Makabuylog Ka Bala Liwat sa Hubon sang mga Payunir?

¹ Sang nagligad nga lima ka tuig, linibo ka regular payunir ang ginkinahanglan nga magbiya sa hubon sang mga payunir. Isa ka bala sa ila? Kon ang mga problema sa ikaayong lawas, pinansial, ukon mga obligasyon sa pamilya amo ang kabangdanan nga nag-untat ka, nagbalhin bala ang imo mga sirkunstansia? Makahimo ka bala sing pila ka pagpasibu agod makapayunir liwat? Nahunahuna mo na bala ang mag-aplay liwat?

² Subong sang nahibaluan mo, kinahanglan ang maayo nga organisasyon agod magmadinalag-on ka subong isa ka payunir. Bisan pa nga wala sing madamo nga tion para sa kalingawan, ang imo malip-ot nga mga panag-on sa pagpahunayhunay masunson nga mas makaalayaw. (Hulu. 19:17; Binu. 20:35) Paagi sa pagpabilin nga masako sa pag-alagad, ginaamligan ka gikan sa maiyaiyahon nga dalanon sang pagkabuhi sang kalibutan. Nanaad si Jehova nga pamanggaron niya ikaw sa espirituwal kon unahon mo ang mga interes sang Ginharian. Maagom gid ninyo ang matuod nga kalipay kag pagkakontento paagi sa pag-alagad kay Jehova sa bug-os nga tagipusuon.​—Hulu. 10:22; Col. 3:​23, 24.

³ Ang bug-os tion nga ministeryo isa bala ka pribilehiyo nga bukas lamang sa pila nga pinasahi? Indi​—bukas ini sa tanan. Bangod sang aton sumpa sa dedikasyon, dapat hatagan sang tagsa ka Cristiano sing serioso nga pagbinagbinag ang bug-os tion nga pag-alagad luwas kon wala ini ginatugot sang mga sirkunstansia.​—Mar. 12:30.

⁴ Kon ang imo panglawas kag Makasulatanhon nga mga responsabilidad wala nagatugot sa imo nga magpayunir sa karon, makasalig ka nga nakahibalo kag nakahangop si Jehova. Padyaan niya ang bisan ano nga masarangan mo nga himuon. (1 Cor. 4:2; 2 Cor. 8:12) Apang, kon daw posible para sa imo ang magpayunir liwat sa karon, ngaa indi mo palapitan ang nagadumala nga manugtatap kag mangayo sing aplikasyon?

⁵ Makabulig Bala ang Imo Pamilya? Ayhan nagbiya ka sa pagpayunir bangod dapat mo atipanon ang mga obligasyon sa pamilya. Posible bala nga ang iban nga mga katapo sang pamilya yara na karon sa kahimtangan nga makabulig agod makapayunir ka liwat?

⁶ Ang maayo nga kooperasyon kag ang diutay nga dugang nga panikasog sa bahin sang tagsa ka katapo sang pamilya mahimo nga nagapaposible sini. Mahimo sila makabulig sa galastuhan ukon transportasyon, subong man sa regular nga paghimos nga mag-alagad sing magkaupod. Kon wala ginatugot sang mga sirkunstansia nga magsulod ka liwat sa sining pribilehiyo sang pag-alagad, ayhan sarang mo mabuligan ang isa pa ka katapo sang pamilya sa pagpayunir.

⁷ Ngaa indi ini paghambalan subong isa ka pamilya? Ang palaabuton mahimo nga maayo kon himuon ninyo ini nga isa ka nahiusa nga proyekto sang pamilya. Kon isa pa ka payunir ang madugang sa hubon, ang bug-os nga panimalay makatarunganon nga magabatyag nga may bahin sila. Inang maalwan nga espiritu labi nga magapasuod sa pamilya sa espirituwal.​—Luc. 6:38; Filip. 2:​2-4.