Kinahanglan​—⁠20,000 Ka Auxiliary Payunir Makaauxiliary Payunir Ka Bala sa Marso? Abril? Mayo?

¹ “Kinahanglan 1,000 ka Manugbantala” amo ang titulo sang isa ka artikulo nga ginbalhag sa Abril 1881 nga guwa sang Watch Tower. Hanuot ini nga nagpangabay sa tanan nga dedikado nga lalaki kag babayi “nga ginhatagan sang Ginuo sing ihibalo tuhoy sa Iya kamatuoran,” nga gamiton ang bisan ano nga tion nga masarangan nila sa pagpakigbahin sa pagpalapnag sing kamatuoran sa Biblia. Yadtong sarang makahatag sing katunga ukon kapin pa sang ila tion para lamang sa hilikuton sang Ginuo ginpalig-on nga magboluntaryo subong colporteur nga mga ebanghelisador​—⁠ang mga sinundan sang mga payunir karon.

² Bisan pa nga nagbalhin ang tion sugod sang ika-19 nga siglo, isa ka katunayan ang nagapabilin​—⁠luyag sang dedikado nga mga alagad sang Dios nga padayon nga gamiton ang madamo nga tion kon mahimo sa pagpalapnag sing maayong balita. Ang pag-alagad subong auxiliary payunir nagabulig sa mga manugbantala sang kongregasyon nga mapauswag ang ila pagkaepektibo samtang nagahinguyang sila sing dugang pa nga tion sa ministeryo sang Ginharian.​—⁠Col. 4:​17; 2 Tim. 4:⁠5.

³ Kutob sang ginsugdan ini, linibo ka kauturan nga lalaki kag babayi ang nag-auxiliary payunir na. Ang kainit para sa sini nag-uswag tubtob sa punto nga ang kataason nga 21,567 ka auxiliary payunir nalab-ot sa Pilipinas sadtong Abril 1987! Sugod sadto, wala na kita makareport sing 20,000 ka auxiliary payunir sa isa ka bulan. Indi bala maayo nga suliton ining matahom nga panikasog paagi sa paghandum nga matigayon ang kapin sa 20,000 ka auxiliary payunir sa Marso, Abril, kag Mayo, 1997?

⁴ Ginapalig-on namon ikaw nga himuon mo nga tulumuron ang mag-auxiliary payunir sa isa ukon kapin pa ka bulan sa Marso, Abril, kag Mayo. Ngaa ilakip ang Marso? Bangod sini nga tuig ang Memoryal sang kamatayon ni Cristo nagatupa sa Domingo, Marso 23. Wala na sing maayo pa nga paagi nga mahinguyang naton ang mga semana antes sang Memoryal sangsa makigbahin sing makugi sa pagbantala sa Ginharian nga hilikuton nga ginsugdan sang aton Ginuo kag Manluluwas, si Jesucristo. Bangod sang daku nga panaksi nga mahatag sa Marso, maagda naton ang madamong interesado sa pagbuylog sa aton nga dumdumon ang kamatayon ni Cristo. Mangin pinasahi man ang Marso bangod, sa nahauna nga tion, gamiton naton ang bag-ong libro, Ang Sekreto sang Kalipay sa Pamilya. Dugang pa, ang bulan sang Marso may yara lima ka Sabado kag lima ka Domingo, nga nagatugot para sa masangkad nga pagpanghikot sa latagon sa talipuspusan sang semana. Sa pagkamatuod, sa mga bulan sang Abril kag Mayo, ang padayon nga makugi nga panikasog sa ministeryo magatugot sa aton nga matatap ang interes nga nasapwan kag masugdan ang bag-ong mga pagtuon sa Biblia sa puluy-an, nga nagagamit sing brosyur nga Ano ang Ginapatuman sang Dios sa Aton? Matuptupan man naton sing maid-id ang aton teritoryo, ilabi na sa talipuspusan sang mga semana, paagi sa bag-ong suno-sa-tion nga mga guwa sang Ang Lalantawan kag Magmata!

⁵ Sin-o ang Kalipikado sa Pag-auxiliary Payunir?: Ang Organisado sa Pagtuman sang Aton Ministeryo, pahina 113-14, nagapaathag: “Bisan ano man ang imo personal nga kahimtangan, kon ikaw bawtismado, may maayong moral nga tindog, makahimos nga masugata ang kinahanglanon nga maghinguyang sing 60 ka oras sa isa ka bulan sa pag-alagad sa latagon kag nagapati nga ikaw makaalagad sing isa ukon kapin pa ka mga bulan subong auxiliary payunir, ang mga gulang sa kongregasyon malipay sa pagbaton sang imo aplikasyon para sa sining pribilehiyo sa pag-alagad.” Mahimos mo bala ang imo mga hilikuton agod mahimuslan ini nga pribilehiyo sa Marso? Abril? Mayo?

