Pamangkot

◼ Paano kita makakomento sing epektibo gid sa mga miting?

Ginakalangkagan naton ang aton semanal nga mga miting sang kongregasyon. Didto may kahigayunan kita nga mapabutyag ang aton pagtuo paagi sa pagkomento. (Hulu. 20:15; Heb. 10:​23, 24) Dapat naton tamdon ang pagkomento subong isa ka pribilehiyo kag panikasugan nga makapakigbahin sing tayuyon. Paano naton ini mahimo sing epektibo gid?

Ang paghanda amo ang nahauna nga tikang. Ang abanse nga pagbasa sa materyal importante. Tinguhai nga makuha ang matuod nga kahulugan sang kon ano ang ginapresentar. Bisan pa ang tema mahimo nga nahambalan na sang nagligad, pangitaa ang napasangkad pa nga mga punto nga ginapresentar. Kon nagahanda sang mga komento gikan sa isa ka publikasyon nga nagahatag sing maid-id nga pagtuon sa isa ka tulun-an sa Biblia, kaangay sang Revelation Climax nga libro, tinguhai nga mahangpan kon paano ang isa ka partikular nga bersikulo naangot sa mga bersikulo nga nagapalibot sa sini. Ang pagsunod sa sining mga panugda magapukaw sang imo ikasarang sa paghunahuna. Magabulig ini sa imo sa paghanda sing maayong mga komento kag makasapo sing kalipay sa imo pagpakigbahin.

Ang labing maayo nga mga komento malip-ot, simple, kag napasad sa publikasyon nga ginatun-an. Dapat sabton sing direkta sang una nga nagakomento ang pamangkot, nagabilin sang iban pa nga mga punto para sa dugang nga mga komento. Likawi ang malaba kag masibod nga mga komento. Ipabutyag ang imo kaugalingon sa imo kaugalingon nga mga tinaga, sa baylo nga basahon sing letra-por-letra ang imo komento gikan sa publikasyon. Dapat ilakip sang iban nga mga komento ang mga punto nga natuptupan sa ginsitar nga mga teksto sa Biblia. Mamati sing maayo sa ginasiling sang iban agod malikawan mo ang dikinahanglanon nga mga pagsulit.

Maayo nga bayawon ang imo kamot sing pila ka beses apang indi sa tagsa ka parapo. Ginaagda namon ang mga kabataan sa pagpakigbahin sa pagkomento. Kon nagapangalag-ag ikaw sa paghambal, mahimo nimo pahibaluon sing una ang konduktor kon diin nga parapo ang luyag mo kumentuhan, kag mahimo gid nga hatagan niya ikaw sing kahigayunan nga makakomento.

Dapat kita tanan manikasog sing hanuot nga makapakigbahin sa mga miting sa kongregasyon nga nagalakip sang partisipasyon sang tumalambong. Dumduma, ang kadalag-an sang mga miting nasandig sa kasangkaron sang aton pagkahanda kag pagkaepektibo sa pagkomento.—Sal. 26:12.