Mga Paagi Agod Mapasangkad ang Inyo Ministeryo

¹ Kapin sa 40 ka tuig na ang nakaligad, ang isa ka artikulo nga natig-uluhan “Is Your Best Good Enough?” nagguwa sa Enero 15, 1955, Watchtower. Mahigugmaon sini nga ginpakita kon paano mahimo mapauswag sang katawhan ni Jehova ang ila indibiduwal nga panikasog sa ministeryo agod madugangan nila ang ila hilikuton sa Ginharian. Yadtong maayo nga laygay maaplikar man karon, samtang padayon kita nga nagahimo sing pag-uswag.

² Ang tanan naton nga pag-alagad dapat ginapahulag sang labing daku nga sugo: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Ginapakita naton ang aton bug-os nga gugma kay Jehova paagi sa paggamit sing bug-os sang mga kahigayunan nga matigayon naton agod mapauswag ang hilikuton sang iya Ginharian. Binagbinaga ang masunod nga mga paagi nga mahimo nimo mapauswag ang imo ministeryo.

³ Abagaha ang Imo Responsabilidad: Ang dedikado nga mga kauturan nga lalaki sarang makapanikasog agod mangin kalipikado subong mga ministeryal nga alagad kag pagkatapos sini magauswag sa pag-alagad subong mga gulang. Ang mga artikulo nga “Nagatinguha Ka Bala?” kag “Sangkol Ka Bala sa Pag-alagad?,” sa Septiembre 1, 1990, nga guwa sang Ang Lalantawan, nagpahulag sa madamong kauturan nga lalaki nga ihanda ang ila kaugalingon para sa mga responsabilidad sa kongregasyon. Pamangkuta ang inyo lokal nga mga gulang para sa espesipiko nga mga panugda sa kon paano manikasog kag mangin kalipikado.

⁴ Ang diminyo nga mga gulang kag mga ministeryal nga alagad ginaagda nga hunahunaon sing serioso ang pag-aplay para sa Ministerial Training School. Mangin pamilyar kamo sa sini nga eskwelahan paagi sa pagbasa sa mga reperensia sa ubos sang “Ministerial Training School” sa Watch Tower Publications Indexes para sa 1986-1995, 1996, kag 1997. Nakita mo bala inang ‘daku nga gawang sang hilikuton’ nga bukas sa imo? (1 Cor. 16:​9a) Wala gid mahanduraw sang madamong kauturan nga lalaki nga nagsulod sa sini ang tanan nga pribilehiyo sang pag-alagad nga matigayon pagkatapos sang gradwasyon. Sa karon nagaalagad sila sa Bethel ukon sa latagon subong mga espesyal payunir, mga misyonero, ukon nagalakbay nga mga manugtatap.

⁵ Himud-usi ang Bug-os Tion nga Pag-alagad: Ang mga pamatan-on nga manugtapos sa hayskul, mga ginang sang puluy-an, kag ang bisan sin-o nga nagretiro na sa trabaho dapat magbinagbinag sing serioso sang pagpayunir. Repasuha ang suplemento sa Hulyo 1998 nga Ang Aton Ministeryo sa Ginharian, dayon makighambal sa mga payunir nga ang ila mga kahimtangan pareho sa imo. Mahimo ka mapahulag nga pasangkaron ang imo ministeryo paagi sa pagpayunir, subong sang ginahimo nila. (1 Cor. 11:1) Ano ang kinahanglan agod mapasangkad ang imo hilikuton sa 70 ka oras sa isa ka bulan kag sa amo makaregular payunir?

⁶ Mag-alagad Kon Diin Daku Pa ang Kinahanglanon: Nagapuyo bala ikaw sa teritoryo nga masunson ginatuptupan ukon madamo bala nga utod nga lalaki ang nagabuligay sa lulan? Nahunahuna mo na bala nga pasangkaron ang imo ministeryo paagi sa pagsaylo sa kon diin mas daku ang kinahanglanon? Ayhan pagsaylo ini sa kaiping nga lugar diin mas madamo nga manugpangabudlay ang kinahanglanon. (Mat. 9:​37, 38) Indi ini dapat himuon sing padasudaso. Nagakinahanglan ini sing mapinangamuyuon nga pagbinagbinag. (Luc. 14:​28-30) Ipakighambal sa mga gulang kag sa manugtatap sang sirkito ang imo kahimtangan. Magapangatarungan sila sa imo kon bala maalamon nga magsaylo karon ukon handaan ini sa ulihi. Subong man, ayhan ang manugtatap sang sirkito may nahibaluan nga mga lugar nga sakop sang iya sirkito nga nagakinahanglan sing bulig kag mangin praktikal para sa imo. Kon luyag mo magsulat sa Sosiedad para sa panugda sa kon diin ka masaylo, ang imo sulat dapat lakipan sang isa ka sulat nga ginpirmahan sang inyo Komite sa Pag-alagad Sang Kongregasyon.

⁷ Pauswaga ang Kalidad sang Imo Pag-alagad: Ayhan kita tanan sarang makapakigbahin sing labi pa sa ministeryo paagi sa pagpauswag sang kalidad sang aton pag-alagad sa latagon. Nagapakigbahin bala ikaw sa tanan nga bahin sang hilikuton, lakip ang pamalaybalay kag dipormal nga pagpanaksi subong man ang hilikuton nga pagduaw liwat kag pagtuon sa Biblia? Kon nagadumala ka sing isa ka pagtuon, mapauswag mo bala ang imo arte sang pagpanudlo? Maayo nga repasuhon ang suplemento sang Hunyo 1996 nga Ang Aton Ministeryo sa Ginharian para sa mga panugda nga sarang mo magamit agod mapahulag ang imo mga estudyante padulong sa dedikasyon kag bawtismo.

⁸ Ang mas tul-id nga pagbinagbinag tuhoy sa mga paagi agod mapasangkad kag mapauswag ang aton ministeryo masapwan sa kapitulo 9 sang Organisado sa Pagtuman sang Aton Ministeryo. Pat-od gid nga luyag naton tanan nga himuon ang aton bug-os nga masarangan sa pag-alagad sa Dios. Ngaa indi hunahunaon sing serioso ang imo espirituwal nga mga tulumuron? Himua ang ginarekomendar sang 1 Timoteo 4:​15: “Binagbinaga ining mga butang; ukuri ini, agod nga ang imo pag-uswag makit-an sang tanan nga tawo.”