⁶ Ang positibo nga panimuot sang hubon sang mga gulang, upod ang bug-os tagipusuon nga suporta sang tanan iban pa nga mga manugbantala, magapaposible nga ang paghulag sa sining panawagan para sa 20,000 ka auxiliary payunir mangin isa gid ka daku nga kadalag-an. (Heb. 13:7) Ang tanan nga ulo sang pamilya ginapalig-on nga pat-uron kon pila sa ila panimalay ang makabuylog sa grupo sang mga auxiliary payunir sa masunod nga isa ukon kapin pa ka bulan.​—⁠Sal. 148:​12, 13; ipaanggid ang Binuhatan 21:​8, 9.

⁷ Indi gilayon maghinakop nga indi mo masarangan ang mag-auxiliary payunir bangod sang imo bug-os tion nga sekular nga trabaho, iskedyul sa eskwelahan, mga salabton sa pamilya, ukon iban pa Makasulatanhon nga mga obligasyon. Para sa iban ayhan indi ini mahapos pakigbahinan; apang, paagi sa maayo nga pagplano kag sa pagpakamaayo ni Jehova, mahimo sila magmadinalag-on. (Sal. 37:​5; Hulu. 16:3) Tuguti nga ang imo handum nga makigbahin sa pagpayunir amo ang magakontrol sang imo mga kahimtangan; indi pagtuguti nga ang imo mga kahimtangan amo ang magakontrol sang imo handum sa pagpayunir. (Hulu. 13:​19a) Gani, bangod sang daku nga gugma kay Jehova kag sa isigkatawo, napasibu sang madamo ang ila semanal nga rutina sang kabuhi agod mapasangkad ang ila ministeryo sa isa ka bulan ukon kapin pa. (Luc. 10:​27, 28) Madamong kabulahanan ang natigana para sa mga nagapanikasog sing lakas sa hilikuton sang Ginharian.​—⁠1 Tim. 4:⁠10.

⁸ Kon Ano ang Mahimo sang Pag-auxiliary Payunir: Ang bug-os kalag nga panikasog sang linibo ka alagad sang Dios sa pag-auxiliary payunir nagaresulta sa daku nga kadayawan kay Jehova. Samtang ining mga manugwali sang Ginharian nagapanikasog nga mapalapnag ang maayong balita sa madamo nga tawo, labi sila nga nagasuod kay Jehova sing personal bangod natun-an nila nga magsalig sing labi sa iya para sa iya espiritu kag pagpakamaayo.

⁹ Ang aktibo nga mga auxiliary, regular, espesyal payunir sa tunga naton nagapatubas sing lab-as nga espiritu sang kabaskog sa kongregasyon. Ang ila kapagsik makalalaton samtang nagasugid sila tuhoy sa ila mga eksperiensia sa latagon. Nagapahulag ini sa iban nga timbangon liwat ang ila kahimtangan agod makapakigbahin sing dugang sa ministeryo. Ang isa ka utod nga babayi nga nagpabawtismo sa edad nga 70 gilayon nga nag-auxiliary payunir sing regular. Sang ginpamangkot sia mga pila ka tuig sang ulihi kon ngaa, sa iya edad, nagapangabudlay gihapon sia sing lakas sa ministeryo subong isa ka auxiliary payunir kada bulan, nagsiling sia nga sa pamatyag niya ang nahaunang 70 ka tuig sang iya kabuhi nauyang, kag indi niya luyag nga uyangan ang nabilin pa nga mga tinuig sang iya kabuhi!

¹⁰ Ang tagsa nga nagaauxiliary payunir nagapalambo sing napauswag nga ikasarang sa ministeryo. Ang isa ka lamharon nga saksi nagbaton: ‘Sang bata pa ako nagaupod-upod ako anay sa akon mga ginikanan sa ila pagbantala nga hilikuton. Kasadya gid mag-alagad sa latagon. Apang, sang ulihi nakita ko nga tuhay gali ako sa iban sa eskwelahan. Nian nasaw-ahan na ako maghambal tuhoy sa kamatuoran sa akon kaupod nga mga estudyante. Kon nagabantala ako sa pamalaybalay, nahadlok ako nga basi makita ko ang akon kilala gikan sa eskwelahan. Sa banta ko ang akon problema amo ang kahadlok sa tawo. [Hulu. 29:​25] Sang makatapos ako sa pag-eskwela, namat-od ako nga tilawan ang pagpayunir sing umalagi lamang. Subong resulta, ang ganyat sang pagbantala nangin tuhay gid sangsa nagligad. Wala ko na ini pagtamda subong isa lamang ka masadya nga hilikuton, ukon isa ka mabug-at nga lulan. Sang nakita ko nga ang akon mga estudyante sa Biblia nagauswag sa kamatuoran, nakabatyag ako sing tudok nga kaayawan sa ebidensia nga ginasakdag ni Jehova nga Dios ang akon mga panikasog.’ Ining pamatan-on nagpadayon sa pag-alagad subong isa ka regular payunir.

