Regular Payunir Ka Bala Anay?
1. Ano nga pribilehiyo ang natigayon sang madamo, pero ano ang napilitan nga himuon sang iban?
1 Halin sang una, linibo na ang nakatigayon sing pribilehiyo “sa pagpanudlo kag sa pagbantala sing maayong balita” subong bug-os tion nga ministro. (Binu. 5:42) Pero may iban nga nag-untat bangod sa pila ka rason. Kon regular payunir ka anay, nausisa mo na bala ang imo kahimtangan subong agod tan-awon kon makaregular payunir ka liwat?
2. Ngaa dapat usisaon sang mga payunir anay ang ila kahimtangan subong?
2 Nagabag-o ang Kahimtangan: Basi ang rason kon ngaa nag-untat ka sa pagpayunir nadula na. Halimbawa, kon nag-untat ka anay sa pagpayunir kay indi mo malab-ot ang 90 ka oras kada bulan, makapayunir ka na bala liwat kay ginpanubo na ini sa 70? Nabuhinan na bala ang imo responsibilidad sa pamilya ukon trabaho? Ang isa ka utod nga babayi nga nag-untat sa pagpayunir bangod sa balatian, nagpayunir liwat sa edad nga 89. Sobra isa ka tuig nga wala na sia ginaospital, kag sa banta niya makapayunir na sia liwat!
3. Paano makabuligay ang pamilya para makapayunir ang isa sa ila?
3 Mahimo nga wala ka nakaagi payunir, pero may isa ka payunir sa inyo pamilya nga nag-untat para atipanon ang isa ka miembro sang pamilya, pareho sang tigulang na nga ginikanan. (1 Tim. 5:4, 8) Kon amo, makabulig ka bala ukon ang iban nga miembro sang pamilya? Ngaa indi ninyo ini pag-istoryahan? (Hulu. 15:22) Kon magbuligay ang pamilya para may isa sa ila nga makapayunir, mabatyagan sang tanan nga may bahin sila.
4. Ano ang himuon mo kon indi ka pa makapayunir liwat?
4 Indi ka dapat maluyahan kon indi ka makapayunir liwat bangod sa imo kahimtangan subong. Ang imo kahanda sa pagpayunir nagapahamuot kay Jehova. (2 Cor. 8:12) Gamita ang imo eksperiensia sa pagpayunir sa imo ministeryo. Ipangamuyo ang imo handum, kag mangin alisto sa mga kahigayunan nga mapasibu ang imo kahimtangan. (1 Juan 5:14) Mahimo nga sa ulihi, buksan sa imo ni Jehova ang “isa ka daku nga ganhaan nga nagadul-ong sa hilikuton,” sa amo matigayon mo liwat ang kalipay sa pagregular payunir!—1 Cor. 16:9.