Madamo nga tawo ang nagaugyon sa imo, labi na bangod sang tanan nga pag-antos sa kalibutan. Kon may Dios, ngaa ginatugutan niya ang pag-antos? Makahunahuna ka bala sing isa ka rasonable nga paathag?” Depende sa sabat, mahimo ikaw makapadayon paagi sa paggamit sang kapitulo 16 sang Creation nga libro. Ang dugang pa mabuligon nga mga sabat sarang makita sa Reasoning nga libro, pahina 399-400. Kon kaisa nagakaigo ang magbilin sing tract nga Kon Ngaa Imo Masaligan ang Biblia.
6 Ang aton tuyo amo ang tinguhaan nga makasugod sing mga pagtuon sa Biblia. Daw ano gid ang aton kalipay nga may yara kita sining matahom sing laragway nga libro nga nagapaathag sang kamatuoran nahanungod sa pagpanuga kag nagapadungog sa aton Dakung Manunuga! Kabay nga gamiton naton ini sing maayo sa bulan sang Hunyo.