¹¹ Kon madamo sa kongregasyon ang nagaauxiliary payunir, ang teritoryo matuptupan sing maid-id. Ang utod nga lalaki nga nagatangdo sing mga teritoryo mahimo nga magpabulig sa mga auxiliary payunir nga matuptupan ang talagsa lang ginapangabudlayan nga mga lugar. Ang pagbalon sing panyaga kag pag-alagad sa bug-os nga adlaw magapaposible nga mapangabudlayan sang mga auxiliary payunir ang malayo nga mga teritoryo.

¹² Ang mga Gulang Dapat Maghimo sing Abanse nga mga Paghanda: Sa masunod nga tatlo ka bulan, dapat himuon ang mga kahimusan nga mag-iskedyul sing lainlain nga sahi sang pagpanaksi nga hilikuton sa nanuhaytuhay nga oras sa semana, lakip sa mga hapon na kag sa kasisidmon, agod madamo kon mahimo pa ang makapakigbahin. Ilakip ang mga tion para sa pagpanaksi sa dalan kag pagpangabudlay sa teritoryo nga may negosyo, dugang sa regular nga hilikuton sa pagpamalaybalay. Paagi sini, mabuligan sang mga gulang ang mga nagapayunir nga mag-alagad upod sa kongregasyon sa oras nga labi ka praktikal kag kombeniente para sa ila iskedyul. Ang kongregasyon dapat pahibaluon sang tanan nga kahimusan sa pag-alagad sa latagon. Ang mga miting antes sa pagguwa sa latagon dapat nga organisado sing maayo. Dugang pa, ang bastante nga teritoryo dapat naaman kag ang nagakaigo nga suplay sang mga magasin kag iban pa nga literatura dapat gilayon pediduhon.

¹³ Planuha ang Imo Personal nga Iskedyul sa Pag-alagad: Ang isa ka utod nga lalaki, nga nagaalang-alang primero nga mag-auxiliary payunir, nagasiling: “Tuman gali ini kahapos sangsa ginahunahuna ko. Nagakinahanglan lamang ini sing maayo nga iskedyul.” Sa likod nga pahina sining suplemento, nakita mo bala ang halimbawa nga iskedyul sang pag-auxiliary payunir nga praktikal para sa imo? Ang pag-iskedyul sing 15 ka oras kada semana para sa ministeryo amo lamang ang tion nga ginakinahanglan sa mga auxiliary payunir.

¹⁴ Agod makaauxiliary payunir, ang mga ginang sa puluy-an kag ang mga nagatrabaho sa hapon kag gab-i masami nga makaiskedyul nga mag-alagad sa latagon sa aga. Ang mga kabataan nga nagaeskwela kag ang mga nagatrabaho halin sa tungang gab-i tubtob sa kaagahon makahinguyang sang mga hapon na sa pagbantala nga hilikuton. Nasapwan sang mga bug-os tion nga nagatrabaho nga posible maka-day off sa trabaho sing isa ka adlaw sa isa ka semana ukon mahinguyang ang bug-os nga talipuspusan sang semana sa ministeryo, dugang sa pagpanaksi sa gab-i. Madamo sa mga nagaalagad lamang sa latagon sa talipuspusan sang mga semana ang nagapili sing mga bulan nga may yara lima ka Sabado kag Domingo. Ang Marso amo sini, subong man ang Agosto kag Nobiembre 1997. Nagagamit sang blangko nga iskedyul sa pahina 6 nga gin-aman subong giya, hunahunaa sing maayo kag sing mapangamuyuon kon ano ang mangin praktikal nga personal nga iskedyul sa pag-alagad para sa imo kaugalingon nga kahimtangan.

¹⁵ Ang isa ka bentaha sang aman nga mag-auxiliary payunir amo ang pagkamapasibusibuon. Mapili mo ang mga bulan nga magapayunir ka, kag makaalagad ka sing masunson suno sa luyag mo. Kon luyag mo mag-auxiliary payunir sing padayon apang indi mo masarangan, nahunahuna mo na bala ang magpayunir kada ikaduha nga bulan sa bug-os nga tuig? Sa pihak nga bahin, ang iban nakaauxiliary payunir sing padayon sa malawig nga tion.

