Nagapasalamat sa Kon Ano ang Yara sa Aton

¹ “Ginarekomendar sang Dios ang iya kaugalingon nga gugma sa aton sa bagay nga, samtang mga makasasala pa kita, si Cristo napatay tungod sa aton.” (Roma 5:8) Dapat gid kita tanan magpasalamat sing daku bangod sang tumalagsahon nga sakripisyo nga ginhimo ni Jehova nga Dios kag sang iya Anak tungod sa aton! Paagi sa ginpatulo nga dugo ni Cristo, ginhatagan kita sing kahigayunan para sa kabuhi nga walay katapusan, butang nga indi mahatag sang iban pa nga tawo sa aton.

² Paano naton mapakita ang aton pagpasalamat? Madamo nga tawo ang ginauhaw sang matuod nga ihibalo gikan sa Pulong sang Dios. Kabubut-on ni Jehova nga mabuligan sila. (1 Tim. 2:4) Mapakita naton ang aton pagpasalamat paagi sa ‘pagpahayag sang maayong balita sang Ginharian sang Dios.’ (Luc. 4:43) Ang bug-os tagipusuon nga pagpakigbahin nagapakita nga ginaapresyar naton nga si Cristo napatay para sa aton kag nga luyag naton sia ilugon paagi sa paghimo sing disipulo sa iban.​—Mat. 28:​19, 20.

³ Ano ang pila ka paagi sang pagbantala nga bukas sa aton? Posible bala para sa aton nga magpalista subong mga auxiliary payunir sa tion kag tion? Sa tapos maisip ang bili, ang iban mahimo makaregular payunir. Sang nagligad nga mga tion ayhan ginbinagbinag mo ang magpalista, apang may mga sablag. Ayhan nagbag-o na ang imo mga kahimtangan. Kon amo, nahunahuna mo na bala sing maayo nga pauswagon ang imo pag-alagad paagi sa pagsulod sa payunir nga pag-alagad ukon paagi sa pag-alagad subong isa ka auxiliary payunir sa tion kag tion?

⁴ Ang aton pagpasalamat labi pa nga magatudok kon tan-awon naton ang nagakahanabo sa palibot naton. Nagadugang ang krimen, pagdumot, kag pinuyas sa bug-os nga kalibutan. Ginlaragway ni Pablo ang aton tion subong “ital-ital” kag “mabudlay atubangon.” (2 Tim. 3:1) Sa tunga sining masubo nga mga kahimtangan, may buganang maayong balita kita nga mapaambit sa iban. May yara kita duha ka matahom nga magasin, Ang Lalantawan kag ang Magmata!, nga matanyag naton sini nga bulan sing tag-isaisa ukon paagi sa suskripsion. May mga brosyur man kita nahanungod sa madamo nga topiko. Ang pagpasalamat sa kon ano ang yara sa aton dapat magpahulag sa aton nga ipaambit ini sa iban.​—Heb. 13:16.

⁵ Ayhan sa lugar nga imo ginapuy-an, diutay nga interes lamang ang ginapakita sang mga tawo sa espirituwal nga mga butang. Kabaliskaran sa sina, may mga teritoryo nga mabungahon. Posible bala nga makaalagad ka sa isa ka lugar diin kinahanglanon gid ang imo bulig? Ang inyo manugtatap sa sirkito mahimo nga may pila ka panugda nahanungod sini nga butang.

⁶ May madamo nga rason agod mangin mapasalamaton sa kon ano ang yara sa aton, sa pagkamatuod isa ka kabuganaan sang maayo nga mga butang. Ang aton mga pasalamat kay Jehova sarang mapabutyag sing labing maayo paagi sa pagbantala sang iya ngalan kag mga katuyuan sa iban.​—Isa. 12:​4, 5.