Ang mga Batan-on Nagakinahanglan sing Maayo nga Halimbawa
1 Nalipay kita nga makaupod naton ang nagadamo nga kadamuon sang mga pamatan-on nga ‘nagadayaw sa ngalan ni Jehova.’ (Sal. 148:12, 13) Madamo sa ila ang bata pa sa edad. Ang ila pag-uswag ginapat-od ilabi na bangod sang paghanas kag halimbawa sang ila mga ginikanan kag sang iban pa nga mga may edad sa kongregasyon. Apang, indi dapat kalimtan ang impluwensia nga ginahimo sang iban pa nga mga pamatan-on, ilabi na sang magulang nga mga tin-edyer. Kon yari kamo sa sining pangidaron, ining mga komento mahimo nga makabulig sa inyo.
2 Ang mga pamatan-on nga mga 9 tubtob 12 ang edad mahuyugon mag-ilog sa mas magulang nga mga tin-edyer. May yara sila kinaugali nga handom nga mangin kaangay sang ila ginadayaw nga suod nga mga abyan. Nagapangita sila sing mga pamatan-on nga mas magulang kag daw mas maalam. Subong resulta, mahimo nila ilugon ang inyo panghambal kag pagginawi subong man ang inyo apresasyon para sa espirituwal nga mga prinsipio.
3 Subong mas magulang nga tin-edyer, may yara kamo mabug-at nga responsabilidad. Karon mismo, ang inyo halimbawa mahimo nga nagaimpluwensia sa inyo batan-on nga mga kaupdanan. Pamangkuta ang inyo kaugalingon, ‘Ano nga sahi sang impluwensia ang ginahatag ko sa mga batan-on? Serioso bala ako sing panghunahuna, nagalikaw sang mga kabuangan kag “mga kailigbon nga pinamatan-on”? Nagapakita bala ako sing pagkamatinumanon kag pagkamatinahuron sa akon mga ginikanan, sa mga tigulang, kag sa iban pa?’ (2 Tim. 2:22; Col. 3:20) Ang inyo ginasiling kag ginabuhat mahimo nga magaimpluwensia sing daku sa espirituwal nga pag-uswag sang iban pa nga mga batan-on nga nagatan-aw sa inyo.
4 Ang inyo regular nga pagpakigbahin sa pagbantala sang maayong balita mahimo magpalig-on sa inyo mga kaupdanan nga mangin mas aktibo. Kon sarang kamo makasulod sa payunir nga pag-alagad, ang inyo mga abyan mapahulag man sa pagpayunir. Ang pagkomento sa mga miting kag pagboluntaryo sa paghimo sang kinahanglanon nga mga hilikuton sa Kingdom Hall mahimo man magahatag sing maayo nga halimbawa.
5 Maaplikar ninyo nga mga tin-edyer ang masunod nga laygay ni Timoteo: “Mangin halimbawa sa mga matutom sa paghambal, sa paggawi, sa gugma, sa pagtuo, sa katinlo.” (1 Tim. 4:12) Ang inyo mapagsik nga pagpakigbahin sa pag-alagad kay Jehova makapahulag sa batan-on nga mga manugpanilag sa positibo nga paagi, nagabulig sa ila sa pag-uswag padulong sa hamtong sa espirituwal nga mga tawo. (Efe. 4:13) Ang mga tin-edyer nga ang ila mga pamilya bag-o lang magsugod sa pagtuon mahimo maganyat sa kamatuoran paagi sa inyo halimbawa.
6 Sing labi pa ka importante, ang pagpakita ninyo sing diosnon nga mga kinaiya nagadala sing kadungganan kay Jehova kag sa iya organisasyon. (Hulu. 27:11) Ang hanuot nga mga manugpanilag matingala sa kinatuhayan sa ulot ninyo kag sang mga pamatan-on sang kalibutan. Gani may yara kamo pinasahi nga kahigayunan sa pagbulig sa mga batan-on samtang nagahimo kamo sing hamili nga amot sa kadayawan ni Jehova.—Sal. 71:17.