Palig-una ang Isa kag Isa Paagi sa Pagkomento sa mga Miting

¹ Ginalaygayan kita sa Hebreo 10:​24 nga ‘pukawon naton ang isa kag isa sa gugma kag sa maayong mga buhat.’ Nagalakip ini sang pagpalig-on sa isa kag isa paagi sa paghatag sing makapalig-on nga mga komento sa mga miting sa kongregasyon. Ngaa dapat kita magkomento? Paano naton ini himuon? Sin-o ang magabenepisyo?

² Hunahunaa ang madamo nga beses nga nakabenepisyo ka gikan sa pagpamati sa iban nga nagahatag sing simple, maathag nga mga ekspresyon nga nagapauswag sang imo paghangop kag nagapabakod sa imo sa espirituwal. Pribilehiyo mo nga himuon man ini sa ila. Kon magkomento ka, ginapakita mo ang imo handum nga ‘ipaambit ang pila ka espirituwal nga hiyas’ para palig-unon ang tanan nga nagatambong.​—⁠Roma 1:​11, 12.

³ Kon Paano Makahatag Sing Maayo nga mga Komento: Indi maghatag sing malawig nga komento, nga nagatuptop sang tanan nga punto sa parapo. Ang malawig nga komento masunson nga wala nagahatag sang espesipiko nga sabat kag mahimo magapalas-ay sa iban sa pagkomento. Ang una nga komento sa parapo dapat malip-ot kag direkta nga sabat sa naimprinta nga pamangkot. Pagkatapos sina, mahimo maaplikar sing praktikal sang mga nagahatag sing dugang nga komento ang materyal ukon mapakita kon paano iaplikar ang mga kasulatan.—Tan-awa ang School Guidebook, pahina 90-2.

⁴ Kon ang ideya tuhoy sa pagkomento nagahatag sa imo sing kabalaka, maghanda sing malip-ot nga komento sing abanse, kag pangabaya ang konduktor nga tawgon ka sa sina nga parapo. Sa tapos mo ini mahimo sa pila ka miting, ang pagkomento mangin mas mahapos. Dumduma nga sanday Moises kag Jeremias nagpabutyag sing kakulang sing pagsalig sa ila ikasarang sa paghambal sa publiko. (Ex. 4:​10; Jer. 1:​6, ftn.) Apang ginbuligan sila ni Jehova sa paghambal para sa iya, kag buligan ka man niya.

⁵ Sin-o ang Magabenepisyo Gikan sa Imo mga Komento? Ikaw mismo magabenepisyo bangod ang imo mga komento labi nga magapadulot sang kamatuoran sa imo hunahuna kag tagipusuon, labi pa nga nagapahapos para sa imo nga madumduman ang impormasyon sa ulihi. Subong man, ang iban magabenepisyo gikan sa pagpamati sa imo makapalig-on nga mga ekspresyon. Ginapalig-on kita kon ang tanan, eksperiensiado man, batan-on, mahuluy-on, ukon bag-uhan, nagapanikasog sa pagpabutyag sang ila pagtuo sa mga miting sang kongregasyon.

⁶ Masapwan gid naton nga ang ‘mga pulong sa husto nga tion tuman gid kaayo’ kon ginagamit ini sa pagpalig-on sa isa kag isa sa mga miting!​—⁠Hulu. 15:⁠23.