¹⁶ Isa ka Tikang Padulong sa Bug-os Tion nga Pagpayunir: Madamo sang mga may espiritu sa pagpayunir ang luyag magregular payunir, apang nagapalibog sila kon bala sila may tion, kahimtangan, ukon kusog para sa sini. Walay duhaduha nga kalabanan sang mga nagaregular payunir karon ang naggamit primero sang auxiliary payunir nga pag-alagad subong tikang padulong sa bug-os tion nga pag-alagad. Paagi sa pagdugang sing isa lamang ka oras kada adlaw, ukon sing isa ka bug-os nga adlaw kada semana, sa imo iskedyul sa pag-auxiliary payunir, masarangan mo nga masunod ang iskedyul sang regular payunir. Agod mahibaluan kon masarangan mo ini, ngaa indi tilawan nga maghinguyang sing 90 ka oras sa ministeryo sa sulod sang isa ukon duha ka bulan nga pag-auxiliary payunir? Sa amo man nga tion, mapauswag mo ang mga pagduaw liwat kag mga pagtuon sa Biblia, nga magatugot sa imo sa pagtigayon sing balanse nga pagministeryo subong payunir.

¹⁷ Ang isa ka utod nga babayi nag-auxiliary payunir sing padayon sa sulod sang anom ka tuig. Sa bug-os sina nga tion tulumuron niya nga magregular payunir. Bangod sina, gintilawan niya ang apat ka lainlain nga sekular nga trabaho sa tuyo nga makapaluntad sing kahimtangan nga makabulig sa iya nga malab-ot ang 90 ka oras nga lalab-uton para sa mga regular payunir. Kada bulan, ginsunod niya ang isa ukon duha ka iskedyul agod mabulubanta kon bala posible ini. Apang sang gin-usisa niya ini, nakabatyag sia nga indi niya masarangan ang bug-os tion nga ministeryo. Apang, padayon sia nga nangayo sing panuytoy kay Jehova. Nian, isa ka adlaw samtang nagahanda para sa Miting sa Serbisyo, nabasa niya ang isa ka artikulo sa Septiembre 1991 nga Ang Aton Ministeryo sa Ginharian nga nagasiling: “Sa baylo nga hatagan sing di-nagakaigo nga pagpadaku ang lalab-uton nga oras, ngaa indi isentro ang igtalupangod sa dugang pa nga kahigayunan nga makapakigbahin sa hilikuton sa pagtipon? (Juan 4:​35, 36)” Sia nagasaysay: “Ginbasa ko ini nga dinalan sing lima ukon anom ka beses, kag nakapat-od gid ako nga amo ini ang sabat ni Jehova. Sadto gid nga tion namat-od ako nga magsulod sa regular payunir nga pag-alagad.” Bisan pa nga ang iskedyul sang iya part-time nga trabaho indi amo ang labing maayo, ginsumiter niya ang iya aplikasyon sa pagregular payunir. Pagligad sang isa ka semana ang iya iskedyul nagbalhin, kag ginhatagan sia sing inoras sa pagtrabaho nga nagakaigo gid sa iya. Sia naghinakop, “Wala ka bala nagaugyon nga pagpakamaayo ini ni Jehova?,” kag nagdugang: “Kon mangayo ka sing panuytoy kay Jehova kag mabaton mo ini, indi ka magpalagyo sa sini​—⁠batuna ini.” Kon hanuot mo gid nga handum nga magregular payunir, ayhan pagkatapos sang tatlo ka bulan nga pag-auxiliary payunir sini nga Marso, Abril, kag Mayo, makumbinse ka nga magamadinalag-on man ikaw sa bug-os tion nga pagministeryo.

¹⁸ Makapat-od gid kita nga pakamaayuhon ni Jehova ang kakugi kag suportahan ang mga panikasog sang iya katawhan samtang ginabantala nila ang maayong balita sang kaluwasan sini nga pinasahi nga tion sang hilikuton sa tigpamulak. (Isa. 52:​7; Roma 10:15) Sabton mo bala ang panawagan para sa 20,000 ka auxiliary payunir paagi sa pagpayunir sa Marso? Abril? Mayo?

[Kahon sa pahina 3]

Kon Paano Magmadinalag-on Subong Auxiliary Payunir

◼ Magsalig nga magamadinalag-on ka

◼ Mangamuyo kay Jehova nga pakamaayuhon ang imo mga panikasog

◼ Agdaha ang isa pa ka manugbantala nga magpayunir kaupod mo

◼ Magplano sing praktikal nga iskedyul sa pag-alagad

◼ Mag-order sing nagakaigo nga suplay sang mga magasin

◼ Suportahi ang mga kahimusan sang kongregasyon para sa pag-alagad

◼ Mangita sing mga kahigayunan nga makapanaksi sing di-pormal