Ano nga Sahi sang Espiritu ang Inyo Ginapakita?

¹ Ginhinakpan ni Pablo ang iya sulat sa kongregasyon sang Filipos paagi sini nga laygay: “Ang dibagay nga kaluoy ni Ginuong Jesucristo mangin sa espiritu nga inyo ginapakita.” (Filip. 4:23) Gindayaw niya sila tungod sa ila matuod nga pagkawili sa pagbantala sang maayong balita subong man sa ila mainit, mahigugmaon nga pag-ulikid sa kaayuhan sang isa kag isa.​—Filip. 1:​3-5; 4:​15, 16.

² Dapat naton mangin handom nga ipakita ang kaanggid nga espiritu sa aton kongregasyon. Kon ang tanan nagapakita sing kakugi, kalulo, kag pagkamaabiabihon, nagapaluntad ini sang isa ka espiritu nga makita sang mga nagapanilag. Ang positibo kag mahigugmaon nga espiritu nagadala sing paghiusa kag espirituwal nga pag-uswag. (1 Cor. 1:10) Ang negatibo nga espiritu nagapatubas sing pagluya sing buot kag pagkamaduhaduhaon.​—Bug. 3:​15, 16.

³ Ang mga Gulang Nagapanguna: Ang mga gulang may salabton nga huptan ang maayo kag positibo nga espiritu sa tunga nila kag sa sulod sang ila kongregasyon. Ngaa? Bangod ang kongregasyon mahimo maimpluwensiahan sang ila panimuot kag paggawi. Ginaapresyar naton ang mga gulang nga makugi sa pag-alagad sa latagon, nga nagatamyaw sa aton upod ang mainabyanon nga yuhum kag malulo nga pulong, kag nga positibo kag makapalig-on sa ila laygay, ginahatag man sing pribado ukon gikan sa plataporma.​—Heb. 13:7.

⁴ Sa pagkamatuod, dapat naton tanan himuon ang aton bahin agod ang kongregasyon mangin mainabyanon, maabiabihon, makugihon, kag mahunahunaon sa espirituwal. Sing indibiduwal, sarang naton mapakita ang kainit kag gugma sa aton pagpakig-upod sa iban. (1 Cor. 16:14) Wala dapat sing kinatuhayan sa edad, rasa, edukasyon, ukon ekonomiko nga mga sirkunstansia sa tunga naton. (Ipaanggid ang Efeso 2:21.) Bangod sang aton paglaum, sarang naton mapabanaag ang espiritu sang kalipay, maalwan nga pagkamaabiabihon, kag kakugi sa ministeryo.​—Roma 12:13; Col. 3:​22, 23.

⁵ Ang tanan nga nagapakig-upod sa aton, lakip ang mga bag-uhan, dapat pabatyagon nga ginaabiabi kag pahibaluon sang gugma kag debosyon sang paghiliutod. Paagi sa aton ministeryo kag paagi sa pagpadayag sang maayong Cristianong mga kinaiya, nagahatag kita sing ebidensia nga ang kongregasyon amo ang “haligi kag pamakud sang kamatuoran.” (1 Tim. 3:15) Naeksperiensiahan man naton “ang paghidait sang Dios” nga nagatipig sang aton mga tagipusuon kag mga ikasarang sa painoino. (Filip. 4:​6, 7) Kabay nga kita tanan makugi nga magapanikasog nga ipakita ang sahi sang espiritu nga nagapasalig sa aton sang dibagay nga kaluoy ni Jehova paagi kay Ginuong Jesucristo.​—2 Tim. 4:22.